“SOCAR Rusiya qazının alışı barədə danışıqlar aparmır
Transanadolu qaz kəməri layihəsi (TANAP) çərçivəsində işlər plana uyğun gedir. Trend-in məlumatına görə, bunu jurnalistlərə SOCAR-ın prezidenti Rövnəq Abdullayev deyib.
Onun sözlərinə görə, layihənin həyata keçirilməsi ilə bağlı heç bir problem yoxdur: "Biz qismən qrafiki də qabaqlamışıq və artıq 850 km borular qaynaq edilib".
R.Abdullayev əlavə edib ki, layihənin maliyyələşdirilməsi ilə bağlı da problem yoxdur və hökumət əlavə resursların cəlb edilməsi üzrə danışıqlar aparılır.
Qeyd edək ki, TANAP-ın cari dəyəri 9,3 milyard dollardır. TANAP Azərbaycanın "Şahdəniz" yatağından qazın Gürcüstan-Türkiyə sərhədindən Türkiyənin qərb sərhədinədək nəqlini nəzərdə tutur.
R.Abdullayev SOCARın- Rusiyanın "Qazprom" şirkəti ilə qaz alışı barədə danışıqlar aparmasına dair xəbərləri də təkzib edib. Onun sözlərinə görə, SOCAR artıq "Qazprom"a Rusiya qazının mümkün alışı ilə bağlı təkliflər göndərib, lakin hazırda bu barədə heç bir danışıqlar aparılmır.
Qeyd edək ki, bundan əvvəl "Qazprom Transqaz Mahaçqala" MMC-nin baş direktoru Aleksandr Astanin şirkətin Azərbaycana ildə 3-5 milyard kubmetr qaz tədarükü haqqında danışıqlar apardığını demişdi.
R.Abdullayev daha əvvəl bildirmişdi: "Qaz alışı Xəzərin Azərbaycan sektorundakı "Azəri-Çıraqlı-Günəşli" neft-qaz yataqlar blokunda laylara vurmaq üçün lazımdır, yəni neftin sabit hasilatını saxlamaq üçün lazımdır: "Qaz alışı bizə onun laylara vurulma həcmini artırmağa, eləcə də hazırda təqribən 3,5 milyard kubmetr tutumu olan qaz anbarlarının gücünü sınaqdan keçirməyə imkan verəcək, lakin onları nəzəri olaraq 5 milyard kubmetrədək genişləndirmək mümkündür".
"Yunanıstan hökuməti DESFA-nın özəlləşdirilməsi ilə bağlı keçirilən tender proseduruna zidd hərəkət edib". "APA-Economics" xəbər verir ki, bunu da SOCAR prezidenti Rövnəq Abdullayev deyib.
"Əvvəlcə danışılan qaydalar pozulub. Biz də Yunanıstan hökumətindən bunun əsaslandırılmasını gözləyirik. Dəyişilən qaydaya əsasən, DESFA-nın qiyməti iki dəfə aşağı enir. Əgər obyektin gəlirliliyi aşağı salınırsa, deməli, onun qiyməti də aşağı enməlidir. Biz bu məsələləri Yunanıstan hökuməti ilə danışıqlarda qaldırmışıq və danışıqlar davam edir", - deyə R. Abdullayev qeyd edib.
Onun sözlərinə görə, DESFA-da SOCAR-ın payını almaq istəyən İtaliyanın "Snam" şirkəti əqdin bağlanılmasına hazırdır: "İtalyan tərəfdaşımız bizimlə yanaşı danışıqlarda iştirak edir. Burada bir sıra problemlər var. Görünür, Avropada çox bacarıqlı olmaq da qəbul olunmur".
DESFA Yunanıstanın milli qazpaylayıcı sisteminin operatorudur. Bu şirkət Yunanıstanın hökuməti tərəfindən 2005-ci ildə DEPA dövlət korporasiyasının törəmə şirkəti kimi təsis edilib. DEPA qazı topdan alaraq, onu istehlakçılara paylaşdırır. 2013-cü il iyulun 31-də Yunanıstanın Dövlət Əmlakının İdarə Edilməsi Fondu (Hellenic Republic Asset Development Fund, HRADF) DESFA qazpaylayıcı şirkətinin 66%-lik səhm paketinin SOCAR tərəfindən 400 mln. avroya alınmasına dair sövdələşməni təqdir edib. 2013-cü ilin dekabr ayında SOCAR ilə Yunanıstanın Dövlət Özəlləşdirmə Fondu və “Hellenic Petroleum SA” şirkəti arasında Səhmlərin Alqı-Satqı Müqaviləsi" və "Səhmdarlar haqqında Müqavilə" imzalanıb.
SOCAR DESFA-nın səhmlərinin 31%-ni Yunanıstan hökumətindən, 35%-ni "Hellenic Petroleum SA" şirkətindən alır. DESFA üzərində nəzarətin SOCAR şirkətinə verilməsinə qədər Yunanıstan şirkətinin səhmlər paketinə HRADF tərəfindən nəzarət edilir.
DESFA-nın özəlləşdirilməsi prosesinin yubanmasının əsas səbəbi Avropa Komissiyasının Rəqabət üzrə Baş Direktorluğu tərəfindən SOCAR-a qazpaylayıcı operatorun nəzarət paketinin ötürülməsi üzrə apardığı araşdırmalardır. Antiinhisar prinsiplərinə əsaslanan Yunanıstan dövləti SOCAR–ın səhm payının 17%-ni üçüncü tərəfə satmağını təklif edir.
Üçüncü tərəfə satılması təklif olunan səhm paketini İtaliyanın "Snam" şirkəti almaq niyyətindədir.
