Rusiya ilə ABŞ arasındakı münasibətlərdə bəzi məzələlərdə çətinliklərin olması Ermənistan-Azərbaycan, Dağlıq Qarabağ münaqişəsinin həlli məsələsində əməkdaşlığa təsir göstərmir. “Trend”-in məlumatına görə, bunu Bakıda ADA Universitetində çıxış edən Rusiyanın xarici işlər naziri Sergey Lavrov deyib.
O qeyd edib ki, Rusiya, ABŞ və Fransa bu məsələdə ümumi mövqeyə sahibdirlər.
S.Lavrov ümidvar olduğunu bildirib ki, Azərbaycan və Ermənistan prezidentləri arasında Cenevrə görüşü münaqişənin həlli prosesinə müsbət təsir göstərəcək.
Rusiya Azərbaycanın Avrasiya İqtisadi İttifaqına qoşulmasından məmnun olardı. “Trend”-in məlumatına görə, bunu Bakıda ADA universitetində çıxışı zamanı Rusiyanın xarici işlər naziri Sergey Lavrov deyib.
O qeyd edib ki, Avrasiya İqtisadi İttifaqı açıq inteqrasiya ittifaqıdır və buraya yeni ölkələrin qoşulması məmnunluq doğurur.
S.Lavrovun sözlərinə görə, hazırda bu təşkilata Tacikistanın qoşulması imkanı nəzərdən keçirilir.
"Bakı-Tbilisi-Qars dəmir yolunun bizimlə əlaqəsi yoxdur"
"Bakı-Tbilisi-Qars dəmir yolu ilk növbədə Azərbaycan, Gürcüstan və Türkiyəyə müsbət töhfə verəcək. Bizimlə əlaqəsi yoxdur. Çünki bizim ərazilərdən keçmir".
APA-nın məlumatına görə, bu sözləri Rusiyanın xarici işlər naziri Sergey Lavrov ADA Universitetində müəllim-tələbə heyəti ilə görüşdə deyib. O bildirib ki, Azərbaycan Rusiya və İranla hazırda nəqliyyat sahəsində əməkdaşlığı inkişaf etdirmək istiqamətində layihə həyata keçirir: "Nəqliyyat layihələri gələcəkdə məhsuldar əməkdaşlıqlara yol açır".
Nazir qeyd edib ki, Azərbaycan və Rusiya terrorizmlə mübarizə sahəsində əməkdaşlıq edir: "Biz əməkdaşlıq edirik ki, heç kəs terrorçulardan hansısa məqsədlərini yerinə yetirmək üçün istifadə edə bilməsin. Biz bunları Suriyada, Yaxın Şərqdə müşahidə edirik. Terrorizmlə mübarizə üçün BMT çərçivəsində əməkdaşlıq edirik. Həmçinin MDB Antiterror Mərkəzi çərçivəsində əməkdaşlıq davam edir. Terrorizmlə mübarizə sahəsində əməkdaşlıq bizim ümumi maraqlarımıza xidmət edən əsas sahələrdən biridir".
Xatırladaq ki, ADA Universitetində çıxışdan əvvəlki görüşdə Azərbaycan XİN rəhbəri Elmar Məmmədyarov Rusiyanın Bakı-Tiflis-Qarsdan istifadə edə biləcəyini açıq demişdi. Görünür, Lavrov öz hökuməti ilə müvafiq məsləhətləşmə aparılmadan Azərbaycan XİN-in bu rəsmi dəvətinə münasibət bildirməyə lüzum görməyib.
Baki-xeber.com
