"Gələn gəlirlər imkan verəcək ki, daha çox vəsait real sektora yönəldilsin"
"Biz keçid mərhələsindəyik. SOCAR əldə etdiyi gəlirləri hazırda mühüm sənaye layihələrinə sərmayə qoyur. Başa çatandan sonra bu layihələr Azərbaycana milyardlarla əlavə gəlir gətirəcək". Bunu mətbuata müsahibəsində Azərbaycan Respublikası Dövlət Neft Şirkətinin (SOCAR) prezidenti Rövnəq Abdullayev bildirib.
O müsahibəsində bir sıra məqamlara toxunub: "SOCAR öz sərmayələrini əvvəldən müxtəlif sahələrə yönəldib. Hələ xam neftin qiyməti yüksək olduğu dövrdə biz investisiyalarımızı şaxələndirməyə qərar verdik. Onda neft şirkətləri əsasən neft hasilatına, hətta işlənməsi çox baha başa gələn yataqlara sərmayə qoymağa üstünlük verirdilər. Biz isə, formalaşdırılmış strategiyamıza uyğun olaraq, hasilatla yanaşı, həm də qaz və neftin emalı, nəqli və satışı üçün nəzərdə tutulan layihələrə sərmayələr qoyduq və bununla investisiya portfelimizi şaxələndirdik. Risqlərin azaldılması və səmərəliliyin artırılması üçün biz müxtəlif ölkələrin bazarlarına üz tutub yeni bazarları kəşf etməyə başladıq. Əsas layihələrimiz başa çatandan sonra hər kəs bu strategiyanın bəhrələrini görəcək, çünki bununla gəlirlərimizin sabitliyi və davamlılığı təmin olunacaq".
Daha sonra R.Abdullayev qeyd edib: "Türkiyə və digər strateji bazarları kəşf etmək üçün əldə etdiyimiz gəlirləri STAR zavodu, Petlim limanı və s. kimi nəhəng layihələrimizə sərmayə qoyuruq. Sözügedən layihələr başa çatandan sonra xalis mənfəətin artması labüddür, çünki onda bu layihələr artıq gəlir gətirməyə başlayacaq. Düzgün investisiya strategiyasının nəticəsidir ki, 2007-2015-ci illər arasında SOCAR-ın ümumi aktivlərinin dəyəri 9 milyard manatdan təqribən 40 milyard manata qədər artıb".
Ümumilikdə ekspertlər sözügedən layihələr başa çatdıqdan sonra Azərbaycana gələcək gəlirləri necə dəyərləndirir? Məsələyə münasibət bildirən ekspert Rəsul Cahangirlinin sözlərinə görə, bu, qoyulan investisiyanın sonrakı dövrlərdə ölkəyə gəlir gətirəcəyi reallığını özündə əks etdirir: "Reallıq ondan ibarətdir ki, SOCAR Türkiyədə, Gürcüstanda böyük və perspektivli sərmayə layihələrini həyata keçirir. İri zavodlar inşa edir. Həmin müəssisələr tam işə düşdükdən sonra gəlir gətirməyə başlayacaq. Bu da milyardlarla vəsaitin ölkəyə daxil olması deməkdir. Bunun fərqli və əhəmiyyətli tərəfi ondan ibarətdir ki, sözügedən gəlirlər dayanıqlı olacaq. Çünki istehsalı, emalı özündə ehtiva edir. Gələn gəlirlər imkan verəcək ki, daha çox vəsait real sektora yönəldilsin. Bu da, öz növbəsində, Azərbaycanın sabit və dayanıqlı inkişafını təmin edəcək".
Vidadi ORDAHALLI
