"Banklar cəlbedici təkliflər səsləndirməklə guya yaxşı faizlərlə kredit verməsini piar etməyə çalışır"
Bankların əvvəlki imkanlarını itirdiyi hər kəsə məlumdur. Müştəri qıtlığı yaşayan banklar cəlbedici reklamlara üstünlük verir. Banklar öz saytlarında kreditlərlə bağlı müxtəlif cəlbedici təkliflər yerləşdirir.
Bu təkliflər daha çox müştəri cəlb etməyə hesablanıb. Ancaq əslində həmin təkliflər vətəndaşın xeyrinə deyil, bankların mövqeyinə xidmət edir. Bankların saytlarında kredit verilişi ilə bağlı qeyd edilən məlumatla tanış olan şəxs maddi ehtiyacını təmin edəcəyini düşünüb yollanır banka. Lakin orada o bankın saytında oxuduğu məlumatın və ya reklamın tam əksi ilə qarşılaşır.
Məsələ ilə bağlı fikir bildirən iqtisadçı-ekspert Oqtay Haqverdiyev bildirdi ki, cəlbedici reklamlarla çıxış edib reallıqda ondan əsər-əlamət olmayan banklar adətən problemli banklardır: "Fikir vermisinizsə, öz saytlarında cəlbedici təkliflərlə çıxış edənlər elə problemli banklardır. Cəlbedici təkliflər səsləndirməklə onlar guya yaxşı faizlərlə kredit verməsini piar etməyə çalışır. Amma faktiki olaraq kredit vermək xidmətilə dolğun şəkildə məşğul olmaq imkanları da yoxdur. Ya resursları, ya da valyutaları olmur.
Bununla belə, özlərini reklam etdirməyi də unutmurlar ki, yaddan çıxmasınlar. Həmçinin bu yolla Mərkəzi Banka da göstərmək istəyirlər ki, guya fəaliyyətlərini davam etdirirlər. Amma Mərkəzi Bank bankların hesabatına görə onların fəaliyyətinə qiymət verir. Görürsünüz ki, 4-5 bank artıq bağlanıb və proses davam edir".
Həmsöhbətimiz kredit götürmək istəyənlərə bank saytlarında yayılan piar məlumatlara inanmamağı tövsiyə etdi.
Günel CƏLİLOVA
