Azər Həsrət: “Hikmət müəllimin təklifini normal qarşılayıram və hesab edirəm ki, çox yerində verilmiş təklifdir”
Milli Məclisin iclasında Azərbaycan mətbuatına dövlət büdcəsindən maliyyənin artırılması təklif olunub. Milli Məclisin Hüquq siyasəti və dövlət quruculuğu, İnsan hüquqları, Gənclər və idman, Regional məsələlər və Mədəniyyət komitələrinin birgə iclasında büdcə zərfinə daxil olan qanun layihələrinin müzakirəsi zamanı deputat Hikmət Məmmədov bildirib ki, informasiya təhlükəsizliyinin təminatında kütləvi informasiya vasitələrinin rolu böyükdür. Bu səbəbdən kütləvi informasiya vasitələrinə maliyyə vəsaitlərinin artırılmasına ehtiyac var.
H.Məmmədov bildirib ki, Azərbaycanda çap mediasının saxlanmasına, bu sahənin inkişaf etdirilməsinə görə Prezident yanında KİV-in İnkişafına Dövlət Dəstəyi Fonduna dövlət tərəfindən maliyyə vəsaiti ayrılır: “Hesab edirəm ki, ayrılan vəsait yetərincə deyil. Ölkə mediasının daha da inkişaf etdirilməsi məqsədilə KİV-in İnkişafına Dövlət Dəstəyi Fonduna (KİVDF) ayrılan vəsait artırılmalıdır”.
H.Məmmədovun KİVDF-yə ayrılan vəsaitin artırılması ilə bağlı təklifinə media ekspertlərinın mövqeyini öyrənmək maraqlı olardı.
Media məsələləri üzrə ekspert Azər Həsrət qəzetimizə açıqlamasında bildirdi ki, bu istiqamətdə müzakirələr çoxdandır aparılır: “Biz demək olar ki, prosesin birinci mərhələsini keçmişik. Yəni bir neçə ildir KİVDF xəttilə qəzetlərə birdəfəlik maddi yardımlar edilir. Məhz bunun nəticəsidir ki, biz ənənəvi çap media nümunələrimizin fəaliyyətini qoruyub saxlaya bildik. Ancaq müasirləşən media və qloballaşan dünya mediaya daha yeni yanaşmanın labüdlüyünü ortaya qoyur. Bu baxımdan da Hikmət müəllimin təklifini normal qarşılayıram və hesab edirəm ki, çox yerində verilmiş təklifdir. Həqiqətən də Azərbaycanın artan iqtisadi imkanları, ölkənin özəlliklə də beynəlxalq müstəvidə media fəaliyyətinə ciddi ehtiyacının artması bu təklifi dəstəkləmək üçün yetərlidir. Artıq biz yeni media dövründə yaşayırıq və böyük pullar olmadan burada böyük işlərdən danışmaq olmaz. Bizim ölkənin həm də təcavüzə məruz qaldığı, düşmənin durmadan informasiya müharibəsi apardığını da bura əlavə etsək, səsləndirilən təklifin yerinə düşməsi yönündə arqumentlərimiz daha da möhkəmlənər”.
Azər Həsrət bu yardımın elektron media nümunələrinə də şamil olunmasını istəyir: “Buna mütləq ehtiyac var. Çünki artıq yeni medianın çağıdır və biz bu məsələdə geri qalsaq, informasiya savaşı cəbhəsində ciddi itkilərimiz olacaq”.
Məhəmmədəli QƏRİBLİ
