Pandemiya bir sıra ölkələrdə işsizlərin sayının daha çox artmasına təsir edib. Belə ki, pandemiyanın yaratdığı fəsadlar üzündən ötən il əksər ölkədə işsizlərin sayı kəskin şəkildə artıb.
Ancaq ötən il Azərbaycanda işsizlik səviyyəsi 2019-cu illə müqayisədə vur-tut 2,3 faiz artıb. Belə ki, 2020-ci ilin sonunda Azərbaycanda işsizlik səviyyəsi əvvəlki ilin göstəricisini 2,3 faiz keçərək 7,1 faiz təşkil edib. 2020-ci ildə 62,4 min yeni işçi qüvvəsi əmək bazarına daxil olub. Bu il yanvarın 1-nə olan məlumata görə, ölkədə işçilərin sayı 4 milyon 876,6 min nəfərə çatıb. Dövlət Statistika Komitəsinin verdiyi məlumata görə, ötən ilin müvafiq dövrü ilə müqayisədə iqtisadi fəal əhalinin sayı 1,11 faiz, məşğul əhalinin sayı isə 1,21 faiz artıb. 2020-ci il yanvar ayının 1-i vəziyyətinə məşğulluq xidməti orqanlarında qeydiyyata alınan işsiz şəxslərin sayı 81,3 min nəfər olub, onların da 37,7 faizini qadınlar təşkil edib. İşsizlikdən sığorta ödənişinin orta məbləği 276,4 manat təşkil edib.
Bütün bu deyilənlərin fonunda pandemiya şəraitində işsizliyin artım səviyyəsinin elə də böyük olmamasını ekspertlər necə dəyərləndirirlər?
“Sahibkarlara subsidiyalar, kompensasiyalar ödənildi ki, iş yerlərini ixtisar etməsinlər”
Məsələyə münasibət bildirən millət vəkili Aydın Hüseynov ötən il Azərbaycanda işsizliyin artım səviyyəsinin elə də yüksək olmamasını bir sıra amillərlə əlaqələndirdi: “Məlum olduğu kimi, koronavirus pandemiyası dünyadakı bütün ölkələrin iqtisadiyyatına öz təsirini göstərib. Bəzi ölkələr var ki, orada bunun fəsadları daha böyük və çoxşaxəlidir. O mənada ki, çoxsaylı iş yeri bağlanıb. Nəticədə işsizlər ordusunun sayı xeyli artıb. Bu da bəzi ölkələrdə sosial gərginliyin artmasına öz təsirini göstərib. Ötən il Azərbaycanda da işsizlərin sayında artım müşahidə edilib. Ancaq bizdə bunun artım səviyyəsi o qədər də böyük deyil. Bu da indiki şəraitdə müsbət haldır. Bu ondan irəli gəlir ki, pandemiya başlanan kimi Azərbaycanda kompleks tədbirlərin görülməsinə start verildi. Prezident İlham Əliyevin qərarı ilə tədbirlər planı hazırlandı. Tədbirlər planı çərçivəsində iqtisadiyyatın bir sıra sahələrini əhatə edən mükəmməl proqram ortaya qoyuldu. Sahibkarlara subsidiyalar, kompensasiyalar ödənildi ki, iş yerlərini ixtisar etməsinlər. Bunun nəticəsidir ki, ötən il bizdə həm iqtisadi azalma elə də böyük olmadı, həm də işsizliyin artım səviyyəsi aşağı oldu. Digər tərəfdən, maliyyə-bank sisteminin sağlamlaşdırılması, ölkə vətəndaşlarının sosial qayğılarının qarşılanması ümumi işə öz müsbət təsirini göstərdi”.
Millət vəkili hesab edir ki, bu il iqtisadi artım daha çox olacaq və nəticədə işsizliyin səviyyəsi bir qədər də aşağı düşəcək.
Vidadi ORDAHALLI
