Sankt-Peterburq şəhərində "Rusiya-Azərbaycan: sülh, təhlükəsizlik və əməkdaşlıq naminə konfessiyalararası dialoq və islam həmrəyliyi" mövzusunda beynəlxalq konfrans keçirilib. APA-nın Rusiya bürosunun məlumatına görə, tədbir Azərbaycan Rusiyadakı səfirliyinin dəstəyi ilə Dini Qurumlarla iş üzrə Dövlət Komitəsi, Qafqaz Müsəlmanları İdarəsi, Sankt-Peterburq Dövlət Universiteti, Sankt-Peterburq və Rusiyanın Şimali-Qərb regionu üzrə Ruhani İdarəsi tərəfindən təşkil edilib.
"İslam həmrəyliyi ili" çərçivəsində Bakıda, Şimali Qafqazda, Finlandiyada, İranda, Türkiyədə, Özbəkistanda və İspaniyada keçirilmiş beynəlxalq tədbirlərin ardınca Sankt-Peterburqda baş tutan konfransda QMİ sədri Şeyxülislam Hacı Allahşükür Paşazadə, Dini Qurumlarla iş üzrə Dövlət Komitəsi Mübariz Qurbanlı, Rus Pravoslav Kilsəsinin Bakı və Azərbaycan Yeparxiyasının Arxiyepiskopu Aleksandr İşein, Dağ yəhudiləri icmasının başçısı Melih Yevdayev, Bakıdakı Katolik icmasının ordinarisi Vladimir Fekete, Azərbaycanın Rusiyadakı səfiri Polad Bülbüloğlu, Milli Məclis üzvləri, Rusiya və Azərbaycan Elmlər Akademiyasının institut rəhbərləri, tanınmış elm və din xadimlərindən ibarət geniş nümayəndə heyəti iştirak edib.
Konfrans "Qurani-Kərim"dən ayə oxunması ilə başlayıb.
Konfransı giriş sözü ilə Sankt-Peterburq və Rusiyanın Şimal-Qərb regionu müsəlmanları Ruhani İdarəsinin sədri Ravil-Həzrət Pançeyev açıb. O, MDB məkanında müsəlman xalqlar arasında mehriban dostluq əlaqələrinin olduğunu söyləyib: "MDB məkanında müsəlman və digər dinlərə məxsus xalqlar arasında tarixi bağlılığın möhkəm əsası var. Bu gün Peterburqun Tavriçeski sarayında belə bir tədbirin keçirilməsi də MDB məkanında dinlərarası dialoqun mövcudluğunu göstərir".
QMİ sədri Şeyxülislam Hacı Allahşükür Paşazadə Azərbaycan Prezidenti İlham Əliyevin salamlarını konfrans iştirakçılarına çatdırıb, tolerantlıq və multikulturalizmin Azərbaycanda dövlət strategiyası olduğunu söyləyib: "Bu gün Azərbaycan prezidenti İlham Əliyev qlobal səviyyədə ümumbəşəri və dini dəyərləri müdafiəçisi kimi çıxış edir. İnanclı insanlar Azərbaycan prezidentinin 2017-ci ili "İslam həmrəyliyi ili" elan etməsini yüksək qiymətləndirirlər. Ksenofobiyanın, islamofobiyanın dərinləşməsi fonunda belə səylər bizə, din xadimlərinə dini dəyərlərin qorunması işində güclü stimul verir. "İslam həmrəyliyi ili" çərçivəsində Şimali Qafqazda, Finlandiyada, İranda, Türkiyədə, Özbəkistanda, İspaniyada keçirilmiş və bu gün Sankt-Peterburqda keçirilən beynəlxalq konfranslar bu ideyaların qlobal əhəmiyyət daşıdığını göstərir".
Peterqof Arxiyepiskopu Amvrosiy Moskva və bütün Rusiyanın patriarxı Kirillin konfrans iştirakçılarına müraciətini, Rusiya Federasiya Şurasının sədr müavini İlyas Umaxanov isə Federasiya Şurasının sədri Valentina Matviyenkonun konfrans iştirakçılarına təbrik məktubunu oxuyub.
Səfir Polad Bülbüloğlu isə çıxışında tədbir təşkilatçılarına təşəkkürünü bildirib. Bu tədbirin bu gün üçün böyük əhəmiyyət daşıdığını vurğulayan diplomat bir müddət əvvəl Moskvada keçirilən dini liderlərin görüşünü xatırladıb: "Biz 70 il kommunist rejimində yaşamışıq. Məktəbdə bizə Allahın olmadığını öyrədirdilər. Lakin bu rejimin süqutundan sonra insanlarımız tez bir zamanda dinə qayıtdılar. Bu gün Rusiyanın şimal paytaxtında keçirilən bu beynəlxalq konfrans xalqlarımız və ölkələrimiz arasında mehriban dostluq əlaqələrinin yüksək səviyyədə olduğunu göstərir".
Sonra konfrans işini plenar iclasla davam etdirib. İclasda çıxış edən Dini Qurumlarla iş üzrə Dövlət Komitəsi Mübariz Qurbanlı Azərbaycanda bütün dinlərin nümayəndələrinin sülh və əminamanlıq şəraitində yaşadığını deyib: "Bu gün Azərbaycan öz tarixininin ən maraqlı səhifələrindən birini yaşayır. Tarixən bizim ölkəmizdə müxtəlif xalqlar, millətlər və dinlərdən olan insanlar sülh şəraitində yaşayıb, onlar arasında qarşılıqlı nifrətə yer olmayıb. Azərbaycanda mövcud olan dini tolerantlığın kökü əsrlər bundan öncəyə gedib çıxır".
M.Qurbanlı Azərbaycanda 28 qeyri-islam dini icmasının fəaliyyət göstərdiyini qeyd edib: "Onlardan 17-si xristian dini icmasıdır, hansılar ki, xristianlığın fərqli cərəyanlarına aiddir. Ən böyük qeyri-islam dini təşkilatı Rusiya Pravoslav Kilsəsinin Bakı və Azərbaycan Yeparxiyasıdır. Azərbaycan eyni zamanda qədim kilsələrdən birinin - Alban Kilsəsinin vətənidir. Bu, şərqi pravoslavlığa aiddir. Alban udinləri tarixi Qafqaz Albaniyasının nəslindəndir. Udinlər bu günə kimi bizim ölkəmizdə yaşayırlar. Azərbaycanda tarixən formalaşan tolerant adət-ənənələr sayəsində udinlər müsəlmanlar arasında öz doğma dillərini, dini xüsusiyyətlərini qoruyub saxlaya biliblər".
Plenar iclasda "Rusiya-İslam Dünyası" strateji baxış Qrupunun koordinatoru Veniamin Popov, Şimali Qafqaz müsəlmanlarının Koordinasiya Mərkəzinin sədri, müfti İsmayıl Verdiyev, Azərbaycandakı Rus İcmasının sədri Mixail Zabelin, Rusiya Elmlər Akademiyasının (REA) Şərqşünaslıq İnstitunun direktoru Vitali Naumkin, REA-nın Əlyazmalar İnstitunun direktoru İrina Popova və AMEA-nın Əlyazmalar institunun direktoru Teymur Kərimli çıxış edib.
Konfransın sonunda Sankt-Peterburq və Rusiya Şimal-Qərb regionu müsəlmanları Ruhani İdarəsi ilə QMİ arasında əməkdaşlıq haqqında saziş imzalanıb.
Allahşükür Paşazadə Rusiya patriarxına niyə təşəkkür etdi…
"MDB məkanında sülhə zərər vuran münaqişələr bizi narahat etməyə bilməz". APA-nın Rusiya bürosunun verdiyi məlumata görə, bunu Sankt-Peterburq şəhərində keçirilən "Rusiya-Azərbaycan: sülh, təhlükəsizlik və əməkdaşlıq naminə konfessiyalararası dialoq və islam həmrəyliyi" mövzusunda beynəlxalq konfransda çıxış edən Qafqaz Müsəlmanları İdarəsinin sədri, şeyxülislam Allahşükür Paşazadə bildirib.
Dağlıq Qarabağ münaqişəsinin uzun müddətdir həll olunmadığını xatırladan şeyxülislam bu münaqişənin Sovet İttifaqının süqutunun, postsovet məkanında separatizmin, millətlərarası qarşıdurmanın başlanğıcı olduğunu söyləyib: "Biz Qarabağ münaqişəsinin beynəlxalq hüququn norma və prinsipləri əsasında nizamlanmasını dəstəkləyirik. Moskva və bütün Rusiyanın patriarxı əlahəzrət Kirillə Qarabağ münaqişəsinin sülh yolu ilə ədalətli həllində və bu münaqişənin dini müstəviyə keçməməsində göstərdiyi vasitəçiliyi görə minnətdarıq".
Şeyx Rusiyanın anti-İŞİD əməliyyatından danışdı
"Dinlərin müqəddəs ideallarının adam öldürməklə, zor tətbiqi ilə əlaqələndirilməsi nəticəsində müsəlmanlar, xristianlar həlak olur, məscidlər və kilsələr dağıdılır. Dünyanın müxtəlif regionlarında inanclı insanların ekstremist və terrorçu kimi qələmə verilməsi cəhdlərinin davam etdirilməsi bizi çox narahat edir" – deyən Qafqaz Müsəlmanları İdarəsinin sədri, şeyxülislam Hacı Allahşükür Paşazadə islamın mahiyyətinin bilərəkdən təhrif edildiyini vurğulayıb: "Biz İŞİD-i və bu cür terrorçu birlikləri, təkfirçiləri, öz maraqlarına çatmaq üçün islamı pərdə kimi istifadə edərək parçalayanları qətiyyətlə qınayırıq. Bununla əlaqədar Rusiyanın "İslam Dövləti" psevdonimi altında fəaliyyət göstərən, öz fəaliyyəti ilə dünya dininin adına ləkə gətirən İŞİD-ə qarşı keçirdiyi antiterror əməliyyatlarını dəstəkləyirik. Əminəm ki, ekstremizmə, radikalizmə qarşı mübarizə ancaq dövlətlərin, ictimai-siyasi xadimlərin və dini birliklərin birgə səyləri nəticəsində mümkün ola bilər. Gənclərimizi ənənəvi dini dəyərlər və tolerantlıq ruhunda tərbiyə edərək biz, dinlərarası razılığı və millətlərarası həmrəyliyi dəstəkləyə bilərik".
Patriarx Kirill Paşazadəyə “40 illik dostum” dedi…
"Rusiya, Azərbaycan və Ermənistan dini liderlərinin Dağlıq Qarabağ münaqişəsinin həllinə istiqamətlənmiş əməkdaşlığı ümumi sülhməramlı xidmət nümunələrindən biridir". APA-nın Rusiya bürosunun məlumatına görə, bu barədə Moskva və Bütün Rusiya Patriarxı Kirillin "Rusiya-Azərbaycan: sülh, təhlükəsizlik və əməkdaşlıq naminə konfessiyalararası dialoq və islam həmrəyliyi" mövzusunda keçirilən beynəlxalq konfransın iştirakçılarına ünvanladığı müraciətdə qeyd olunub.
Patriarx Kirill müraciətində Qafqaz Müsəlmanları İdarəsi ilə Moskva Patriarxlığı arasındakı əməkdaşlığı xüsusi vurğulayıb: "Moskva Patriarxlığı Qafqaz Müsəlmanları İdarəsi ilə olduqca yüksək səviyyədə qarşılıqlı etimadla xarakterizə olunan uzunmüddətli münasibətləri qiymətləndirir. Bu işdə 40 ildir yaxın dostum, dialoq aparılmasının ardıcıl tərəfdarı və sülhməramlı işlərdə tərəfdaş kimi tanıdığım hörmətli Şeyxülislam Allahşükür Paşazadənin böyük xidməti var".
Patriarx din xadimlərinin və dini liderlərin ekstremizm probleminə birgə reaksiya verməli olduqlarını bildirib: "Aydın məsələdir ki, ekstremizmin yayılması dini maarifləndirmənin zəif olması, gənclərin informasiya kanallarından alınan məlumatları düzgün qiymətləndirə bilməməsi ilə bağlıdır. Buna görə də mənəvi təhsil və maarifləndirməni təşviq edərək camaatımızı bir-birinə hörmət etmək ruhunda tərbiyə etmək vacibdir".
Qeyd edək ki, Patriarxın konfrans iştirakçılarına müraciətini Peterqof Arxiyepiskopu Amvrosiy oxuyub.
Baki-xeber.com
