“Bunun sayəsində dünya dövlətləri görəcəklər ki, Azərbaycan hansı qüdrətli orduya malikdir”
Azərbaycan Ordusunun yaradılmasının 100 illiyi ilə bağlı iyunun 26-da Azadlıq meydanında hərbi parad keçirilməsi planlaşdırılr. Bu barədə Müdafiə Sənayesi Nazirliyi məlumat yayıb. Məlumatda qeyd olunur ki, ötən ilin analoji dövrü ilə müqayisədə ixrac olunan məhsulların həcmi iki dəfə artıb. MSN müəssisələrində müdafiə təyinatlı məhsulların çeşidləri 1200 növə çatdırılıb: “Müdafiə Sənayesi Nazirliyinin yeni texnikaları iyunun 26-da Bakıda keçiriləcək Azərbaycan Ordusunun yaradılmasının 100 illik yubileyinə həsr olunmuş hərbi paradda da nümayiş olunacaq”.
Məlumat üçün qeyd edək ki, Azərbaycanın hərb tarixində ilk paradın təməli 1918-ci ildə Bakıda Qafqaz İslam Ordusunun zəfər yürüşü ilə qoyulub. Bakını erməni daşnakları və kommunaçıların işğalından azad etmiş Qafqaz İslam Ordusu indiki İstiqlaliyyət küçəsi ilə zəfər yürüşü keçirib. 1920-ci ilin 28 aprelində Azərbaycan bolşevik Rusiyası tərəfindən işğal olunandan sonra hərbi paradın məzmunu dəyişdi. Belə ki, Sovet Azərbaycanında paradlar adətən 1 Mayda - Zəhmətkeşlərin Həmrəyliyi Günü olardı. Zəhmətkeş kütləsi axınında hərdən bir-iki hərbi texnikanı da nümayişə çıxarardılar, bununla da iş bitmiş hesab edilərdi. Azərbaycanın müasir hərbi parad tarixinə gəlincə, mərhum prezident Heydər Əliyevin 1998-ci il 22 may tarixli Fərmanı ilə AXC hökumətinin ilk hərbi hissəni təsis etdiyi tarix - 26 iyun hər il Azərbaycan Silahlı Qüvvələri Günü kimi qeyd olunur.
Azərbaycanda ilk hərbi parad isə 1992-ci il oktyabrın 9-da baş tutub. 2008-ci il iyunun 26-da Silahlı Qüvvələrin Ali Baş Komandanı, Prezident İlham Əliyevin rəhbərliyi ilə Azərbaycanda ikinci, 2011-ci il iyunun 26-da üçüncü, 2013-cü il iyunun 26-da isə dördüncü hərbi parad keçirilib.
Bütün bunların fonunda, Azərbaycan Ordusunun yaradılmasının 100 illiyi ilə bağlı iyunun 26-da keçiriləcək hərbi paradın nə kimi beynəlxalq əhəmiyyəti olacaq?
Məsələyə münasibət bildirən hərbi ekspert Mehdi Mehdiyevin sözlərinə görə, keçiriləcək hərbi paradın bir sıra beynəlxalq və digər əhəmiyyəti var: “Əvvəla nəzərə almaq lazımdır ki, bu il Azərbaycan Ordusu üçün möhtəşəm bir ildir. Məsələ ondadır ki, Azərbaycan Silahlı Qüvvələrinin yaradılmasının 100 ili tamam olur. Sözügedən əlamətdar tarixlə bağlı hərbi paradın keçirilməsinin əhəmiyyəti böyükdür. Çünki keçiriləcək sözügedən paradda Azərbaycan Ordusu silah arsenalında olan döyüş texnikalarını nümayiş etdirəcək. Eyni zamanda, şəxsi heyətin qoşun növləri paradda iştirak edəcəklər. Reallıq ondan ibarətdir ki, ötən illər ərzində Azərbaycan Ordusu xeyli güclənib. Ordunun müasir silahlarla və döyüş texnikaları ilə təchiz olunması ilə bağlı böyük işlər görülüb. Təbii ki, Azərbaycanda Müdafiə Sənayesi Nazirliyi olduğu üçün, ölkədə istehsal olunan müasir hərbi texnikalar da orada nümayiş olunacaq. Paradın bir neçə aspektdən əhəmiyyəti var. Əvvəla bu, Azərbaycan Ordusunun gücünü, qüdrətini göstərir. Yəni bunun sayəsində ölkə əhalisi, ictimaiyyəti daha da ruhlanır. Digər tərəfdən, Azərbaycana düşmən münasibət göstərən, ölkə ərazisini işğal edən Ermənistan görəcək ki, ordumuz nəyə qadirdir. Beynəlxalq müstəvidə bunun müəyyən əhəmiyyəti var. Bunun sayəsində dünya dövlətləri görəcəklər ki, Azərbaycan hansı qüdrətli orduya malikdir. Çox güman ki, paraddan sonra bir sıra beynəlxalq ekspertlər Azərbaycan Ordusunun gücü və qüdrəti barədə tədqiqatlar aparacaqlar. Bütün bunlar həm də Dağlıq Qarabağla bağlı danışıqlar prosesinin tezləşməsinə təkan verə bilər”.
Vidadi ORDAHALLI
