Bu ilin yanvar-iyun aylarında Azərbaycana xaricdən daxil olan pul baratlarının həcmi ötən ilin eyni dövrü ilə müqayisədə 22,5%, 2014-cü ilin ilk yarısına nisbətən isə 47,1% azalıb.
Bu barədə Azərbaycan Mərkəzi Bankının yarımillik pul siyasəti icmalında bildirilib. İcmala əsasən, 2016-cı ilin ilk 6 ayı ərzində ölkəyə xaricdən 423 mln. ABŞ dolları məbləğində pul köçürmələri olub. Bu rəqəm 2015-ci ilin ilk yarısında 546 mln. dollar, 2014-cü ilin ilk 6 ayında isə 799 mln. dollar təşkil edib.
Pul baratlarının azalması Azərbaycanla başlıca tərəfdaş ölkələrdə iqtisadi aktivliyin zəif olması ilə izah edilir.
Mövzu ilə bağlı iqtisadçı-ekspert Rəşad Həsənliyə müraciət etdik. O, «Bakı-Xəbər»ə açıqlamasında qeyd etdi ki, Azərbaycana pul kütləcinin azalmasının əsas səbəblərindən biri Rusiya ilə Ukrayna arasında münasibətlərin gərginləşməsidir: «2013-cü ilə qədər Azərbaycana daxil olan pul kütləsi miqrantların göndərdiyi vəsaitlə artım səviyyəsində idi. Ancaq növbəti ildən etibarən göndərilən pul kütləsi rüblük olaraq azalmağa başladı. Xatırladım ki, həmin dövr ərzində Rusiya və Ukrayna arasında münasibətlər gərginləşdi. Bəllidir ki, hər iki ölkədə kifayət qədər azərbaycanlı miqrant yaşayır. Adıçəkilən ölkələrin iqtisadiyyatında yaranan durğunluq miqrantların gəlirinə öz mənfi təsirini göstərdi və nəticədə ölkəyə göndərilən pul kütləsi azaldı».
Həmsöhbətimizin sözlərinə görə, göndərilən pul kütləsində azalma daha çox 2014-cü ilin son rübündə müşahidə olundu. Hadisələrə paralel olaraq dünya bazarında neftin qiymətinin düşməsi Rusiya iqtisadiyyatını çətin vəziyyətə saldı. O da bəllidir ki, həmin ərəfədə rubl da öz dəyərini kəskin itirirdi və Azərbaycan vətəndaşlarının əldə etdiyi gəlir sürətlə aşağı düşürdü: «Bizneslə məşğul olan soydaşlarımız hətta defolt həddinə belə çatdılar.
Daha sonra digər MDB ölkələrində də analoji vəziyyət yaşandı. Qazaxıstanda yaşayan soydaşlarımızın da ölkəyə göndərdiyi pul kütləsinin həcmində azalma yaşandı. Özbəkistan, Belarus, Qırğızıstan və digər MDB ölkələrində yaşayan soydaşlarımızın gəliri azaldı və bu hal ölkəyə göndərilən vəsaitdə də özünü göstərdi».
Günel CƏLİLOVA
