Radikal müxalif düşərgədə yer alanların, ölkə daxili və xaricində olmasından asılı omayaraq, maliyyə mənbələrinin əsas etibarı ilə qrantlardan formalaşdığı heç kimə sirr deyil. Amma verilən qrantlar və ayrılan digər pullar tərəflərdən birinə az, yaxud çox gedəndə qarşı tərəf sözün əsl mənasında mərəkə qoparır. Bu zaman da onlar həm bir-birinə qarşı kin-küdurətlərini açıq şəkildə meydana qoyur, həm də bir-birrini kimlərəsə işləməkdə günahlandırırlar. Mövqelərini ifadə etmək üçün isə sosial şəbəkələr onlar üçün əsas savaş meydanı sayılır.
Son proseslər fonunda qeyd edilənlərin real təsdiqini bəzi müxaliflərin biri-birinə qarşı sosial şəbəkələrdə paylaşmaları fonunda daha aydın görmək mümkündür. Budəfəki qalmaqalın mərkəzində xaricdə Azərbaycan əleyhinə aparılan kampaniyaların əsas fiqurlarından olan Emin Milli, digər cinahda isə radikal müxalifətin lideri sayılan Əli Kərimli və ona bağlı olanlar dayanır. Qeyd edək ki, sosial şəbəkələrdə bir-birinə qarşılıqlı tənqidlər və təhqirlər yağdıran radikalların davasına Emin Millinin çıxışı səbəb olub. Belə ki, mayın 9-da Amerika Konqresinin Helsinki Komissiyasının keçirdiyi brifinqdə özünü “Meydan TV”nin rəhbəri kimi təqdim edən Emin Milli Əli Kərimlinin partiyasını hədəf alaraq AXCP-nin marginallaşdığını, cəbhəçilərin heç bir işə yaramayan faydasız varlıqlar olduğunu deyib. Elə müsavatçılar və realçılar barədə də sərt çıxışlar səsləndirib. Emin Milliyə yaxın olanlar da onun mövqeyini dəstəkləyib. Elə bundan sonra Əli Kərimlinin tərəfdarları hücuma keçib. Bura Milli Şuranın sədri Cəmil Həsənli də daxil olub. O, “Meydan TV”ni bu dəfə obyektiv olmamaqda suçlayıb. Belə məsələlərdə geri qalmayan Xədicə İsmayıl Emin Milliyə qarşı olaraq cəbhəçiləri müdafiə edib. O, bu xüsusda yazıb: “Marginal sözünü Emin Milli yox, Audrey Alştadt deyibmiş. Hərçənd, kimin deməsindən asılı olmayaraq, həqiqətdir. İndi iki gündür Emini mütəşəkkil hücuma məruz qoyan cəbhəçilər yazdıqları təhqirlərə görə üzr istəyəcəkmi? Bu arada, Cəmil Həsənli də ilk ittiham yazanlardan biri olub. Səadət Cahangir, İradə Nəriman, iki gündür adamı atəşə tutmusuz, postlarınızın altında xeyli təhqir yazılıb. Məsuliyyətli siyasətçilər, aktivistlər nə edər belə durumda”? Yayılan məlumatlara görə, Emin Milli Orduxan Teymurxan və Cəmil Həsənlinin iştirak etdiyi canlı yayımda bu məsələni müzakirə etmək istəyib. Ancaq Cəmil Həsənli söhbətdən yayınıb. E.Milli canlı yayımda bildirib: “Təəssüf edirəm ki, bu məsələnin müzakirəsi üçün Cəmil Həsənli canlı yayım təklifimizi qəbul etmədi. Yenə də qaçdılar. Debata gəlmədilər. Canlı yayıma çıxmaqdan çəkinirlər. Onlar bu məsələlərin müzakirəsidən qorxmamalıdırlar. O zaman niyə bunu dediyimi, nədən narazı olduqlarını aydınlaşdırardıq. Amma onlar bundan imtina ediblər və canlı cavabımı eşitmək istəməyiblər”. Çıxışının davamında E.Milli xalqın marginallaşmış müxalifətdən imtina etdiyini iddia edib və Əli Kərimli, İsa Qəmbər, Arif Hacılını aşağılayaraq, onları söyüşü həyat tərzi seçən Orduxan adlı küçə “uşağı” ilə müqayisə edib: “Orduxanın videolarına həftədə milyonlarla insan baxır. Təkbaşına. Amma bunu müxalifət – İsa Qəmbər, Arif Hacılı, Əli Kərimli, Cəmil Həsənli haqqında deyə bilərsiniz? Yox. Onlar daha cəsarətli olmalıdırlar. Müxalifət mitinqlər keçirir. Bunlar öz bəhrəsini vermir. İnsanlar gəlmir. Mitinqlərin sayı artdıqca, ora gələnlərin sayı azalır. O zaman nə üçün keçirilir? Əli Kərimli daha radikal olmalıdır. Qorxurlar. İcazəsiz aksiyalar olanda niyə özü gəlmirdi? İnsanları meydana çağırıb özünün gəlməməsini necə qəbul etmək olar? Yəni taktikaları effekt vermir. Bunu dəyişmək lazımdır. Tənqidi qəbul etmirlər və bundan nəticə çıxarmırlar”. Orduxan Teymurxan isə AXCP-nin marginallaşdığını təkrarlayıb və özünü cəbhəçilərin “lideri"ndən üstün tutub.
Hazırda yazılan statuslardan məlum olur ki, Emin Milli rəhbəri olduğu "Meydan TV"də Əli Kərimli və Cəmil Həsənlinin çıxışlarına qadağa qoyub. "Meydan"ın işçiləri Həsənlinin üstünə tökülüşərək ondan sübut tələb ediblər. Emin Millinin Orxan Məmməd adlı işçisi C.Həsənlinin yalan danışdığını deyib, hətta onu təhqir etməkdən belə çəkinməyib: “Bunu demək ən azı sizin üçün ayıb olmalıdır, Cəmil bəy. Axı bu boyda komandanın haqqını tapdalamaq olmaz...Yəqin ki, Cəmil bəy sadəcə çox yorulub, yoxsa qocaman tarixçidə bu qədər aqressiya normal deyil”.
C.Həsənli öz növbəsində, "Orxan Məmməd, özünə ayıb olsun" deyə statusunda qeyd edib: “Orxan Məmməd bəy bizə qarşı bir yazı paylaşmışdı və aramızda kifayət qədər yaş fərqi olmasına baxmayaraq, yazısında təhqir elementləri var idi. Mən ona bundan çəkinməyi məsləhət etdim və xatırlatdım ki, ayıb belə şeyləri demək deyil, ayıb tərəfsiz, qərəzsiz, obyektivliyə iddialı bir mediya qurumunda Milli Şura və Xalq Cəbhəsi rəhbərliyinin proqramlara çağırılmaması haqqında aparıcılara göstərişlər verməkdir. Orxan bəy bildirdi ki, "bu ittihamdır, sübut gərəkdirir, sübut olmasa böhtandır". Mən sübut qoydum ortaya. Lakin dünəndən bəri Orxan bəy nə üzrxahlıq edib, nə də münasibət bildirib. Görünür, sübutumuz yetərli olmayıb. Əlavə sübuta ehtiyac var. Buyurun, onu da təqdim edək. Telejurnalist Sevinc Osmanqızı Meydan.tv-də çalışanda rəhbərlik tərəfindən ona bildirilib ki, Milli Şura və Xalq Cəbhəsinə bu media qurumunda moratorium, yəni qadağa qoyulub, əlavə edilib ki, bu bizim media siyasətimizdir və onu pozmaq olmaz”. Bu arada qeyd edək ki, “Meydan TV”nin əməkdaşı Sevinc Vaqifqızı Həsənlinin yalan danışdığını bildirib. Onun dediyinə görə, Cəmil bəy özündən müsahibə alıb Sevinc Osmanqızına göndərib: “Özünüzdən müsahibə alıb Sevinc Osmanqızına göndərmisiniz. Bu da elə təqdim olunub ki, guya Sevinc Osmanqızı sizdən müsahibə alıb. Müsahibə ilə bağlı şübhələr yarananda Sevinc xanım etiraf edib ki, siz ona hazır müsahibə göndərmisiniz və o da "Meydan"a yönəldib”. Bütün bunlar radikal düşərgədə indi əsl savaş getdyini göstərir. Belə görünür ki, tərəflər bir-birinə düşmən mövqedən baxır və bu məsələdə qrant davası da mühüm rol olynayır.
Ancaq tənqidi və təhqiramiz diskussiyalar maraqlı ifşaedici faktlar ortaya qoymaqdadır. Kamil Vəlinin Emil Millini “Emin Zilli” adlandırması kimi sadəcə emosional ifadələrdən yox, əsl faktlardan danışırıq. Bir vaxtlar radikal müxalifətlər düşərgəsində hamıdan gizlədilən, kim-kimə tələ qurdu, kimi-kimdən nə qədər pul qopardı kimi faktlarla bağlı ipucları görünməkdədir. Həm də bunu Azərbaycana haqq, ədalət, düzlük, dürüstlük, demokratiya gətirmək iddiasında olan, özlərini “peyğəmbər kimi” qələmə vermək istəyən radikal müxalifət düşərgəsinin mənsubları edir. Gözləyək, görək son aylarda Azərbaycanı Avropa və Amerikanın küçələrində söyən və söydürənlər barədə daha nələr açılacaq.
Tahir TAĞIYEV
