«Azərbaycan xalqını qonaqpərvərliyinə görə təşəkkür edirəm. Son 3 ildə iki ölkənin əlaqələri sürətlə genişlənməkdədir. İkitərəfli əməkdaşlıqda biz yaxşı addımlar atmışıq». Bunu İran prezidenti Həsən Ruhani Azərbaycan və İran arasında sənədlərin imzalanması mərasimindən sonra mətbuata birgə bəyanatla çıxışında deyib.
Prezident Həsən Ruhani bildirib: «İki ölkə prezidentlərinin səfərlərində, habelə konfranslar çərçivəsində görüşlərimizdə hər dəfə bir addım önə çıxmışıq. İki ölkənin müştərək mədəniyyəti eyni tarixə, məzhəbə və dinə malikdir və uzun illər bir-birilə qonşuluq şəraitində qardaşcasına yaşayıblar. Bu gün də iki dövlətin və xalqın əlaqələrin genişləndirilməsinə olan meyli bütün sahələri əhatə edir. Bugünkü danışıqlarda gömrük rüsumlarının azaldılması və ticarətin inkişafı haqqında müzakirələr aparıldı. Birgə komissiyalar çalışmalıdır ki, iki ölkə arasındakı əsas məqsəd olan sərbəst ticarətin yaranması üçün zəmin yaratsınlar. İki ölkə arasında azad ticarətin yaradılmasına ümid edirik. Habelə Avrasiya İqtisadi Birliyi ölkələri arasında olan rüsumları ləğv etmişik. İstəyirik ki, Azərbaycanla da bənzər sazişlərə çata bilək».
İran prezidentinin vurğuladığı azad ticarət yaradılması mümkündürmü və bu bizim iqtisadiyyat üçün perspektivdə nələri vəd edir?
İqtisadçı Günel Fərhadqızı qəzetimizə açıqlamasında bildirdi ki, İranla Azərbaycan arasında bu istiqamətdə danışıqlar uzun müddətdir aparılır: «Bir müddət əvvəl Ənzəli azad ticarət-sənaye zonası ilə Azərbaycan arasında əməkdaşlığın genişlənməsi istiqamətində Azərbaycan Dövlət Gömrük Komitəsi ilə İranın Ənzəli azad ticarət-sənaye zonasının icraçı müdiri danışıqlar aparıb. Bu istiqamətdə keçirilən bütün görüşlərdə iki qonşu ölkə arasında siyasi, iqtisadi və mədəniyyət sahələrində əlaqələrin genişləndirilməsindən, İran və Azərbaycan arasındakı ikitərəfli əlaqələrin bütün sahələrdə inkişaf etməkdə olmasından və gömrük əməkdaşlığının yüksələn xətt üzrə inkişaf etməsindən razılıq ifadə olunub. Hesab edirəm ki, bu istiqamətdə münbit zəmin formalaşdırılıb.
Azad zonaların xeyirli tərəfi budur ki, fəaliyyət göstərən şirkətlər üçün güzəştlər nəzərdə tutulur. Azərbaycan şirkətlərinin Ənzəli azad ticarət-sənaye zonasında aktiv iştiraka malik olması vacib məsələdir. Bu görüşdə həmçinin İran-Azərbaycan əlaqələrinin hazırkı vəziyyəti, mövcud potensialı və perspektivi barədə də fikir mübadiləsi aparılıb. Hazırda İran prezidenti səviyyəsində bu məsələnin yenidən gündəmə gətirilməsi ümidləri bir qədər də artırır. İran böyük iqtisadi potensiala malik olan qonşu ölkədir. Azad ticarətin ölkələrimiz arasında yaradılmasının bizə yalnız xeyri dəyə bilər. İran da bu istiqamətdə bizim zəruri potensialımızdan yararlana bilər. Dünya praktikasından görünür ki, belə addımları atan ölkələrin heç biri zərər çəkməyib. Bir daha xatırladıram ki, ölkələrimiz arasında bu addımı atmaq üçün münbit iqtisadi və siyasi iradə ortaya qoyulub».
Məhəmmədəli QƏRİBLİ
