Bu yaxınlarda Finlandiyada gənc güləşçilərin yarışından xoş xəbər aldıq. Uğurla çıxış edən komandamızın tərkibində təmsil olunan güləşçi qızlarımızdan Türkan Nəsirova növbəti dəfə müvəfəqiyyət qazanıb, çəkisi 48 kiloqramadək olan idmançıların yarışında gümüş medala sahib olub.
Qeyd edək ki, güləşçimiz DİN İdman Cəmiyyətinin Sumqayıt qurumunun yetirməsidir. Şəxsi məşqçisi Sumqayıt ŞPİ-nin Xüsusi Təyinatlı Taborunun əməkdaşı, polis serjantı Tural Əliyevdir. T.Əliyev özü bir qədər əvvəl ölkəmizdə keçirilən IV İslam Həmrəyliyi Oyunlarının gümüş mükafatçısıdır.
Dövlət Bədən Tərbiyəsi və İdman Akademiyasının tələbəsi olan T.Nəsirova ölkəmizin perspektivli güləşçilərindəndir. O, beynəlxalq miqyasda ilk uğurunu 2012-ci ildə Bakıda qazanıb. Həmin vaxt gənclərin dünya çempionatında finala qədər inamla irəliləyərək gümüş medala sahib olan güləşçimiz 2014-cü ildə Monteneqroda gənclərin Avropa çempionatında bürünc medal qazanıb. Bu uğurlar seriyasına növbətiləri əlavə olunub. Belə ki, o, həm yeniyetmə, həm də gənclər arasında dünya və Avropa çempionatlarının qızıl və bürünc medallarına sahib olub.
Zeyni HÜSEYNOV DİN mətbuat xidmətinin əməkdaşı
