Bişkekdə aprel ayının 25-də Heydər Əliyevin anadan olmasının 95 illiyi münasibətilə silsilə tədbirlər çərçivəsində ölkəmizin Qırğız Respublikasında Səfirliyi və Qırğız Respublikasının Prezidenti yanında Dövlət İdarəçilik Akademiyasının birgə təşkilatçılığı ilə “Heydər Əliyev. Hakimiyyət və Şəxsiyyət” adlı Dəyirmi masa keçirilib.
Azərbaycanın Qırğızıstandakı səfirliyindən aldığımız məlumata görə, tədbir başlamadan öncə iştirakçılar Akademiyanın foyesində ümummilli liderin həyat və fəaliyyətlərini əks etdirən foto və kitab sərgiləri ilə tanış olub.
Azərbaycan və Qırğız Respublikalarının dövlət himnlərinin səslənməsinin ardından tədbiri giriş sözü ilə açan Qırğızıstan Prezidenti yanında Dövlət İdarəçilik Akademiyasının rektoru Almaz Nəsirov rəhbərlik etdiyi akademiya üçün belə mühüm konfrans keçirməkdən məmnun olduğunu bildirib. Qeyd edib ki, dünya miqyaslı dövlət xadimi və siyasətçi Heydər Əliyev hələ sağlığında əlçatmaz bir zirvəyə yüksəldi və onun siyasi irsi Azərbaycan tarixində dərin iz buraxdı.
Sonra Azərbaycan Respublikasının Prezidenti yanında Dövlət İdarəçilik Akademiyasının rektoru Urxan Ələkbərovla telekörpü yaradılıb və o, müasir müstəqil Azərbaycan dövlətinin formalaşmasında və möhkəmlənməsində, dünya səviyyəsində tanınmasında Heydər Əliyevin əvəzsiz xidmətlərindən danışıb.
Rusiyanın Qırğız Respublikasındakı Fövqəladə və Səlahiyyətli səfiri Andrey Krutko Heydər Əliyevin Sovetlər dövründə Azərbaycanda və Moskvadakı fəaliyyəti haqqında danışıb və böyük liderlə görüşləri ilə bağlı xatirələrini bölüşüb.
Türkiyənin Qırğız Respublikasında fövqəladə və səlahiyyətli səfiri Cengiz Kamil Fırat bildirib ki, türk dünyası Heydər Əliyevlə qürur duyur və onu dahi şəxsiyyət və müdrik siyasətçi kimi qəbul edir.
Qazaxstanın Qırğız Respublikasındakı səfiri Karim Kokrekbayev Heydər Əliyevin təşəbbüsü ilə beş Türkdilli ölkənin - Azərbaycan, Türkiyə, Qazaxstan, Özbəkstan və Qırğızstan rəhbərlərinin Bakıda keçirilən sammitində "Kitabi Dədə Qorqud" eposunun 1300 illik yubileyinin yüksək səviyyədə qeyd edildiyini xatırlayıb.
Qırğız Milli Universitetinin rektoru Kanat Sadıkov qeyd edib ki, Heydər Əliyev ölkənin bütün gələcək liderləri üçün nümunədir və onun şəxsiyyətinin miqyası o qədər böyük idi ki, bəzi hallarda Azərbaycan ona görə tanınırdı.
Qırğız Respublikasının Prezidenti yanında Dövlət İdarəçilik Akademiyasının professor-müəllim heyətindən iqtisad elmləri namizədi Masura Kitayeva "Heydər Əliyevin irsi", texniki elmlər namizədi Asılbek Bolotvayev “Heydər Əliyev dövlət xadimi kimi", tarix elmləri doktoru Aydarbek Koçkunov "Azərbaycan və Qırğızıstanın mədəni və humanitar əlaqələri", tələbəsi Şakina Kadırova "Qırğız Respublikası ilə Azərbaycan Respublikası gənclərinin qarşılıqlı əlaqəsi" mövzularında məruzə ilə çıxış ediblər.
Tədbirin sonunda çıxış edən Azərbaycanın Qırğız Respublikasında fövqəladə və səlahiyyətli səfiri Hidayət Orucov bildirib ki, Heydər Əliyev idarəetmə fəlsəfəsinin istiqaməti milli şüuru yüksəldən inkişafa və milli qurur hissinin güclənməsinə yönəlib. «Hər bir azərbaycanlı onunla razıdır ki, ümummilli lider olmasaydı, çağdaş Azərbaycan da olmayacaqdı»- deyən səfir eyni zamanda, Heydər Əliyevin alternativi olmayan daxili və xarici siyasətini və ideyalarını Prezident İlham Əliyev uğurla davam etdiyini vurğulayıb.
Tədbirdə Qırğız Respublikasında akkreditə olunmuş xarici ölkələrin səfirləri, ictimai-siyasi xadimlər, Akademiyanın rəhbərliyi və professor-müəllim heyəti, magistrlər, tələbələr, Azərbaycan diasporunun nümayəndələri və jurnalistlər iştirak edib.
