"Bu yöndə qarşılıqlı fikir mübadiləsinin aparılması faydalıdır"
Məlum olduğu kimi, Vergilər Nazirliyinin rəhbər vəzifəli şəxsləri və Azərbaycanda Amerika Ticarət Palatasının (AMCHAM) üzvləri arasında görüş keçirilib.
Görüşün keçirilməsində məqsəd Azərbaycan Prezidentinin 4 avqust 2016-cı il tarixli "2016-cı ildə vergi sahəsində aparılacaq islahatların istiqamətləri"nin təsdiqi və vergi inzibatçılığının təkmilləşdirilməsi haqqında" Sərəncamında əks olunan islahat istiqamətləri üzrə fikir mübadiləsi aparmaq, həmin Sərəncamla verilmiş tapşırıqların icrası zamanı özəl sektorun təkliflərinin də nəzərə alınmasının təmin edilməsi olub.
Görüşdə çıxış edən Vergilər Nazirliyinin Vergi siyasəti və strateji araşdırmalar baş idarəsinin rəisi Samirə Musayeva bildirib ki, 4 avqust 2016-cı il tarixli Sərəncam vergi sahəsində aparılacaq əsas islahatları özündə ehtiva edir. Qeyd edilib ki, Sərəncamın icrası ilə bağlı işlər dörd əsas istiqamətdə - vergi yükünün azaldılması, vergi ödəyicilərinin hüquqlarının genişləndirilməsi, vergi ödəyicilərinə xidmətin səviyyəsinin daha da yüksəldilməsi və vergi inzibatçılığının təkmilləşdirilməsi istiqamətlərində aparılır. Bu işlər çərçivəsində ƏDV-nin differensiallaşdırılması, sabit verginin tətbiqi, vergi öhdəliklərinin əvvəlcədən müəyyən edilməsi (ATR), könüllü vergi açıqlaması, vergi yoxlamalarının qısa müddətdə başa çatdırılması və digər işlər nəzərdə tutulub.
Sonra həyata keçiriləcək islahatlarla bağlı biznes subyektlərinin təklifləri dinlənib, vergi qanunvericiliyinin təkmilləşdirilməsi istiqamətləri ətrafında geniş müzakirələr aparılıb.
Maraqlıdır, ABŞ ölkəmizə vergi sahəsində nə kimi köməklik göstərə bilər? Məsələyə münasibət bildirən ekspert Rəsul Cahangirlinin sözlərinə görə, Birləşmiş Ştatların bu sahədə zəngin təcrübəsi var: "Nəzərə almaq lazımdır ki, ABŞ-da azad sahibkarlıq böyük inkişaf yolu keçib. Bu ölkə yüksək iqtisadi parametrləri özündə ehtiva edir. Eyni zamanda, ötən illər ərzində ABŞ vergi sistemi xeyli təkmilləşib. Dəfələrlə bununla bağlı ölkənin vergi sistemində islahatlar və təkmilləşdirmə işləri aparılıb. Ölkənin vergi qanunvericiliyi daha geniş və çoxşaxəlidir. Bu baxımdan hesab edirəm ki, ABŞ malik olduğu zəngin vergi təcrübəsindən istifadə edib bu sahədə Azərbaycana köməklik göstərə bilər. Hesab edirəm ki, Azərbaycan reallıqları nəzərə alınmaqla, ABŞ-ın zəngin vergi qanunvericiliyindən faydalanmaq olar. O cümlədən, orada olan bəzi yeniliklərin ölkə iqtisadiyyatında tətbiq olunması mümkündür. Ona görə də bu yöndə qarşılıqlı fikir mübadiləsinin aparılması faydalıdır".
Vidadi ORDAHALLI
