“Manat xarici turistlər üçün dollar və ya avro ekvivalentində daha cəlbedici görünür, bu səbəbdən hesab edirəm ki, onlara Azərbaycana gəlmək daha sərfəlidir”
Azərbaycanda turizmin müxtəlif növləri inkişaf etdirilməkdədir. İnsanları daha çox maraqlandıran turizm istiqamətlərindən biri də çimərlik turizmidir. Çimərlik turizmi perspektivli sahədir. Çünki bu turizm növü həm istirahət vəd edir, həm də sağlamlıq.
Azərbaycanın çimərlik turizminə yerli vətəndaşlarla yanaşı, əcnəbilər də maraq göstərirlər. Aparılan araşdırmalara əsasən, onlar Azərbaycanın çimərlik turizminə daha çox meyl göstərirlər.
Belə ki, ruslar arasında keçirilmiş sorğu nəticəsində məlum olub ki, Azərbaycan onlar üçün Abxaziyadan sonra ikinci ən ucuz çimərlik turizmi məkanı sayılır. Rusiya mətbuatının məlumatına əsasən, Azərbaycanda 2 həftə çimərlik turizmi xidmətindən istifadə etmək orta hesabla 1609 ABŞ dollarına başa gəlir. Bu məbləğə aviabilet, qalmaq xərcləri daxildir. Məlumat üçün bildirək ki, reytinq cədvəlində üçüncü yerdə isə Vyetnam qərarlaşıb.
Onu da qeyd edək ki, rusiyalı turistlər tək Azərbaycanın çimərlik turizminə deyil, turizmin bir sıra sahələrinə maraq göstərirlər. Bu ölkənin vətəndaşları Azərbaycanın turizm imkanlarından yararlanmağa çalışırlar.
Turizm sahəsi üzrə ekspert Bahadur Bilalov “Bakı-Xəbər”ə açıqlamasında qeyd etdi ki, manatın məzənnəsinin xarici valyutaya nisbətən dəyişməsi ölkəyə gələn turistlərin sayına təsir edib: “Devalvasiya sayəsində istirahət üçün Azərbaycanı seçən turistlərin sayı artıb. Qeyd edim ki, manatın məzənnəsi stabil olaraq qalır, ancaq dollar və ya avronun dəyəri mütəmadi olaraq dəyişir. Manat xarici turistlər üçün dollar və ya avro ekvivalentində daha cəlbedici görünür. Bu səbəbdən hesab edirəm ki, onlar üçün Azərbaycana gəlmək daha sərfəlidir”.
Həmsöhbətimizin sözlərinə görə, rusiyalı turistlərin daha çox Azərbaycan çimərlik turizminə üstünlük verməsinin müəyyən səbəblər var: “İlk növbədə bildirim ki, Türkiyədə olan rus Azərbaycana gələndə qiymət fərqini hiss edir. Onlar Türkiyədə xərclədikləri vəsaitdən daha az məbləği Azərbaycanda sərf edirlər. Bu səbəbdən də ruslar ölkəmizə üstünlük verirlər. Həmçinin, məsafənin qısa olması Rusiya vətəndaşlarının ölkəmizi seçməsinə səbəb olur. Rus turistlərinin yola sərf etdikləri vəsait və çimərliklərdə xərclədiklərini toplayanda bu onlar üçün daha cəlbedici görünür”.
Günel CƏLİLOVA
