"Daha çox işçi cəlb edən şirkətlər üçün vergi güzəşti..."
Məlum olduğu kimi, vergi ödəyicilərinə xidmətlərin spektri genişləndiriləcək və bir sıra yeni elektron xidmətlərin tətbiqi həyata keçiriləcək. Vergilərini vaxtlı-vaxtında ödəyən nümunəvi vergi ödəyiciləri və intizamsız vergi ödəyiciləri müəyyən ediləcək və onların adları ictimaiyyətə açıqlanacaq.
Nümunəvi vergi ödəyicilərinə münasibətdə vergi inzibatçılığı sadələşdiriləcək və onlara ünvanlı xidmətlər göstəriləcək. Azərbaycanda nağdsız ödənişlərin stimullaşdırılması üçün bir neçə yeni təklif hazırlanıb. Bir müddət əvvəl bu barədə jurnalistlərə açıqlama verən vergilər nazirinin müavini İlkin Vəliyev qeyd edib ki, nağdsız ödənişlərə tətbiq edilən vergi dərəcəsi də azaldıla bilər: "Təkliflərdən biri budur ki, 1000 manatdan yuxarı bütün ödənişlər nağdsız olmalıdır. Digər təklif isə bu ödənişlərə vergi güzəştləri ilə bağlıdır".
Nazir müavini deyib ki,, nümunəvi vergi ödəyiciləri ilə də bağlı müəyyən tədbirlərin həyata keçirilməsi nəzərdə tutulub.
Prezident İlham Əliyevin rəhbərliyi altında son 10 ildə vergi sistemi əsaslı şəkildə modernləşdirilib, vergi inzibatçılığı kökündən dəyişdirilərək beynəlxalq təcrübə nəzərə alınmaqla təkmilləşdirilib. Vergi orqanları ilə vergi ödəyiciləri arasında texnoloji baxımdan mükəmməl elektron əlaqələrin yaradılması, geniş təhlil bazasına malik informasiya sistemlərinin qurulması istiqamətində geniş tədbirlər həyata keçirilib.
Belə məlumatlar var ki, vergi daxilolmalarını daha da stimullaşdırmaq üçün nümunəvi vergi ödəyicilərinə bir sıra güzəştlər ediləcək. Sözügedən güzəştlərin əhəmiyyətini ekspertlər necə dəyərləndirir? Məsələyə münasibət bildirən ekspert Zakir Əhmədovun sözlərinə görə, indiki dövrdə nümunəvi vergi ödəyicilərinə güzəştlərin edilməsi olduqca vacib məsələdir: "Çünki neft gəlirlərinin azalması səbəbindən büdcənin mütləq neftdən kənar sahədən daha çox pul götürülməsi üçün ilk nəzərləri vergiyə yönəlir. Ona görə də stimullaşdırıcı tədbirlər mütləq görülməlidir. Yəni gəlirlərin azalmasına görə baş verən itkilər kompensasiya olunsun. Ancaq bunu vergiləri artırmaqla yox, sadələşmiş vergi sisteminin tətbiqi çərçivəsində həyata keçirmək mümkündür. Ona görə də vergidən daxilolmaları artırmaq istəyiriksə, mütləq vergitutma maksimum dərəcədə sadələşdirilməlidir. Lazım olsa, vergilər yumşaldılmalı və vergi güzəştləri tətbiq edilməlidir. Xüsusilə yeni yaranan müəssisələr və xarici şirkətlər ilkin dövrdə vergidən azad olunmalı və ya müəyyən güzəştlər olmalıdır. Həm yerli, həm də xarici şirkətlərə elə şərait yaradılmalıdır ki, onlar gəlib burada müəssisə açsın, yeni iş yerləri yaratsınlar. Dövlət büdcəsinə hesablanmış vergilərin yığım faizinin artırılması üçün nümunəvi vergi ödəyicisi ilə vergidən yayınan sahibkarlar arasında fərq qoyulmalıdır. Nümunəvi vergi ödəyicilərinə edilən güzəştlər onları daha çox vergi ödəməyə həvəsləndirəcək. Həmin müəssisə rəhbəri maraqlı olacaq ki, fəaliyyət sahəsini genişləndirsin. O üzdən daha çox işçi cəlb edən şirkətlər üçün vergi güzəşti daha çox olmalıdır. Belə olduğu təqdirdə sahibkarlar öz qeyri-rəsmi dövriyyəsini rəsmiləşdirməkdə maraqlı olacaq".
Vidadi ORDAHALLI
