«2015-ci il ərzində dövlət büdcəsinə vergi daxilolmalarının ümumi məbləği 7 milyard 118,2 milyon manat, o cümlədən neft sektorundan daxilolma 2 milyard 89,9 milyon manat (29,4%), qeyri-neft sektorundan daxilolma 5 milyard 28,3 milyon manat (70,6%) təşkil edib».
Bu barədə Vergilər Nazirliyində təşkil edilmiş Kollegiya iclasında çıxışı zamanı vergilər naziri Fazil Məmmədov deyib. Nazirin sözlərinə görə, qeyri-neft sektorundan daxilolmalar artır: «2016-cı ilin ilk yarımilliyi ərzində bu göstəricilər müvafiq olaraq 3 milyard 190,1 milyon manat, o cümlədən qeyri-neft sektoru üzrə 2 milyard 495,4 milyon manat (78,2%) təşkil edib ki, bu da ötən ilin müvafiq hesabat dövrü ilə müqayisədə qeyri-neft sektorundan daxilolmaların 9,7% artdığını göstərir».
Bütövlükdə vergi daxilolmalarının 70 faizindən çoxunun qeyri-neft sektorunun payına düşməsi yaxşı göstəricidir. Azərbaycanın hazırkı inkişaf meylləri və qarşıdakı illərdə sosial-iqtisadi inkişaf göstəriciləri ilə bağlı proqnozlar iqtisadiyyatda əsas ağırlıq mərkəzinin qeyri-neft sektorunun üzərinə düşəcəyinə dair nikbin əsaslar yaradır. Son 10 ildə Azərbaycan iqtisadiyyatında qeyri-neft sektoru təxminən 3 dəfə artıb.
Ekspert Zakir Əhmədovun fikrincə, son illərdə qeyri-neft sektoru həm də investisiyaların qoyulması baxımından da ön plana çıxdığı üçün buradan daxilolmalar artıb: «Ölkə iqtisadiyyatına qoyulan investisiyanın böyük hissəsi qeyri-neft sektorunun payına düşür. Son illər vergi sisteminin təkmilləşdirilməsi və vergitutma bazasının genişləndirilməsi qeyri-neft sektorundan vergi daxilolmalarının həcminin əhəmiyyətli dərəcədə artmasına səbəb olub. Dövlətin vergi siyasətinin səmərəliliyinin müəyyən edilməsində vergitutma elementlərinin müəyyən edilməsi, vergi güzəştlərinin tətbiqi, vergi ödəyicilərinin üzərinə düşən vergi yükünün azaldılması və vergi inzibatçılığının həyata keçirilməsinin rolu böyükdür. Bununla yanaşı, hökumət qeyri-neft sektorunun inkişafı ilə bağlı strateji plan hazırlayıb və sənəddə adambaşına ÜDM-in artırılması, ÜDM-in strukturunda qeyri-neft sektorunun payının əhəmiyyətli dərəcədə yüksəldilməsi, adambaşına qeyri-neft ixracının artırılması kimi əsas hədəflər müəyyənləşdirilib. Bu hədəflərə çatmaq üçün iqtisadiyyatın rəqabət qabiliyyətinin artırılması və strukturunun təkmilləşdirilməsi ilə əlaqədar islahatlar həyata keçirilir. Bununla yanaşı, biznes mühitinin daha da yaxşılaşdırılması istiqamətində işlər görülür. Strateji planın əsas istiqamətlərindən biri də qeyri-neft sektorunun inkişafını stimullaşdırmaq, vergi daxilolmaları üzrə iqtisadi artıma nail olmaqdır. Bütün bu görülən işlər qeyri-neft sektorundan daxilolmaları artırır».
Vidadi ORDAHALLI
