“Görkəmli ədəbiyyatşünas və yazıçı, professor Mir Cəlal Paşayev mənim taleyimdə çox böyük rol oynayıb. O, ali məktəbdə və aspiranturada müəllimim, namizədlik və doktorluq dissertasiyamın elmi rəhbəri olub. İş elə gətirib ki, sonralar onunla bir kafedrada işləmişik. Mir Cəlal müəllim məni dəfələrlə həyatın bataqlıqlarından çıxarıb. Çox işdə arxam, dayağım olub. Həmişə kürəyimdə onun isti nəfəsini hiss etmişəm, amma bütün bunların əvəzində bir dəfə də olsun ona təşəkkür etməyə, minnətdarlığımı çatdırmağa imkan verməyib. Etdiyi yaxşılıqları, göstərdiyi hamilik yardımını da özünün müəllimlik və böyüklük borcu hesab edib”.
Filologiya elmləri doktoru, professor Xalid Əlimirzəyevə həsr edilmiş “Zirvəyə doğru” sənədli filminin qəhrəmanının söylədiyi bu sözlər yaxşılığa, xeyirxahlığa qarşı qədirbilən münasibətin ifadəsi və həmin yaxşılığı özünün müqəddəs borcu kimi yerinə yetirənin əsl insan, pedaqoq və vətəndaşlıq borcu kimi qəbul etmək olar.
AZƏRTAC xəbər verir ki, “Dünya" müstəqil televiziya və radio şirkətinin təşkilatçılığı ilə çəkilən sənədli film Beynəlxalq Mətbuat Mərkəzində nümayiş olunub.
Filmdə professorun Qəbələ rayonunun Qəmərvan kəndindən başlanan və onu ölkənin ən böyük ali tədris müəssisələrindən olan Bakı Dövlət Universitetinin professoruna, təhsil nazirinin müavini vəzifəsinə qədər aparıb çıxaran ömür yolu canlandırılıb. “Zirvəyə doğru” filmində professoru yaxından tanıyan dostları, həmkarları, tələbələrinin onun haqqında ürək sözləri, xatirələri də əks olunub.
Ötən əsrin 60-cı illərində elmdə ilk addımlarını atmağa başlayan və 50 ildən artıq pedaqoji və ədəbiyyatşünaslıq fəaliyyəti ilə məşğul olan X.Əlimirzəyev onlarca kitabın, 300-dən çox məqalənin müəllif olub, qələmə aldığı dram əsəri səhnəyə qoyulub. Onun ayrı-ayrı klassiklərin həyatına aid tədqiqatları, ədəbiyyatşünaslığın ən müxtəlif problemləri barədə qələmə aldığı məqalələr əsl alim, ədəbiyyatşünas və ziyalı əməyinin məhsuludur.
Təqdimat mərasimində çıxış edən professor Almaz Əliqızı, Xalq artisti Flora Kərimova, Əməkdar jurnalist Əbülfət Mədətoğlu, Əməkdar artist Azad Şükürov və başqaları görkəmli ədəbiyyatşünas-alimin məhz kəsərli tənqidçi sözünü, fəal vətəndaş mövqeyini, əsl ziyalı müdrikliyini önə çəkib, onun vicdanlı, heç vaxt haqqı nahaqqa verməyən, həmişə cəsarəti ilə fərqlənən fəal vətəndaş mövqeyini, səmimiyyət və qayğıkeşliyini xüsusi vurğulayıblar.
Filmin ssenari müəllifi Elşən Qəni, professorun qızı, filologiya üzrə fəlsəfə doktoru Şəfayət Əlimirzəyeva “Zirvəyə doğru”nun tamaşaçılarına təşəkkür ediblər.
