Çingiz Hüseynzadə: "İslam Həmrəyliyi Oyunları İslam ölkələri arasında həmrəyliyin olduğunu nümayiş etdirəcək"
Aqil Acalov: "Azərbaycanın bir türkdilli ölkə olaraq kifayət qədər zəhmət tələb edən məsuliyyətli vəzifənin öhdəsindən gəlməsi çox sevindirici haldır" Təranə Xudabaxşiyeva: "İslam Həmrəyliyi Oyunları idman aləminə peşəkar idmançılar verəcək"
Azərbaycan daha bir beynəlxalq tədbirə - İslam Həmrəyliyi Oyunlarına hazırlaşır. Sayca dördüncü olan bu oyunların keçiriləcəyi 10 gün ərzində bütün müsəlman aləminin gözü, diqqəti Bakıda olacaq. Tək müsəlman aləminin deyil, eyni zamanda, Avropa ölkələrinin də diqqəti Bakıda olacaq. Bütün dünya idman ictimaiyyəti Bakıda keçirilən İslam Həmrəyliyi Oyunlarını səbrsizliklə gözləyir.
IV İslam Həmrəyliyi Oyunlarının Azərbaycanda "İslam Həmrəyliyi İli"nə təsadüf etməsi də bu oyunların əhəmiyyətini daha da artırır.
Məlumat üçün qeyd edək ki, may ayının 12-dən 22-dək oyunların keçiriləcəyi bütün idman arenaları, kompleks və idman qurğuları tam hazır vəziyyətə gətirilib. İdman yarışlarında 21 idman növü üzrə 57 dövlətdən 3500 idmançının mübarizə aparacağı nəzərdə tutulub.
Maraqlıdır, IV İslam Həmrəyliyi Oyunları Azərbaycanın idman potensialının inkişafına nə kimi töhfələr verəcək?
Milli Olimpiya Komitəsinin vitse-prezidenti, İslam Həmrəyliyi İdman Federasiyasının vitse-prezidenti Çingiz Hüseynzadənin sözlərinə görə, son illər İslam Həmrəyliyi Oyunlarının nüfuzu həqiqətən çox yüksəlib və bunun əsas səbəblərindən biri bu yarışların növbəti dəfə məhz Bakıda keçirilməsidir: "İlk Avropa Oyunları zamanı Bakı bütün dünyanın diqqətini özünə cəlb etdi, yarışları çox yüksək səviyyədə keçirdi. Avropa Oyunlarından sonra İslam Həmrəyliyi Oyunlarının təşkili Avropa üçün çox maraqlıdır. Onlar İslamiadanın da Avropa Oyunları səviyyəsində keçiriləcəyinə əmin olduqları üçün, bu yarışlara da maraq böyükdür. Bilirsiniz ki, İslam ölkələri əsasən dünyanın 4 qitəsini əhatə edir və bu baxımdan dünyada bu oyunlar xüsusi əhəmiyyət kəsb edir. Maraq hətta o dərəcədə böyükdür ki, son illərdə Beynəlxalq Olimpiya Komitəsi tərəfindən yaradılmış Olimpiya internet televiziya kanalı İslam Oyunlarını işıqlandırmaq qərarına gəlib və artıq danışıqlar gedir. Əminliklə deyə bilərik ki, Bakıda baş verəcək hadisələr BOK-un Olimpiya kanalı vasitəsilə bütün dünyanın idmansevərlərinə təqdim ediləcək.
İslam Oyunlarının böyük əhəmiyyət kəsb etməsini göstərən cəhətlərdən biri də budur ki, son illərdə İslam dünyasında müharibələr gedir, radikal qruplaşmalar fəallaşıb, eləcə də terrorizmi islamla əlaqələndirmək cəhdləri çoxalıb. İslam Həmrəyliyi Oyunları bütün bunlara cavab olaraq İslam ölkələri arasında həmrəyliyin olduğunu nümayiş etdirəcək, islam dininin heç də aqressiv din olmadığını, sülh və insanların əmin-amanlığına yönəldiyini bir daha sübut edəcək".
Azərbaycan Alpaqut Federasiyasının prezidenti Aqil Acalov bizimlə söhbətində qeyd etdi ki, Azərbaycan İslam dünyasında stabil, tolerant və inkişaf etmiş ölkələrdən biri sayılır: "Azərbaycan stabil inkişafı ilə seçilir. İslam Həmrəyliyi Oyunları nəinki Azərbaycan və Avropa idman aləmində, eləcə də bütün Türk dünyasında əlamətdar hadisə sayılır. Azərbaycanın bir türkdilli ölkə olaraq kifayət qədər zəhmət tələb edən məsuliyyətli vəzifənin öhdəsindən gəlməsi çox sevindirici haldır. Bundan yalnız qürur duyuruq".
Taekvando üzrə milli hakim Təranə Xudabaxşiyeva qəzetimizə açıqlamasında bildirdi ki, İslam Həmrəyliyi Oyunları idman aləminə peşəkar idmançılar verəcək: "Bu idmançılarımız artıq tək Avropada yox, İslam dövlətlərində də tanınacaq. İdmançıların qazandıqları medallardan aldıqları motivasiya onları gələcək oyunlarda qələbəyə aparacaq".
Günel CƏLİLOVA
