"İnvestisiyanın təşviq edilməsi sərmayə qoymaq istəyən sahibkarlar üçün daha əlverişli şərtlərlə fəaliyyət göstərmək imkanı verəcək"
Xəbər verildiyi kimi, Nazirlər Kabinetinə həvalə edilmiş səlahiyyətlərdən biri ləğv olunub. Bu, Prezident İlham Əliyevin imzaladığı "İnvestisiyaların təşviqi ilə bağlı əlavə tədbirlər haqqında" 2016-cı il 18 yanvar tarixli Fərmanda dəyişikliklər edilməsi barədə" Fərmanda əksini tapıb. Fərmana əsasən, "İnvestisiya təşviqi sənədinin verilməsi Qaydası"na dəyişiklik edilib.
Bu Qayda İqtisadiyyat Nazirliyi tərəfindən hüquqi şəxslərə və fərdi sahibkarlara investisiya təşviqi sənədinin verilməsini müəyyən edir. İnvestisiya təşviqi sənədi Vergi Məcəlləsində və "Gömrük tarifi haqqında" Qanunda müəyyən edilmiş güzəştləri əldə etməyə əsas verən sənəddir. Qaydaya əsasən, indiyə qədər investisiyanın həyata keçirildiyi iqtisadi fəaliyyət sahələri, investisiya layihəsinin həcmi ilə bağlı minimal məbləğ və həyata keçiriləcəyi inzibati ərazi vahidləri Nazirlər Kabineti tərəfindən müəyyən olunub. Dəyişikliyə əsasən, Nazirlər Kabinetinin bu sahədə səlahiyyəti ləğv olunub. Bu sahədə səlahiyyət Azərbaycan Prezidentinə məxsus olacaq.
Ümumilikdə ekspertlər bunu necə dəyərləndirir? İqtisadçı-ekspert Pərviz Heydərovun fikrincə, ötən il ölkə iqtisadiyyatına 20 milyard ABŞ dollarına yaxın sərmayə qoyulub: "Bunun təqribən 50 faizini xarici sərmayə təşkil edir. Nazirlər Kabinetinin 2015-ci ilin sosial-iqtisadi inkişafının yekunlarına və qarşıda duran vəzifələrə həsr olunmuş iclasında Prezident İlham Əliyev yekun nitqində vurğuladı ki, bu il biz xarici investisiyaları Azərbaycana daha böyük həcmdə cəlb etməliyik. Bu hazırda qlobal miqyasda yaranmış şəraitin tələbindən irəli gəlir. Hazırda dünya miqyasında xarici investisiyalar uğrunda ciddi mübarizə gedir. Azərbaycanda isə investisiyalar daha çox neft sektoruna qoyulub. Ancaq ölkədə qeyri-neft sektorunda da buna çox gözəl zəmin var. Son vaxtlar qeyri-neft sektoruna da daxili və xarici sərmayələrin qoyulması müşahidə edilir. Prezidentin qeyd etdiyi kimi, çalışmalıyıq ki, xüsusilə də qeyri-neft sektoru üzrə ölkəmizə daha çox xarici sərmayə cəlb edək. Söhbət o sahələrdən gedir ki, bunun inkişafı ixrac potensialımızı gücləndirsin və idxaldan asılılığı azaltsın. Fərman da bu məqsədlə verilib. İnvestisiyanın təşviq edilməsi sərmayə qoymaq istəyən sahibkarlar üçün daha əlverişli şərtlərlə fəaliyyət göstərmək imkanı verəcək. Ümumiyyətlə, investisiyaların təşviqi kənd təsərrüfatı, sənaye, xidmət sektoruna həm daxili, həm də xarici sərmayə cəlbini stimullaşdırmaq baxımından olduqca böyük əhəmiyyət kəsb edir. Bu güzəştlər sonradan bütövlükdə qeyri-neft sektorunun inkişafı ilə nəticələnəcəyindən, perspektivdə daxilolmaların artmasına şərait yaradacaq. Hazırda hökumətin iqtisadi kursu da məhz buna doğru istiqamət götürüb".
Vidadi ORDAHALLI
