“Bu, ölkəyə daha çox turistin gəlməsinə və turizm sektorunun böyük gəlirlər əldə etməsinə gətirib çıxaracaq”
Məlum olduğu kimi, Azərbaycanda əcnəbilərin və vətəndaşlığı olmayan şəxslərin qeydiyyatı sadələşdirilib. Belə ki, əcnəbilərin və vətəndaşlığı olmayan şəxslərin Azərbaycanda olduğu yer üzrə qeydiyyata alınmasının “ASAN xidmət” mərkəzlərində həyata keçirilməsi ilə əlaqədar Dövlət Miqrasiya Xidməti ilə Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi arasında Anlaşma Memorandumu imzalanıb.
Bunun sayəsində artıq əcnəbilər və vətəndaşlığı olmayan şəxslərin olduğu yer üzrə qeydiyyatı Dövlət Miqrasiya Xidmətinin (DMX) regional miqrasiya idarələri ilə paralel olaraq Bakı və Sumqayıt şəhərlərində fəaliyyət göstərən “ASAN xidmət” mərkəzlərində də həyata keçiriləcək. Memoranduma əsasən, Dövlət Miqrasiya Xidməti ölkədə 10 gündən artıq müvəqqəti olan əcnəbilərin və ya vətəndaşlığı olmayan şəxslərin olduğu yer üzrə qeydiyyata alınması ilə bağlı müraciətlərin “ASAN xidmət” mərkəzlərində qəbulunun həyata keçirilməsini təmin etmək, Vətəndaşlara Xidmət və Sosial İnnovasiyalar üzrə Dövlət Agentliyi isə nəzərdə tutulan xidmətin innovasiyaların tətbiqi və yüksək standartlar əsasında həyata keçirilməsi üçün əlverişli şərait yaratmaq öhdəliyini götürüblər. Bununla olduğu yer üzrə qeydiyyat prosesində şəffaflıq, rahatlıq təmin ediləcək, mümkün növbələrin qarşısı alınacaq, xidmətdən istifadə məmnunluğu artacaq və şəxslərin müraciət imkanları genişlənəcək.
Dövlət Miqrasiya Xidmətinin Vətəndaşlara Xidmət və Sosial İnnovasiyalar üzrə Dövlət Agentliyi ilə əməkdaşlığı çərçivəsində əcnəbilər və vətəndaşlığı olmayan şəxslərin olduğu yer üzrə qeydiyyatı “ASAN xidmət” mərkəzlərində rəhbər tutulan fəaliyyət prinsipləri və şəffaflıq standartlarına uyğun aparılacaq. Əcnəbilərin və vətəndaşlığı olmayan şəxslərin olduğu yer üzrə qeydiyyata alınması üçün dövlət rüsumu ödənilmir.
Görünən odur ki, sözügedən yenilik sayəsində əcnəbilərin və vətəndaşlığı olmayan şəxslərin qeydiyyata alınması əhəmiyyətli dərəcədə sadələşdirilib. Ümumilikdə, bunun nə kimi əhəmiyyəti var?
Məsələyə münasibət bildirən ekspert Rəsul Cahangirlinin sözlərinə görə, qeydiyyatın sadələşdirilməsinin bir sıra əhəmiyyəti və faydası var: “Əvvəla bunun sayəsində xarici vətəndaşlara vizaların verilməsi xeyli asanlaşacaq. Əvvəllər sözügedən proseslər o qədər də asan deyildi. Bu da müəyyən qədər bəzi xoşagəlməz halların ortaya çıxmasına şərait yaradırdı. Prosesin sadələşdirilməsi bir sıra nöqteyi-nəzərdən ümumi işin xeyrinədir. Bunun sayəsində xarici vətəndaşların ölkəyə inam və etimadı daha da artacaq. Ən başlıcası isə, bu, ölkəyə gələn turistlərin sayının daha da artmasına ciddi təkan verəcək. Burda əsas məqsəd həmin ölkələrdən Azərbaycana gələn insanların daha sadələşdirilmiş şəkildə vizalar əldə edib ölkə ərazisinə daxil olmasını təmin etməkdir. İstənilən ölkəyə gedən turistlər həmin ölkəyə viza almaq imkanları ilə bağlı müəyyən araşdırmalar aparırlar və bu zaman bəzi çətinliklərin olacağını müşahidə etdikdə həmin ölkəyə getməkdən imtina edirlər. Yəni bəzən belə hallar da olur. Bu baxımdan sözügedən qərar ölkəyə daha çox turistin gəlməsinə və turizm sektorunun böyük gəlirlər əldə etməsinə gətirib çıxaracaq. Ona görə də bunun çox böyük əhəmiyyəti var. Belə bir mükəmməl sistemin yaradılması xaricdə Azərbaycanın imicinin müsbət mənada tanınması baxımından da özünəməxsus əhəmiyyətə malikdir. Bu, şərait yaradacaq ki, bir sıra ixtisaslı işçilər xaricdən rahat şəkildə Azərbaycana işləməyə gəlsinlər. Bəzən elə olur ki, müəyyən sahələrdə ixtisaslı işçilərə ehtiyac yaranır. Belə olan halda, əlbəttə ki, onların daha rahat şəkildə ölkəyə gəlməsinə şərait yaranacaq. Ona görə də hesab edirəm ki, belə bir qərarın verilməsi tamamilə düzgündür”.
Vidadi ORDAHALLI
