"İstirahət məkanlarını müəyyən müddət üçün vergidən azad etmək lazımdır, amma həmin məkanlarda ciddi monitorinq aparmaq şərtilə"
Xəbər verildiyi kimi, ölkə başçısı İlham Əliyev turizmin inkişafı ilə bağlı Sərəncam imzalayıb. Sərəncamda bir sıra məsələlər əksini tapıb. O cümlədən, Azərbaycandakı turizm və rekreasiya zonalarına vergi və gömrük güzəştlərinin və imtiyazların verilməsi nəzərdə tutulur.
Turizmin inkişafı ilə bağlı əlavə tədbirlər haqqında Sərəncamda aidiyyəti dövlət qurumlarına müvafiq tapşırıqlar verilib. Sənədə əsasən, Mədəniyyət və Turizm Nazirliyi İqtisadiyyat, Maliyyə, Vergilər nazirlikləri və Dövlət Gömrük Komitəsi ilə birlikdə turizm və rekreasiya zonalarında vergi və gömrük güzəştlərinin və imtiyazlarının verilməsi ilə bağlı təkliflərini hazırlayıb 3 ay müddətində Prezidentə təqdim edəcək.
Mədəniyyət və Turizm Nazirliyi yerli icra hakimiyyəti orqanları ilə birlikdə Azərbaycanın turizm potensialı olan ərazilərində dövlət-sahibkar tərəfdaşlığı əsasında turizm və rekreasiya zonalarının yaradılması barədə təkliflərini hazırlayıb 6 ay müddətində Nazirlər Kabinetinə təqdim etməlidir.
Ekspertlər hesab edir ki, turizm zonalarına vergi və gömrük güzəştlərinin tətbiqi bu sahənin inkişafına səbəb olacaq.
Turizm sahəsi üzrə ekspert Bahadur Bilalov "Bakı-Xəbər"ə açıqlamasında qeyd etdi ki, o dəfələrlə qəzetimizdə turizmin inkişafı üçün vergi güzəştlərinin tətbiq olunmasının vacibliyi barədə mövqeyini bildirib.
Həmsöhbətimizin sözlərinə görə, turizm məqsədilə ölkəyə hansısa avadanlıq gətirilir. Həmin avadanlığın gətirilməsində gömrük rüsumu üzrə güzəştlərin tətbiq olunması da bu sahənin inkişafna səbəb olacaq.
B.Bilalov regionlardan asılı olaraq vergi güzəştinin tətbiq olunmasını təklif edir. Onun fikrincə, turizm sürətlə inkişaf etməyən rayonda vergi güzəşti tətbiq etmək olar: "Zənnimcə, differensiallaşmış vergi sistemi tətbiq etmək lazımdır. Bu da turizmin inkişafına səbəb olacaq. Hansısa ərazidə turizm zonası yaradılırsa, orada vergi güzəşti tətbiq etmək lazımdır. Sizin qəzetinizdə də yeni yaradılan otel və ya istirahət mərkəzlərinin 5 il vergidən azad olunması ilə bağlı fikir bildirmişəm. İstirahət məkanlarını müəyyən müddət üçün vergidən azad etmək lazımdır. Amma vergidən azad olunan məkanlarda ciddi monitorinq aparmaq vacibdir. Mən sizə deyim ki, bu gün turizm obyektləri, otellər, eləcə də turizm şirkətləri düzgün statistika təqdim etmir. Yaxşı olar ki, vergidən azad olunan turizm obyektlərində ciddi monitorinq aparılsın. Məsələn, bir il müddətinə hansısa otel vergidən azad olunacaq. Həmin otelə bildiriləcək ki, monitorinq aparılacaq. Statistikanın düzgün aparılıb-aparılmaması yoxlanacaq. Müəyyən olunsa ki, bir gecədə 80 nəfər gecələyib, ancaq 10 nəfərin adı qeyd olunub, həmin otel ciddi şəkildə cərimələnəcək. Cərimənin də məbləği ilkin olaraq 2000 manat təyin oluna bilər. Belə olan halda, bütün turizm obyektləri düzgün statistika aparar".
Günel CƏLİLOVA
