"Yerli istehsal zamanı lazım olan materiallar xaricdən gətirilsə belə, onların satış qiymətinin yüksəlməməsinə çalışırıq"
Xəbər verildiyi kimi, Azərbaycanda əksər siqaretlərin qiyməti yenidən artırılıb. Ümumilikdə siqaretlərin qiymətində 25-30 faiz artım müşahidə olunur.
"European Tobacco Baku" ASC (ETB)-nin İdarə Heyətinin sədri, millət vəkili Rüfət Quliyev məsələ ilə bağlı "Bakı-Xəbər"ə açıqlamasında qeyd etdi ki, "European Tobacco Baku" şirkəti siqaret satışı ilə məşğul olmur: "European Tobacco Baku" istehsalçı şirkətdir. Biz siqaretləri istehsal edib siqaret satışı ilə məşğul olan paylayıcı şirkətlərə veririk. Satış işi ilə həmin paylayıcı şirkətlər məşğul olur. Dəfələrlə qeyd etmişəm, bir daha sizin qəzetiniz vasitəsilə bildirmək istəyirəm ki, biz istehsalçıyıq".
R.Quliyevin sözlərinə görə, istehsal zamanı lazım olan materiallar xaricdən gətirilsə belə, onlar qiymət artımına getməməyə çalışır: "Amma tələb və təklifi nəzərə almaq lazımdır. İstehsal üçün lazım olan materiallar və ya məhsullar xaricdən idxal olunduğu üçün onlar xarici valyuta ilə alınır".
Həmsöhbətimiz söhbət əsnasında onu da diqqətə çatdırdı ki, ölkədə qeyri-neft sektorunu inkişaf etdirmək lazımdır: "Bu məsələyə ölkə başçısı İlham Əliyev də dəfələrlə öz çıxışlarında toxunub. İstehsal üçün xaricdən asılı olmadığımız sahələr var. O sahələrin inkişafına diqqəti artırmaq lazımdır".
"European Tobacco Baku" ASC (ETB) şirkətinin İdarə Heyətinin sədri sonda siqaretin insan sağlamlığı üçün zərərli olduğunu da dilə gətirdi.
Günel CƏLİLOVA
