"Bu, proseslərin hansı istiqamətə doğru cərəyan etməsindən asılı olacaq"
Azərbaycanda avtomobil satışı ilə bağlı böhran rəsmi dilerləri qiymətləri aşağı salmağa məcbur edir. Belə ki, şirkətlər yeni modellər gətirmək istəsə də, amma stokda qalan avtomobilləri sata bilmirlər.
Yayılan məlumata görə, Çin brendi olan "Great Wall" avtomobilləri də ucuzlaşıb. "Great Wall Azerbaijan" şirkətindən verilən məlumata görə, 2014 və 2015-ci ilə aid modellərin qiyməti 30%-ə kimi endirilib. Məqsəd anbarda qalan avtomobillərin satışını canlandırmaqdır.
Məsələn, 2014-cü ildə istehsal edilən 1.5 l. mühərrikli kiçik krossover "Great Wall M2" 17 550 manatdan 16 min manata ucuzlaşıb. "Great Wall M4"ün qiyməti isə 1000 manat aşağı salınıb. Əvvəl 15 500 manata satılan avtomobilin yeni qiyməti 14 500 manatdır.
"Great Wall H3" avtomobillərinin qiyməti 8150 manat aşağı düşüb. Əvvəl 29150 manata satılan krossoveri indi 21 min manata da almaq olar. "H5"lər 3650 manat endirimlə müştərilərə təklif edilir. Avtomobilin qiyməti 34650 manatdan 31 min manata kimi aşağı salınıb.
Ən böyük qiymət fərqi isə "Great Wall H6" modelində müşahidə edilir. Bu modellər 10 840 manat ucuzlaşıb. 36 140 manatlıq avtomobil indi 25300 manata təklif edilir.
Ümumilikdə anbarlarda qalan avtomobillərin qiymətinin ucuzlaşması təzə avtomobillərin qiymətinə hansısa formada təsir edə bilərmi? Bütövlükdə bu, avtomobil bazarında ucuzlaşmaya gətirib çıxara bilərmi? Ekspert Azər Allahverənovun fikrincə, yeni istehsal olunmuş avtomobillərin qiymətində ucuzlaşma olarsa belə, bu, müvəqqəti xarakter daşıya bilər: "Hansısa avtomobil firması kampaniya keçirərək müəyyən müddət qiymətləri aşağı sala bilər. Tutaq ki, yay mövsümü ilə bağlı endirim edə bilər. Amma yeni istehsal olunmuş avtomobillərin qiymətində ucuzlaşma yoxdur. Çünki bu cür avtomobillər xarici valyuta ilə alınıb ölkəyə gətirilir. Ona görə valyutanın məzənnəsində hər hansı dəyişiklik baş verdikdə bu həmin avtomobillərin qiymətinə də öz təsirini göstərir. Qiymətlərin bundan sonra hansı istiqamətdə dəyişəcəyini bazarın öz qayda-qanunları müəyyən edir. Baş verən proseslərdən asılı olaraq fərqli istiqamətlərdə dəyişikliklər ola bilər. Bazarda qiymətlər əsasən tələb-təklifə görə dəyişə bilir. Təklif həcmi çox, tələb isə az olarsa, bu zaman avtomobil satışı həyata keçirənlər, öz avtomobilini satanlar, istər-istəməz, bir qədər də ucuz qiymətə satmağa meyllənir. Çünki ona avtomobili satmaq lazımdır. Bazar bir neçə amillə bağlıdır. Deyək ki, banklar bu gün avtomobil kreditləri vermir. Bir-iki aydan sonra banklar kredit verməyə başlasa, biz bazarda canlanma müşahidə edə bilərik. Baş verən proseslərdən dolayı qiymətlərdə düşmə davam edə də bilər, artım da ola bilər. Bu, proseslərin hansı istiqamətə doğru cərəyan etməsindən asılı olacaq".
Vidadi ORDAHALLI
