Nüfuzlu “The Economist” nəşri Azərbaycanda keçirilmiş prezident seçkilərində İlham Əliyevin inamlı qələbəsinə məqalə həsr edib. Trend-in məlumatına görə, məqalədə bildirilir ki, Azərbaycan vətəndaşları həyat səviyyəsinin yüksəlməsinə və dünyanın bu qeyri-stabil bölgəsində siyasi sabitliyə görə Prezident İlham Əliyevə minnətdardır. Qeyd olunur ki, ölkə vətəndaşları Prezident İlham Əliyevin Azərbaycana məxsus Dağlıq Qarabağ ərazisini işğal etmiş Ermənistana qarşı sərt mövqeyini bəyənir.
“The Economist”, həmçinin Prezident İlham Əliyevin bir sıra iqtisadi nailiyyətlərini qeyd edib. Məqalədə vurğulanır ki, 2000-ci illərdə Azərbaycan iqtisadiyyatı orta hesabla ildə 13 faiz artıb ki, bu da ölkəni dünyada ən sürətli inkişaf edən ölkəyə çevirib. Azərbaycanda yoxsulluq səviyyəsi isə 2000-ci ildə qeydə alınan 50 faizdən 5 faizədək düşüb.
Bildirilir ki, bununla belə, dayanıqlı iqtisadi modeli təkcə karbohidrogenlər üzərində qurmaq olmaz, ona görə də Prezident İlham Əliyev Azərbaycanı Yeni İpək Yolunda tranzit nəqliyyat qovşağına çevirmək istəyir. Ötən ilin oktyabrında Bakı-Tbilisi-Qars yeni dəmir yolunun açılması o deməkdir ki, Çindən Avropaya ən qısa yol indi Azərbaycandan keçir.
Bu kontekstdə “The Economist” vurğulayır ki, təkcə 2016-cı ildə Çinlə Avropa İttifaqı arasında ticarət dövriyyəsi 560 milyard dollara çatıb, amma bütün ticarət əməliyyatlarının 90 faizi dəniz vasitəsilə aparılır ki, bu da yolu iki dəfə uzadır.
“The Economist”, həmçinin reallaşdırılmasında Azərbaycanın iştirak etdiyi digər beynəlxalq layihə haqqında da yazır: “Şimal-Cənub” nəqliyyat dəhlizi yaxın zamanlarda Mumbayı və Moskvanı Azərbaycandan keçən dəmir yolu vasitəsilə birləşdirəcək”.
Rusiya qəzeti: “Azərbaycan seçicisi Prezident İlham Əliyevə alternativ görmür”
"Azərbaycan seçicisi Prezident İlham Əliyevə alternativ görmür, ötən prezidentlik müddətində onun fəaliyyətini qənaətbəxş sayır və növbəti müddətdə ölkəyə onun rəhbərlik etməsini istəyir". Bu barədə Rusiyanın “Trud” ictimai-siyasi qəzetinin saytında dərc olunan məqalədə yazılır.
Məqalədə qeyd olunur ki, Azərbaycan vətəndaşları İlham Əliyevin səlahiyyətlərini təsdiq etdi və onu yeni müddətə təkrar seçdi: "Hələ səsvermədən bir ay qabaq “ELS” müstəqil araşdırmalar mərkəzinin keçirdiyi sorğu göstərdi ki, respondentlərin 84 faizdən çoxu öz səsini hazırkı dövlət başçısına verməyə hazırdır”.
Bildirilir ki, 2013-cü il prezident seçkilərindən sonra dövlətin inkişafında əsas uğurlar sırasında respondentlər xüsusilə təhlükəsiz həyat şəraiti (81 faiz), sabit siyasi vəziyyəti (79 faiz), Dağlıq Qarabağ münaqişəsinin həlli ilə bağlı səyləri (44 faiz) qeyd edib. Bununla belə, respondentlər sonuncu məsələdə əsas irəliləyişləri Prezident İlham Əliyevin adı ilə bağlayır (88 faiz), ATƏT-in Minsk qrupunun nümayəndələrinin fəaliyyətinə isə rəyi soruşulanların cəmi 7 faizi inanır: “İki il əvvəl baş vermiş və Azərbaycan ərazilərinin bir hissəsinin azad olunması və Ermənistan qoşunları ilə qarşıdurma xəttində strateji yüksəkliklər üzərində nəzarətin qaytarılması ilə nəticələnən qısa müharibə İlham Əliyevin reytinqini daha da yüksəlti”.
Rəy sorğusuna əsasən, respondentlərin 91 faizdən çoxu prezidentin həyata keçirdiyi daxili siyasəti dəstəkləyir. Məqalədə qeyd olunur ki, respublika sakinləri uğurla keçirilmiş Birinci Avropa Oyunlarını və İslam Həmrəyliyi Oyunlarını da unutmayıb. Bu tədbirlər sayəsində bütün dünya Azərbaycanı, onun xalqını və zəngin mədəniyyətini tanıdı.
Pakistanlı analitik: “Azərbaycan xalqının Prezident İlham Əliyevdən başqa alternativi yoxdur”
Azərbaycan xalqının ölkəni beynəlxalq diplomatik arenada layiqincə təmsil etmək bacarığına malik, güclü və uzaqgörən lider olan Prezident İlham Əliyevdən başqa alternativi yoxdur. Bunu isə Çinin CGTN nəşri üçün məqalədə siyasi analitik, teleaparıcı, jurnalistika sahəsində bir çox mükafatların laureatı Malik Ayub Sumbal yazıb.
Müəllif bildirir ki, müxtəli sorğulara əsasən Prezident İlham Əliyevi əhalinin böyük əksəriyyəti dəstəkləyir və ölkənin siyasi arenasında onun alternativi yoxdur: “Azərbaycanda müxalifətin bir sıra problemləri var – onlar parçalanıb, zəifdir və insanların onlara inamı itib. Müxalifətin ölkənin üzləşdiyi çağırışların, o cümlədən Dağlıq Qarabağ münaqişəsinin öhdəsindən gələ biləcək lideri yoxdur”.
O xatırladır ki, Dağlıq Qarabağ bölgəsi Ermənistan tərəfindən işğal olunub və qoşunların təmas xəttində həmin dövrdən vaxtaşırı toqquşmalar baş verir. Müəllif vurğulayır ki, zəif rəhbərlik vəziyyəti şiddətləndirə bilər: “Erməni işğalı nəticəsində Dağlıq Qarabağdan didərgin düşən, Bakıda və digər rayonlarda məskunlaşan məcburi köçkün axını böyük çağırış idi, lakin hakimiyyət bu çağırışın öhdəsindən gələ bildi”.
Bakının müasir və qədim arxitekturasının əsrarəngiz ahəngdarlığını xüsusi qeyd etməyi unutmayan analitik bir daha qeyd edir ki, hazırkı rəhbərlik ölkənin inkişafı ilə bağlı vədlərini yerinə yetirib.
M.A.Sumbal Azərbaycana münasibətdə bir sıra qərb qüvvələrinin tənqidinə də münasibət bildirərək yazır ki, özlərini “demokart” adlandıran həmin qüvvələr ikili standartlar tətbiq edirlər.
Məqalədə Prezident İlham Əliyevin korrupsiya ilə mübarizəsinə xüsusi diqqət ayrılır. Müəllif qeyd edir ki, Azərbaycanın dövlət başçısı genişmiqyaslı antikorrupsiya kampaniyasına başlayıb: “Prezident İlham Əliyev “ASAN xidmət” mərkəzləri yaratmaqla sosial xidmətlər sahəsində islahatlar apardı. Bu, dövlət xidmətlərinin əhali üçün daha əlçatan olmasına hesablanıb”.
Analitik bildirib ki, Prezident İlham Əliyev tərəfindən həyata keçirilən tədbirlər neft qiymətlərinin aşağı düşməsinin təsirini azaltmağa, həmçinin ölkəni Asiyadan, o cümlədən Yaxın Şərqdən olan əcnəbi turistlər üçün populyar etməyə imkan verdi.
