"Artıq biz bunu real iqtisadiyyatda müşahidə edirik"
"İnfrastruktur olmadan inkişafdan söhbət gedə bilməz. Elektrik enerjisi, yol, qaz, suvarma imkanları olmasa, heç bir rayon, heç bir kənd inkişaf edə bilməz. Ona görə biz infrastruktur layihələrinin icrasına xüsusi diqqət göstəririk, bu məqsədlər üçün artıq çox böyük dövlət vəsaiti xərclənib və bu proses davam etdirilir". Bu sözləri Salyan şəhərinə Şirvan-Muğan magistral kəmərindən çəkilmiş yeni içməli su xəttinin açılışı zamanı yerli ictimaiyyət nümayəndələri ilə görüşündə Prezident İlham Əliyev deyib.
Dövlət başçısı infrastruktur layihələrinə bundan sonra da investisiya qoyulacağını qeyd edib: "Yaxın vaxtlarda gələn ilin dövlət büdcəsi müzakirəyə çıxarılacaq. Mən artıq göstəriş vermişəm ki, dövlət büdcəmiz, əlbəttə, sosialyönümlü olmalıdır, bütün sosial proqramlar orada tam şəkildə əks etdiriləcək. Eyni zamanda, sərmayə üçün də kifayət qədər vəsait nəzərdə tutulmalıdır ki, biz bu işləri davam etdirək. Sosial infrastruktur, məktəb, xəstəxana binalarının, idman qurğularının tikintisi, yolların, elektrik, qaz, içməli su xətlərinin çəkilişi - bütün əsas şərtlər təmin edilir. Bununla paralel olaraq, hər bir rayon çalışmalıdır ki, ümumi işimizə daha da çox töhfə versin".
Göründüyü kimi, son illər neft gəlirlərinin azalmasına rəğmən, rayonlarda yol və digər infrastruktur sahələrinin yaradılmasına vəsait yönəldilir. Bütövlükdə görülən bu və digər işlər postneft iqtisadiyyatının yaradılmasında nə kimi rol oynayır? Sözügedən məsələni dəyərləndirən iqtisadçı-ekspert İldırım Qurbanovun fikrincə, bu, dayanıqlı inkişafı təmin etməklə yanaşı, qeyri-neft sektorunun formalaşmasına ciddi təkan verəcək: "Çünki son illər Azərbaycanda neft gəlirlərindən səmərəli istifadə edilməsi iqtisadiyyatın şaxələndirilməsinə və qeyri-neft sektorunun inkişafına səbəb olub. Artıq biz bunu real iqtisadiyyatda müşahidə edirik. Bu səbədən də Azərbaycanın qeyri-neft sektorunda ilbəil artım tempi özünü göstərir. Bu da ölkə iqtisadiyyatının şaxələndirilməsi istiqamətində həyata keçirilən məqsədyönlü tədbirlərin nəticəsidir. İqtisadiyyatın şaxələndirilməsi, bütün digər sahələr kimi, aqrar bölmənin də inkişaf etdirilməsi üçün əlverişli imkanlar yaradır. Bölgələrdə infrastrukturun qurulmasına yönəldilən vəsait nəticə etibarilə neftdən kənar iqtisadiyyatın qurulmasına, inkişafına öz təsirini göstərir. Bu zaman yerli və xarici sərmayədarlar rayonlara sərmayə qoymaqda maraqlı olur. Bu baxımdan görülən işlər həm də kənd təsərrüfatının inkişafına ciddi təkan verir. Sahibkarlar kənd təsərrüfatı məhsullarının emal müəssisələrini yaratmaqda maraqlı olur. Dövlət başçısı çıxışlarının birində vurğulayıb ki, ötən 2015-ci il "Kənd təsərrüfatı ili" kimi elan edilsə də, hər il kənd təsərrüfatı ili kimi qəbul olunmalıdır. Eyni zamanda, özünütəminat faktoru daim diqqətdə saxlanmalıdır".
Vidadi ORDAHALLI
