Türkiyə prezidenti Rəcəb Tayyib Ərdoğan Qətərin ”Əl-Cəzirə” telekanalına müsahibə verib.
Baki-xeber.com-un ria.ru saytına istinadən xəbərinə görə, müsahibəsində prezident bir sıra maraqlı açıqlamalar verib. Ərdoğan deyib ki, çevriliş xəbərini ona kürəkəni verib, lakin o bunu əvvəlcə ciddi qəbul etməyib. "Lakin əlbəttə ki, sonradan biz bunu təsdiqləyən məlumatlar əldə etdik” o deyib.
Türkiyə prezidenti Qətər televiziyasına onu da bildirib ki, çevriliş cəhdində bir sıra ölkələrin əli olduğunu düşünür. Lakin o, hansı ölkələri nəzərdə tutduğuna aydınlıq gətirməyib.
Prezident Ərdoğan "Əl-Cəzirə”yə Rusiya təyyarəsini vuran pilotlardan da bəhs edib. Bildirib ki, onlar nurçuların dini lideri Fətullah Gülənə bağlı olublar. Türkiyə prezidenti müsahibəsində onu da deyib ki, parlament qərar qəbul edərsə, çevriliş cəhdi edənlər barəsində ölüm hökmünü imzalayacaq. Bu baş verərsə Türkiyənin Aİ üzvlüyünün mümknsüzlüyi ilə bağlı suala cavabında isə Türkiyə prezidenti bunları deyib:”Avropa İttifaqı bütün dünya demək deyil”. Onun sözlərinə görə, Türkiyə 53 ildir Aİ üzvlüyünə can atsa da, bu hələ də mümkün olmayıb.
Qeyd edək ki, Türkiyənin Milli Kəşfiyyat İdarəsi cümə günü saat 16.00-da gecə saat 3-də çevriliş cəhdinin olacağı barədə məlumat əldə edib. Planın açılması isə qiyamçıları zamanlamada dəyişiklik etməyə vadar edib.
