Ermənistanda özlərinin dediyi kimi “məxməri inqilab”ın baş verməsi, görünür, bu ölkədə bir çoxlarının eyforiyaya düşməsinə şərait yaradıb. Belə olmasaydı, işğalçı ölkənin aparıcı mətbu orqanları İrəvanla işğal etdikləri Azərbaycan torpaqlarında qurduqları, lakin az qala üç onillik yola salmış və dünya ölkələrinin tanımaq fikrində olmaması səbəbindən özlərinin də tanımadıqları qondarma “respublika” ilə əlaqələrin yenilənməsi barədə fikirləri dövriyyəyə buraxmazdı.
Məsələ burasındadır ki, bu günlərdə Ermənistan parlamentinin bir qrup deputatı işğal altındakı ərazilərimizdə olub. Parlamentin bütün fraksiyalarından deputatların yer aldığı qrupun Qarabağa səfəri isə müxalifətin qələbəsindən eyforiyaya düşmüş ermənilərdə bu münaqişənin nəticələri barədə də illüziya yaradıb. Yəni yazılanlardan belə görünür ki, Sarkisyanla “haqq-hesabı çürüdən” kəsim onunla birgə Qarabağ nizamlanmasının da arxivə göndərildiyini düşünür, artıq onun yeni statusu barədə fikirlərini dilə gətirirlər. Erməni mətbuatı yazır ki, artıq 30 ilə yaxındır Laçın dəhlizi vasitəsilə əlaqə saxladıqları “DQR”lə əlaqələrin yeni statusda formalaşması Ermənistan üçün imperativ xarakter daşıyır. Bu xüsusda isə diqqət ona çəkilir ki, “Artsax” sakinləri hələ də Ermənistan pasportu daşıyır, üstəlik səsvermə və seçilmə hüquqları da yoxdur. Maraqlısı odur ki, bu üzdəniraq mətbuat qondarma “respublika”nın “prezident”inin, “XİN”-nin olmasına rəğmən danışıqlarda iştirak etməməsini bu günə qədər “əldən verilmiş fürsət” kimi dəyərləndirir, bütün bunların əsl səbəbinin isə üstündən sükutla keçir.
Erməni mətbuatı bu xüsusda yeni prezident Armen Sarkisyanın hələ səlahiyyətlərinə başlamazdan öncə bəyan etdiyi, özünün “dördüncü respublikanın” prezidenti olacağı barədə fikirlərinə istinad edərək yazır ki, “dördüncü respublika” həm də “Ermənistan və Artsaxı birləşdirən erməni birliyi formatı” ola bilər. Bu kontekstdə onların Trampın Qüdsə münasibətilə paralellər aparması isə dodaq qaçırmaya bilmir. Belə ki, “lragir” saytının analitiki Naira Ayrumyan yazır ki, Tramp Qüdsün İsrailin paytaxtı statusunu təsdiqləyərkən “bugünkü reallıqlardan” çıxış etdiyini deyib və “Ermənistanla Artsax arasında birləşmə müqaviləsinin bağlanması da bu günün reallıqlarının etirafı” ola bilər... Əlavə şərhə ehtiyac qalmır...
Adətən eyforiyada olan insanları real həyata qaytarmaq üçün “tərs şapalaq” metodundan istifadə edirlər. Görünür, indiki erməni elitasının da belə bir “tərs şapalağa” ciddi ehtiyacı yaranıb. Azərbaycan Ordusunun vuracağı bu “şapalaq” isə bir himə - əmrə bənddir ki, erməni qulaqlarını illərlə cingildətsin. Yalnız bir “İrəli” əmrinə...
SAMİRƏ
