“Turistlər daha çox viza qaydalarının rahat olduğu ölkələrə səfər etməyə üstünlük verirlər”
Ölkəmizə səfər etmək istəyən əcnəbilər üçün viza prosesi daha da sadələşdirilib. İndi 15 xarici ölkənin vətəndaşları vizani elə hava limanındaca 2 dəqiqəyə əldə edə biləcəklər. Həmçinin, ölkəmizdən xarici dövlətlərə səfər etmək istəyənlər üçün də viza prosesi sadələşəcək.
Məlum olduğu kimi, mayın 15-dən etibarən "ASAN Viza" özünəxidmət terminalları vasitəsilə Heydər Əliyev Beynəlxalq Hava Limanında əcnəbilərə vizaların verilməsinə başlanıb. Qeyd edək ki, "ASAN Viza" portalı və özünəxidmət terminalları Azərbaycan, ingilis, fransız, ispan, ərəb, fars və rus dillərində olmaqla - 7 dildə fəaliyyət göstərir. Türkiyə, Yaponiya, Bəhreyn, Birləşmiş Ərəb Əmirlikləri, Cənubi Koreya, Çin, İran, İsrail, İndoneziya, Küveyt, Qətər, Malayziya, Oman, Səudiyyə Ərəbistanı və Sinqapur vətəndaşları bu sistemin köməkliyi ilə birbaşa viza ala biləcəklər.
Maraqlıdır, 15 xarici ölkənin vətəndaşına vizanın hava limanındaca verilməsi ölkəyə gələn turistlərin sayına necə təsir göstərəcək?
Azərbaycan Turizm Assosiasiyasının (AzTA) sədri Nahid Bağırov “Bakı-Xəbər”ə açıqlamasında qeyd etdi ki, 15 xarici ölkə vətəndaşlarına vizanın hava limanındaca verilməsi Azərbaycan turizminin üstünlüyüdür: “Viza verilməsi prosedurunun daha da yüngülləşdirilməsi Azərbaycan turizminin inkişafına səbəb olacaq. Bəllidir ki, əvvəllər vizanın verilməsi ilə bağlı tez-tez şikayətlər daxil olurdu. Ancaq indi prosedur daha da təkmilləşərək elektron formada həll olunacaq. Viza prosesinin sadələşdirilməsi turistlərin işini rahatlaşdıracaq. Bu mövzuda daxil olacaq şikayətlərin sayı, demək olar ki, sıfıra enəcək”.
Həmsöhbətimiz onu da vurğuladı ki, xarici ölkə vətəndaşları uzun müddət gözləmədən 2 dəqiqə ərzində vizanı əldə edə biləcəklər: “15 xarici ölkənin vətəndaşlarına vizanın birbaşa hava limanında verilməsi turistlərin diqqətinə səbəb olacaq. Bu hal ölkəyə gələn turistlərin sayına müsbət təsir göstərəcək. Bəllidir ki, turistlər daha çox viza qaydalarının rahat olduğu ölkələrə səfər etməyə üstünlük verirlər. Bu səbəbdən də hesab edirəm ki, ölkəmizdə vizanın verilməsi qaydasının daha da sadələşdirilməsi Azərbaycan turizminin inkişafına səbəb olacaq”.
Günel CƏLİLOVA
