"Assosiasiya istehsalçılarla hökumət arasında vasitəçi rolunu oynayacaq"
Avqustun 24-də Azərbaycanda İxracın və İnvestisiyaların Təşviqi Fondunda (AZPROMO) şərab istehsalı və satışı ilə məşğul olan yerli şirkətlərin nümayəndələri ilə görüş keçirilib. Görüşdə Azərbaycan istehsalı olan şərabın ixracının təşviqi üçün görülən işlər, eləcə də şərab istehsalı və satışı ilə məşğul olan şirkətlərin bu sahədə təklifləri müzakirə olunub.
AZPROMO rəhbərliyinin iştirakı ilə keçirilmiş görüşdə Şərabçılar Assosiasiyasının yaradılması qərara alınıb.
Maraqlıdır, Azərbaycanda Şərabçılar Assosiasiyasının yaradılması bu sahənin inkişafına necə təsir edəcək?
Aqrar sahə üzrə mütəxəssis Vahid Məhərrəmov "Bakı-Xəbər"ə açıqlamasında qeyd etdi ki, assosiasiyanın yaradılmasında məqsəd ölkədə şərabçılığın inkişaf etdirilməsidir. Şərabçılıqla bağlı qəbul edilən qanunlara bəzi dəyişikliklərin edilməsi, boşluqların aradan qaldırılması nəzərdə tutulur: "Həmçinin, şərabçılıq sahəsi ilə məşğul olan sahibkarlara dövlət dəstəyinin göstərilməsi də nəzərdə tutulur. Assosiasiyanın əsas işlərindən biri şərabçılıqla bağlı dövlət proqramı hazırlamaqdır. Lazım gələrsə, bu sahəyə subsidiyaların verilməsi də nəzərdə tutula bilər".
Həmsöhbətimizin sözlərinə görə, Şərabçılıq Assosiasiyası idxal və ixracla bağlı məsələləri gündəmə gətirə bilər. Assosiasiyanın görəcəyi işlərdən biri də adıçəkilən sahədə hər hansı bir problem qeydə alınarsa, həmin məsələni hökumətə çatdırmaqdır.
V.Məhərrəmov hesab edir ki, Şərabçılıq Assosiasiyası istehsalçılarla hökumət arasında vasitəçi rolunu oynayacaq.
Mütəxəssis bildirdi ki, assosiasiya öz işini layiqincə görərsə, istehsalçı, sahibkar, fermer, emalla məşğul olan sahibkarların işində müəyyən irəliləyiş əldə olunar.
Günel CƏLİLOVA
