Akif Nağı: "Ermənilərin törətdikləri vəhşiliyin qarşısında özlərini təmizə çaxaracaq hansısa arqumenti yoxdur"
Azərbaycan Mətbuat Şurası 4 iyul 2017-ci il tarixdə Ermənistan silahlı qüvvələrinin Füzuli rayonunun Alxanlı kəndini atəşə tutması nəticəsində mülki şəxslərin - Quliyeva Sahibə İdris qızının, onun nəvəsi 2 yaşlı Quliyeva Zəhra Elnur qızının həlak olması, Quliyeva Səlminaz İltifat qızının isə yaralanması faktı ilə bağlı bəyanat yayıb.
Dünyanın media ictimaiyyətinə ünvanlanmış bəyanatda bildirilir:
"...Göründüyü kimi, Ermənistan öz terrorçu mövqeyinin nümayişindən çəkinmir, günahsız insanların, ələlxüsus uşaqların qanını tökməkdə davam edir. Sıralarında Azərbaycanın aparıcı kütləvi informasiya vasitələrini, jurnalist təşkilatlarını birləşdirən Mətbuat Şurası bu vandalizm aktını qətiyyətlə pisləyir, dünyanın media ictimaiyyətini Ermənistanın işğalçı və terrorçu mahiyyətini bir daha sübut etməyə çağırır.
Ermənistanın əhaliyə və mülki obyektlərə birbaşa və qəsdən hücumları beynəlxalq humanitar hüquqa, insan haqlarına və fundamental azadlıqlara açıq həqarətdir, Dağlıq Qarabağ münaqişəsi üzrə sülh prosesinə zərbədir. Azyaşlı uşağın partlayıcı qurğu ilə qətlə yetirilməsi birbaşa terror əməlidir. Mətbuat Şurası üzv olduğu Dünya Mətbuat Şuraları Assosiasiyasını, Avropa Mətbuat Şuraları Alyansını, digər beynəlxalq təşkilatları, o cümlədən jurnalistika sahəsində ixtisaslaşmış bütün xarici qurumları Ermənistanın minlərlə məsum azərbaycanlı uşağın qətlinə səbəb olmuş işğalçılıq siyasətinə biganə qalmamağa səsləyir. Şura hesab edir ki, dünyanın media ictimaiyyətinin hadisə ilə bağlı yüksək həssaslığı yeni insan faciələrinin yaşanmasının qarşısını ala bilər. Mətbuat Şurası həmçinin yerli kütləvi informasiya vasitələrinə də üz tutaraq bu vandalizm aktını geniş, peşəkarlıqla işıqlandırmağa, onun miqyasını özlərinin beynəlxalq tərəfdaşları ilə bölüşməyə, mövcud istiqamətdə daha fəal mövqe tutmağa çağırır".
Bu çağırışdan sonra MŞ-nin müraciət etdiyi beynəlxalq media qurumları hansı addımları atmalıdır?
Qarabağ Azadlıq Təşkilatının sədri Akif Nağı qəzetimizə açıqlamasında bildirdi ki, qaldırılan bu təşəbbüsü dəstəkləyir: "Çox vacib bir məsələdir. Çünki biz eyni zamanda düşmənlə informasiya savaşı aparırıq. Baş verən hadisə erməni vəhşiliyinin bariz nümunəsidir. Bunun dünya ictimaiyyətinə çatdırılmasına böyük ehtiyac var. Hərə öz imkanları daxilində çalışmalıdır ki, bu məsələ beynəlxalq arenaya çıxsın. Düzdür, bu bizə işğal altındakı torpaqları geri qaytarmayacaq, ancaq xeyrimizə işləyəcək faktordur. Çalışmaq lazımdır ki, verilən bəyanatın icrası da olsun. Təbii ki, beynəlxalq media orqanları bu məsələyə müsbət reaksiya verməlidir. Çünki jurnalistikanın təməl haqları bunu tələb edir. Biz bu müraciətlə onlardan qeyri-adi nəsə istəmirik. Həqiqətin yanında olmalarını gözləyirik. Əminəm ki, özünə və peşəsinə hörmət edən hər bir beynəlxalq jurnalist qurumu bu məsələdə həqiqətin yanında olmağa çalışacaq. Ermənilərin törətdikləri vəhşiliyin qarşısında özlərini təmizə çaxaracaq hansısa arqumenti yoxdur".
Məhəmmədəli QƏRİBLİ
mso-font-kerning:0pt;mso-ansi-language:AZ-LATIN;mso-fareast-language: RU'>Tahir TAĞIYEV
