"Vergi bəyannamələrinin verilməsinin sadələşdirilməsi imkan verəcək ki..."
Vergilər Nazirliyi "Gəlir vergisinin bəyannaməsi", "Mənfəət vergisinin bəyannaməsi", "Torpaq vergisinin bəyannaməsi", "Əmlak vergisinin bəyannaməsi" və onların tərtib edilmə qaydaları, "Dövlət rüsumunun tutulması haqqında hesabat"ın forması, "Dövlət rüsumunun tutulması haqqında hesabatın tərtib edilməsi qaydası", habelə "Sadələşdirilmiş verginin bəyannaməsi" və "Əlavə dəyər vergisinin bəyannaməsi"nə, "Xüsusi notariusun gəlir vergisi bəyannaməsinə", "Muzdlu işlə əlaqədar ödəmə mənbəyində tutulan vergi bəyannaməsi"nə əlavələr və onların tərtib edilmə qaydalarına dəyişiklikləri təsdiq edib. Nazirlikdən bununla bağlı mətbuata verilən məlumata görə, bu dəyişikliklər Azərbaycan Prezidenti İlham Əliyevin 4 avqust tarixli "2016-cı ildə vergi sahəsində aparılacaq islahatların istiqamətləri"nin təsdiqi və vergi inzibatçılığının təkmilləşdirilməsi haqqında" Sərəncamının tələbləri ilə bağlıdır.
Nazirlik hesab edir ki, sözügedən dəyişikliklər vergi inzibatçılığının daha da təkmilləşdirilməsinə və bəyannamə formalarının sadələşdirilməsinə, ölkə iqtisadiyyatının davamlı inkişaf tempinə uyğun olaraq real vergi potensialının düzgün müəyyənləşdirilməsinə bəyannamələr vasitəsilə əldə olunan məlumatların dəqiqləşdirilməsi hesabına vergi ödəyicilərində keçirilən nəzarət tədbirlərinin sayının azaldılmasına xidmət edəcək.
Sözügedən sənədlər Vergilər Nazirliyinin rəsmi internet səhifəsində yerləşdirilib. Ümumilikdə bu yeniliklər vergi ödəyicilərinin işini nə dərəcədə asanlaşdıracaq? Ekspertlərin buna münasibəti necədir? Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert İldırım Qurbanov buna bir neçə aspektdən yanaşdı: "İndiki iqtisadi vəziyyətdə vergi islahatları labüddür. O baxımdan görülən işlər islahatın tərkib hissəsidir. Məsələ ondadır ki, bunlar hamısı ölkə iqtisadiyyatının davamlı inkişafına öz təsirini göstərəcək. Bu ona imkan verəcək ki, ölkə iqtisadiyyatının potensialına uyğun real vergi ödəyiciləri müəyyən olunsun. Bu minvalla əldə olunacaq məlumatların dəqiqləşdirilməsi hesabına vergi ödəyicilərinə effektli nəzarət mexanizmi yaradılacaq. Digər tərəfdən, vergi ödəyiciləri bəyannaməni verərkən çətinliklə üzləşməyəcək. Vergi bəyannamələrinin verilməsinin sadələşdirilməsi imkan verəcək ki, vergi ödəyiciləri vaxtında və tez bəyannaməni versin. Bir sıra hallarda xüsusən sadələşdirilmiş vergi ödəyiciləri bunu ya bilmir, ya da qismən bilir. Nəticədə bəyannaməni səhv təqdim edirlər ki, bu da onlara sonra müəyyən problemlər yaradır. Hesab edirəm ki, bu sahədə işlərin sadələşdirilməsi onların xeyrinədir".
Vidadi ORDAHALLI
