Rüfət Quliyev: “APA informasiya agentliyi ölkədə baş verən hadisələrə operativ və dəqiq yanaşması ilə diqqət çəkməyi və sevilməyi bacarıb” Aydın Mirzəzadə: “Cəmiyyətin maarifləndirilməsində, xəbər istehsalında APA-nın müstəsna rolu var” Vüqar Rəhimzadə: “APA tək ölkə ictimaiyyəti üçün deyil, beynəlxalq aləm üçün də böyük önəm kəsb edən informasiya agentliyidir”
Azərbaycan xəbər məkanında professional yanaşma tərzi ilə seçilən "Azəri-Press" agentliyinin (APA) fəaliyyətə başlamasından 13 il ötdü. "Azəri-Press" agentliyi (APA) MMC 2004-cü il yanvarın 8-də Ədliyyə Nazirliyində qeydiyyatdan keçib və həmin il noyabrın 16-dan fəaliyyətə başlayıb.
Agentlik Azərbaycan, rus, ingilis, ərəb, fransız və erməni dillərində xəbər xidməti göstərir. Xəbər xidməti xüsusi bülletenlər və onlayn sistemi ilə həyata keçirilir. İnformasiya bloklarında Azərbaycanın siyasi, iqtisadi, sosial, mədəni və idman həyatına dair məlumatlar, regionda və dünyada baş verən hadisələrlə bağlı operativ xəbərlər əksini tapır.
"Azəri-Press" agentliyinin 13 yaşı münasibətilə müsahiblərimiz "Bakı-Xəbər" vasitəsilə APA-nı təbrik etdilər.
Milli Məclisin İqtisadi siyasət, sənaye və sahibkarlıq komitəsinin üzvü Rüfət Quliyev “Bakı-Xəbər” vasitəsilə "Azəri-Press" agentliyinin 13 yaşı tamam olmasını təbrik etdi: “APA xəbər portallarında öz sözünü deyib. Bu gün, demək olar ki, kütləvi informasiya vasitələrinin əksəriyyəti məhz APA-ya istinad edir.
Adıçəkilən informasiya agentliyi ölkədə baş verən hadisələrə operativ və dəqiq yanaşması ilə diqqət çəkməyi və sevilməyi bacarıb.
13 il ərzində bu qədər sevgi qazanıblarsa, gələcəkdə bundan da artıq uğurlar qazanacaqlar. Mən də öz adımdan "Azəri-Press" agentliyini təbrik edirəm”.
Millət vəkili Aydın Mirzəzadənin sözlərinə görə, cəmiyyətin maarifləndirilməsində, xəbər istehsalında APA-nın müstəsna rolu var: “Azərbaycan mediasını APA-sız təsəvvür etmək çətindir. “APA Holding”in rəhbəri Vüsalə Mahirqızı başda olmaqla, bütün kollektivə uğurlar arzu edirəm. "Azəri-Press" agentliyinin uğurları hələ qabaqdadır. Sizin vasitənizlə APA-nı təbrik edirəm".
YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə bildirdi ki, APA informasiya agentliyi artıq 13 ili geridə qoyub: “İnformasiya istehsalçısı kimi Azərbaycan informasiya cəmiyyətində tək Azərbaycanda deyil, dünyada nüfuz qazanan informasiya agentliyidir. Dəqiq və dürüstlüyü ilə APA hər zaman seçilib. Bəllidir ki, “APA Holding”in tərkibində “Lent.az”, “Kulis.az”, APA.TV və digər media qurumları cəmləşib. Bu media qurumları peşəkar şəkildə fəaliyyət göstərirlər”.
V.Rəhimzadənin sözlərinə görə, zaman baxımından 13 il elə böyük bir müddət deyil. Bu müddət ərzində belə bir kollektivi formalaşdırmaq, cəmiyyətin inanaraq oxuduğu informasiya agentliyini yaratmaq elə də asan deyil: “Hesab edirəm ki, Vüsalə Mahirqızı bunu bacarıb. Vüsalı xanımın timsalında “APA Holding”in bütün əməkdaşlarını təbrik edirəm. Eyni zamanda, oxucuları da ürəkdən təbrik edirəm. APA Azərbaycan ictimai-siyasi həyatında nüfuz qazanıb və media sahəsində peşəkarcasına formalaşıb. Adıçəkilən informasiya agentliyinin kollektivi peşəkarlardan ibarətdir”.
Həmsöhbətimiz onu da vurğuladı ki, APA-da çalışan peşəkar jurnalistlərin dövlətə, dövlətçiliyə sədaqət nümayiş etdirməsi də böyük önəm daşıyır: “Həmçinin, APA tək ölkə ictimaiyyəti üçün deyil, dünya üçün böyük önəm kəsb edən informasiya agentliyidir. Bəllidir ki, APA bir neçə dildə fəaliyyət göstərir. Bu böyük uğurdur. Ümumiyyətlə, beynəlxalq aləmə xarici dillərdə xəbərin yayılması çox vacibdir. Beynəlxalq aləmə çıxışla bağlı qarşıya qoyulan məqsədi APA böyük uğurla həyata keçirir”.
V.Rəhimzadə bildirdi ki, APA tək ölkənin deyil, beynəlxalq aləmin də informasiya qidasını təmin edə bilir.
Media kapitanı APA-nın 13 yaşı tamam olması münasibətilə tək “APA Holding”in kollektivini deyil, bütün jurnalistləri və oxucuları da təbrik etdi.
Günel CƏLİLOVA
