Azərbaycanda, hər sahədə olduğu kimi, idmanın inkişafı ilə də bağlı kompleks tədbirlər görülür. Məhz bunun nəticəsidir ki, idmançılarımız Avropa, dünya çempionatlarında, Olimpiya və Paralimpiya Oyunlarında yüksək nəticələr göstərir. Bu yaxınlarda polisin yetirmələri növbəti dəfə ölkəmizdə və xaricdə keçirilən yarışlarda uğur qazanaraq qələbə ilə Vətənə dönüblər.
Belə ki, iyunun 27-29-da Almaniyanın Dortmund şəhərində sərbəst güləş üzrə gənclər arasında Avropa çempionatı keçirilib. Yarışda Azərbaycan millisi yüksək nəticə qazanıb. Ölkəmizin yığmasının tərkibində təmsil olunan DİN İdman Cəmiyyətinin yetirməsi Əli Rəhimzadə çəkisi 60 kiloqramadək olan idmançıların yarışında inamla çıxış edərək Rusiya, Gürcüstan, Ukrayna və Ermənistan idmançılarını üstələməklə qızıl medala sahib olub.
Təmsilçimizi bu yarışa İdman Cəmiyyətinin baş inspektoru, polis polkovnik-leytenantı İlham Mustafayev hazırlayıb.
***
İyunun 30-dan iyulun 2-dək Xorvatiyada gənclər arasında keçirilən karate üzrə dünya kuboku uğrunda yarışda ölkəmizin milli komandası uğurla çıxış edib. Millimizin tərkibində döyüşən DİN İdman Cəmiyyətinin yetirməsi Müseyib Məmmədov çəkisi 55 kiloqramadək olan idmançılar arasında əvvəlcə İsrail təmsilçisinə 5:0, daha sonra Ukrayna idmançısına 9:0, Türkiyə karateçisinə isə 3:1 hesabı ilə qalib gəlib. Yarımfinal görüşündə Rusiya idmançısına da qalib gələn M.Məmmədov xal itirmədən finala çıxıb. Həlledici görüşdə o, dünya və Avropa çempionu olan İspaniya idmançısı ilə qarşılaşaraq gümüş medal qazanıb.
Qeyd edək ki, təmsilçimizi bu yarışa İdman Cəmiyyətinin şöbə rəisi, polis polkovnik-leytenantı Elnur Həsənov hazırlayıb.
İyunun 29-30-da Sərhədçi İdman Kompleksində 23 yaşa qədər olan cüdoçular arasında respublika birinciliyi keçirilib. Bu yarışda da DİN İdman Cəmiyyətinin yetirmələri 1-i qızıl, 2-si bürünc olmaqla 3 medal qazanıblar.
90 kiloqram çəkidə olan idmançılar arasında birinciliyə Firudin Dadaşov sahiblənib. Çəkisi 100 kiloqramadək olan cüdoçular arasında yarışan Vüsal Həsənov, qızların yarışında 63 kiloqram çəkidə isə Sənubər Nəbiyeva bürünc medal qazanıblar.
Zeyni Hüseynov, DİN mətbuat xidmətinin əməkdaşı
