"Neft hasilatçısı olan ölkələrin yüksək vəzifəli rəsmilərinin açıqlamaları da birjalara öz təsirini göstərəcək"
2017-ci ildə neftin 1 barrelinin qiyməti 50 dollar səviyyəsində olacaq. Bunu BP-nin prezidenti Robert Dadli deyib. "Hesab edirəm ki, neftin qiyməti balansı tapıb. Mənim proqnozuma əsasən, gələn il neftin 1 barrelinin qiyməti 50 dollar ətrafında olacaq", - deyə R.Dadli qeyd edib.
Dadlinin bu proqnozunu nə dərəcədə əsaslı saymaq olar?
Ekspert Günel Fərhadqızı qəzetimizə açıqlamasında bildirdi ki, yaxın gələcəkdə neftin qiymətinə təsir edəcək bir neçə amil var: "Azərbaycan iqtisadiyyatı üçün dünya bazarlarında neftin qiymətinin hansı səviyyədə olmasının strateji əhəmiyyət kəsb etdiyini nəzərə aldıqda, neft qiymətlərinin perspektivdə hansı dinamika ilə inkişaf edəcəyinin dəqiq proqnozlaşdırılması ölkə iqtisadiyyatı ilə bağlı idarəetmə qərarlarının qəbul edilməsi üçün son dərəcədə vacibdir. Hazırkı mövcud iqtisadi problemlərin bir hissəsi də iqtisadi blokun bu istiqamətdə son illərdə proqnozlaşdırma siyasətindəki nöqsanlarla bağlıdır. Bunları nəzərə alaraq, neft qiymətlərinin dünya bazarında gələcək dinamikasına təsir edən amillər təhlil edilməlidir. Fikrimcə, hazırda neftin qiymətinin formalaşdırılmasına təsir edən əsas amilləri bir neçə hissəyə qruplaşdırmaq olar.
Bu ilin əvvəlində yekun anlaşma olmasa da, hasilatın dondurulması ilə bağlı keçirilən ilk görüş nəticəsində neftin qiyməti dünya bazarında 30 faiz artdı. Hazırda bu məsələ yenidən gündəmə gəlib və neftin qiyməti 50 dollar ətrafında cərəyan edir. Yəni bu, birjalara informativ baxımdan müsbət təsir edir. Hesab edirəm ki, yaxın 1 aydan da artıq dövrdə neftin qiyməti 50-55 dollar diapazonunda dəyişəcək. Yəni neftin qiyməti artıma doğru gedəcək. Neft hasilatçısı olan ölkələrin yüksək vəzifəli rəsmilərinin açıqlamaları da bu mənada birjalara öz təsirini göstərəcək. Söhbət 50-55 civarında gözlənilən korreksiyalardan gedir. Ancaq bu o demək deyil ki, bazar iştirakçılarının əhval-ruhiyyəsini yaxşılaşdıracaq bir şərait yaranacaq. Güman etmirəm ki, Əlcəzairdə hasilatın dondurulması ilə bağlı yeni qərar olacaq. Çünki bazarda 50-dən yuxarı qiymət formalaşırsa, bu, indiki şəraitdə həm hasilatçılar, həm də istehlakçılar üçün komfortlu bir qiymətdir".
Məhəmmədəli QƏRİBLİ
