Meyvə-tərəvəz istehsalçılarının birləşməsi bazarımıza nə vəd edir?
Vahid Məhərrəmov: "Fermerlər istehsalla məşğul olmalı, digərləri də həmin məhsulun satışını həyata keçirməlidir"
"Assosiasiya işini bu yöndə qurmalıdır"
Azərbaycanda fəaliyyət göstərən qabaqcıl meyvə və tərəvəz istehsalçıları və ixracatçılarının təşəbbüsü, İqtisadiyyat Nazirliyi və Azərbaycan Sahibkarlar Konfederasiyasının (ASK) dəstəyi ilə Meyvə və Tərəvəz İstehsalçıları və İxracatçıları Assosiasiyası təsis olunub.
Bununla bağlı Quba-Xaçmaz Regional İnkişaf Mərkəzində tədbir keçirilib. Tədbirdə rəsmi şəxslərlə yanaşı, Azərbaycanın bütün iqtisadi rayonlarını təmsil edən 100-ə yaxın meyvə və tərəvəz istehsalı və ixracı ilə məşğul olan sahibkar iştirak edib.
Dövlət başçısının iqtisadi islahatlar paketi çərçivəsində həyata keçirilən tədbirlər barədə məlumat verən iqtisadiyyat nazirinin müavini Sahib Məmmədov qeyd edib ki, meyvə və tərəvəz istehsalı, ixracı ilə məşğul olan sahibkarların fəaliyyətini əlaqələndirmək, onlar arasında əməkdaşlığı genişləndirmək məqsədilə yaradılan assosiasiyanın fəaliyyəti meyvə-tərəvəz istehsalının artırılması, ölkənin ixrac imkanlarının genişləndirilməsi baxımından da əhəmiyyətli olacaq. Onun sözlərinə görə, nazirlik assosiasiyanın fəaliyyətinin təşkilinə lazımi dəstəyi göstərəcək.
ASK-nın vitse-prezidenti Vüqar Zeynalov son illər qeyri-neft sektorunun, xüsusilə də regionlarda kiçik və orta sahibkarlığın inkişafı istiqamətində genişmiqyaslı tədbirlərin, qabaqcıl beynəlxalq təcrübəyə uyğun müxtəlif layihələrin həyata keçirildiyini vurğulayıb. O, konfederasiyanın yeni yaradılan assosiasiya ilə yaxından əməkdaşlıq edəcəyini deyib.
Maraqlıdır, bəs ekspertlər belə bir qurumun yaradılmasını necə dəyərləndirir?
Məsələyə münasibət bildirən kənd təsərrüfatı sahəsi üzrə ekspert Vahid Məhərrəmov, prinsipcə, buna müsbət prizmadan yanaşdı. Onun fikrincə, digər işlər də kompleks şəkildə görülsə, assosiasiya effektiv fəaliyyət göstərə bilər: "Meyvə-tərəvəzlə bağlı kooperasiya yaradılmalıdır. Yəni istehsal, tədarük kooperasiyası yaradılmalıdır. Hər yaradılan kooperasiya öz işi ilə məşğul olmalıdır. İstehsalla məşğul olan istehsalla, tədarüklə məşğul olan tədarüklə məşğul olmalıdır.
Yoxsa, fermer həmi meyvə-tərəvəzi istehsal etsin, həm də ixrac etsin, bu mürəkkəb məsələdir.
Özü də digər ölkələrə ixrac etmək, bazarın strukturunu öyrənmək, oradakı şəbəkədə satışı həyata keçirmək olduqca mürəkkəb məsələdir.
Ona görə də konkret olaraq fermerlər istehsalla məşğul olmalı, digərləri də həmin məhsulun satışını həyata keçirməlidir.
Hesab edirəm ki, Meyvə və Tərəvəz İstehsalçıları və İxracatçıları Assosiasiyası işini bu yöndə qurmalıdır.
Belə olarsa, o zaman meyvə-tərəvəzin satışında problem olmaz. Məhsul xarab olub sahələrdə qalmaz. Belə ki, sözügedən problemlər üzündən hər il tonlarla meyvə zay olur".
Vidadi ORDAHALLI
