Məlum olduğu kimi, Neftçala Sənaye Məhəlləsində Azərbaycanın «Azevrocar» MMC şirkətinin İranın «İran Khodro» şirkəti ilə birgə həyata keçirdiyi layihə çərçivəsində avtomobil istehsalı zavodunun təməli qoyulub.
Tədbirdə iqtisadiyyat naziri Şahin Mustafayev və ölkəmizdə səfərdə olan İran İslam Respublikasının sənaye, mədən və ticarət naziri Məhəmmədrza Nemətzadənin rəhbərlik etdiyi nümayəndə heyəti iştirak edib.
Nazirə və qonaqlara məlumat verilib ki, illik istehsal gücü 10 min ədəd avtomobil olacaq zavodda 300 yeni iş yerinin yaradılması nəzərdə tutulur. Qeyd edək ki, dəyəri 15 milyon dollar olan layihə üzrə müvafiq anlaşma memorandumları bu ilin aprelində imzalanıb. İran tərəfi ilə aparılmış müzakirələr nəticəsində bu vəsaitin 25 faizinin İran şirkəti tərəfindən veriləcəyi barədə razılıq əldə edilib. İnvestisiyanın 75 faizi isə Azərbaycan şirkəti tərəfindən yatırılacaq. Zavod 2018-ci ilə qədər istifadəyə veriləcək. Onu da əlavə edək ki, iyunda avtomobil zavoduna Neftçala Sənaye Məhəlləsinin iştirakçısı statusunu təsdiq edən şəhadətnamə verilib.
İqtisadiyyat naziri Şahin Mustafayev qeyd edib ki, Neftçalada təməli qoyulmuş avtomobil zavodu 10 hektar ərazidə tikiləcək.
Ümumilikdə iki ölkə arasında ilbəil genişlənən iqtisadi əlaqələr fonunda, birgə avtomobil istehsalı bu sahə üzrə sənayenin inkişafına stimul verəcək. Eyni zamanda ona imkan verəcək ki, avtomobil istehsalında daha təkmil texnologiyalardan istifadə edilsin. İki ölkə istehsalı olan avtomobillərin gələcəkdə Afrika və bir sıra Asiya ölkələrinə ixracını ekspertlər necə dəyərləndirir?
Məsələyə münasibət bildirən ekspert Rəsul Cahangirlinin sözlərinə görə, prinsipcə, bu mümkün və perspektivli razılaşmadır: «Tərəflər arasında razılaşma əldə olunub və avtomobil istehsal edəcək zavodun əsası qoyulub. Belə ki, sözügedən zavod 2018-ci ildə istismara veriləcək. Avtomobil istehsalında vacib olan məqamlardan biri də onun bazarını əldə etməkdir. Yəni təkcə avtomobil istehsalı ilə iş bitmir. İndi avtomobil ixracına görə dünya bazarında ciddi rəqabət var. Hər il bu sahədə vəziyyət dəyişir. Hesab edirəm ki, Azərbaycan-İran arasında birgə istehsal ediləcək avtomobillər üçün ən sərfəli bazar Afrika və bəzi Asiya ölkələridir. Fikrimcə, həmin avtomobilləri sözügedən ölkə bazarlarında realizə etmək daha real və mümkün görünür. Nəzərə almalıyıq ki, Afrika ölkələrinin böyük əksəriyyəti iqtisadi baxımdan geri qalıb. Onların elə imkanı yoxdur ki, Avropa ölkələri və Yaponiyanın istehsal etdiyi avtomobilləri alsın. Çünki sözügedən avtomobillərin dünya bazarında qiyməti kifayət qədər bahadır. Belə olan halda, ucuz avtomobillər almaq onlara sərfəlidir. O baxımdan həmin avtomobillər üçün Afrika mühüm bazar rolunda çıxış edə bilər.
Bu həm Afrika ölkələrinin iqtisadi inkişafına müsbət təsir edəcək, həm də avtomobillərin həmin bazarlarda realizəsinə öz təsirini göstərəcək. O üzdən, iki ölkə arasında birgə avtomobil zavodunun inşasını perspektivli hesab edirəm».
Vidadi ORDAHALLI
