Azər Həsrət: "Bütün jurnalistləri bu istiqamətdə fəal olmağa çağırıram"
Məlum olduğu kimi, bir qrup Azərbaycan jurnalisti sosial şəbəkələrdə yeni təşəbbüsə imza atıblar. Onlar "İlham Əliyevin dostları" səhifəsini yaradıblar. "Facebook" və "İnstagram", eyni zamanda "Twitter"də Azərbaycan Prezidentinin jurnalistlərlə görüşləri, kütləvi informasiya vasitələrinin işçilərinin sosial vəziyyətinin yaxşılaşdırılması üçün görülən işlər, habelə dövlət başçısı haqqında jurnalistlərin qələmə aldığı yazılar yerləşdirilir.
Səhifələrin əsas məqsədi Azərbaycan Prezidentinin media sahəsində strategiyasını təbliğ etməkdir.
Qısa müddətdə fəaliyyət göstərən "İlham Əliyevin dostları" "Facebook" səhifəsinə bu sosial şəbəkənin minlərlə istifadəçisi daxil olub və bəyənib. "Azərbaycan Prezidenti İlham Əliyev jurnalistlərin dostu olmaqla yanaşı, ölkədə söz və ifadə azadlığının qorunmasının ən böyük təminatçısıdır",
"Prezidentimizi sevək, dövlətə və dövlətçiliyə sədaqət göstərmək ümdə borcumuzdur", "Dövlət başçısının jurnalistlərin dostu olması mətbuatın ən böyük uduşudur", "Dost olmaq da ayrı qürurdur!" - başlıqlı bölmələr Azərbaycan Prezidentinin medianın dostu seçilməsinə həsr olunur.
Bir jurnalist öz fikirlərini belə ifadə edir: "Xalqını sevən, ölkəsini qürurla təmsil etməkdən usanmayan, millətinə düşmənlik edən daxili və xarici ünsürlərin gözlərini oymaya hər an hazır olan, 7-dən 77-yə hər kəsin qayğısına qalan və bundan xüsusi zövq alan Azərbaycan Respublikasının Prezidenti İlham Əliyev mənim də bir dostumdur".
Bundan başqa, səhifədə dövlət başçısının fəaliyyətini əks etdirən fotoalbomlar və müxtəlif KİV-lərdə dərc edilən materiallar da yer alıb. Səhifədə artıq Prezidentin rəsmi saytına istinadən məktublar, sənədlər, müxtəlif KİV-lərdə və mətbuata dövlət qayğısını əks etdirən məqalələr yerləşdirilib.
Azərbaycan Mətbuat Şurası mətbuat orqanlarının və ictimaiyyətin nümayəndələrini jurnalistlərin bu təşəbbüsünə qoşulmağa çağırır, Azərbaycan dövlətinin media siyasətini dəstəkləməyə dəvət edir.
Yeni yaradılan səhifə barədə fikirlərini qəzetimizlə bölüşən media eksperti Azər Həsrət qəzetimizə açıqlamasında bildirdi ki, sosial şəbəkələrdə bu adda qrupların yaradılması çox təqdir ediləsi haldır: "Bilirsiniz ki, cənab Prezident bir neçə dəfə jurnalistlərin dostu seçilib. Yəni Azərbaycan jurnalistləri cənab İlham Əliyevi öz dostları sırasında görmək istədiklərini bəyan ediblər. Bu dostluq sadə sözdə ifadə olunmur. Jurnalistlər arasında keçirilən rəy sorğusunun nəticəsinə uyğun olaraq belə qərara gəlinib. Bu prosedur anket sorğuları əsasında həyata keçirilib. Təbii ki, ölkə başçısı da jurnalistlərə yönəlik əsl dost addımları atır. Bir çox jurnalistin ev aldığı ikinci binanın tikintisi və paylanması prosesini də buna misal göstərə bilərik. Məhz ikinci bina ilə bağlı proseslərin başa çatmasından sonra bir qrup jurnalist belə qrupların yaradılması qərarına gəlib. Yəni bu, jurnalistlərin öz təşəbbüsü olub. Təbii ki, Mətbuat Şurası da bu məsələyə dəstək verir. Jurnalistlər hesab edir ki, belə bir qrup vasitəsilə fikirlərini lazımi instansiyalara daha tez çatdıra biləcəklər. Mən də belə qrupların perspektivinə və özünə geniş auditoriya toplayacağına inanıram. Bütün jurnalistləri bu istiqamətdə fəal olmağa çağırıram".
Məhəmmədəli QƏRİBLİ
