Bakıda keçiriləcək IV İslam Həmrəyliyi Oyunlarında iştirak etməklə bağlı maliyyə çətinlikləri olan müsəlman ölkələrinə İslam Həmrəyliyi İdman Federasiyası köməklik göstərə bilər. Trend-in məlumatına görə, bunu jurnalistlərə Azərbaycanın gənclər və idman naziri Azad Rəhimov deyib.
A.Rəhimov qeyd edib ki, İslam Həmrəyliyi İdman Federasiyası maliyyə çətinlikləri olan müsəlman ölkələrinin nəqliyyat xərclərinin ödənilməsinə dəstək göstərməyə hazırdır: “Hansı ölkələrdəki problemlər var, o ölkədən olan idmançıların sayı müəyyənləşdirilir. Gündəlik qalmaq və qida xərcləri üçün 50 dollar ödənilməsi nəzərdə tutulur. İnanıram ki, biz burada da güzəşt edə bilərik”.
A.Rəhimov deyib ki, Bakıda keçiriləcək IV İslam Həmrəyliyi Oyunlarının açılış mərasimində dünya və ya yerli ulduzların iştirak etməsi nəzərdə tutulmur. A.Rəhimov bildirib ki, açılış proqramı möhtəşəm bir şou olacaq: “Lakin açılışın proqramı elədir ki, orada mahnı oxumaq nəzərdə tutulmayıb. Ancaq bağlanış mərasimində yerli ulduzlar bizə dəstək verə bilərlər. İnanıram ki, açılış mərasimi hər kəsin çox xoşuna gələcək”.
Gənclər və idman naziri Birinci Avropa Oyunlarının açılışında iştirak edən dünya ulduzu Ledi Qaqaya bir milyon dollar verilməsi barədə yayılan məlumatlara da aydınlıq gətirib.
A.Rəhimov bildirib ki, Top-10-luqda olan dünya ulduzlarının müqavilədə göstərilən qiymətləri adətən açıqlanmır: “Dünya ulduzları müxtəlif tədbirlər üçün müxtəlif qiymətlərə razılaşa bilirlər. Səhv etmirəmsə, bu ulduzların böyük tədbirlər üçün qiyməti bir milyon dollara qədərdir. Ancaq Azərbaycana gəlincə, Ledi Qaqaya verilən qonorarın məbləğini açıqlaya bilmərəm, bu, kommersiya sirridir”.
Bu arada, BP şirkəti və Bakı-2017 İslam Həmrəyliyi Oyunlarının Əməliyyat Komitəsi tərəfdaşlıq haqqında saziş imzalayıblar. Bu tərəfdaşlıq BP-nin Azərbaycanda idmanın inkişafına dəstək üzrə öhdəliyinin bir hissəsidir və şirkətin London-2012 Yay Olimpiya Oyunları və Bakı-2015 Avropa Oyunlarında uğurlu təcrübəsi və əməkdaşlığına əsaslanır.
Sazişi Azərbaycan gənclər və idman naziri, İslam Həmrəylik Oyunları Əməliyyat Komitəsinin baş icraçı direktoru Azad Rəhimov və BP-nin Azərbaycan, Gürcüstan və Türkiyə üzrə regional prezidenti Qordon Birrell imzalayıb.
A.Rəhimov bildirib ki, BP ilə əməkdaşlıq sazişinin imzalanması çox sevindirici haldır: “Bu bizim ilk sponsor müqaviləmizdir. Müqavilə BP şirkəti ilə imzalanır. BP Azərbaycanda fəaliyyət göstərdiyi dövrdə Azərbaycanda bir çox layihələr həyata keçirib”.
A.Rəhimov xatırladıb ki, 2017-ci il Azərbaycanda Prezident İlham Əliyev tərəfindən “İslam Həmrəylik İli” elan edilib: “Bu baxımdan İslam Hərməylik Oyunları bu ilin ən böyük tədbiridir. Biz buna çox ciddi hazırlaşırıq. Biz istəyirik ki, bu, dünyada böyük bir bayrama çevrilsin və bütün dünyaya islam dostluğunu çatdıra bilsın. İnanırıq ki, bu yarışma uğurla və yüksək səviyyədə baş tutacaq. BP şirkətinə də təşşəkürümüzü bildiririk ki, bu oyunlara dəstəyini göstərir”.
Q.Birrell isə bildrib ki, İslam Həmrəylik Oyunları mühüm əhəmiyyət kəsb edir: “2017-ci il bizim üçün əlamətdar bir ildir. Biz Azərbaycan hökuməti və xalqı ilə tərəfdaşlığımızın 25 illiyini qeyd edirik. 25 illiyimizin qeyd olunması çərçivəsində biz Bakı 2017 İslam Həmrəylik Oyunlarının rəsmi tərəfdaşı oluruq və eləcə də Milli Olimpiya və Paralimpiya komitələri ilə olan tərəfdaşlıq sazişimizin müddətini 2020-ci ilə qədər uzatmaqla onlara dəstəyimizi gücləndirəcəyik”.
BP 6 min gəncin cəlb olunacağı Bakı-2017 könüllülük proqramına da dəstək göstərir.
Qeyd edək ki, IV İslam Həmrəyliyi Oyunları mayın 12-dən 22-dək Bakıda keçiriləcək.
