Ötən gecə Türkiyədə dəhşətli olaylar yaşandı. Baki-xeber.com hadisələri xronoloji qaydada sizlərə təqdim edir.
Beləliklə, ilk toqquşmalar barədə xəbər Bakı vaxtı ilə 12 radələrində gəlməyə başladı. Yerli KİV xəbər verirdi ki, Ankarada atışma başlayıb. Havaya hərbi helikopterlər qalxıb. Təhlükəsizlik xidməti və polis orqanları rəhbərləri təcili toplantıya çağırılıb. Bundan bir neçə dəqiqə sonra sosial şəbəkələrə giriş məhdudlaşdırıldı. Bş nazir Binəli Yıldırım ölkədə hərbi çevriliş cəhdi barədə açıqlama yaydı.
Saat 24:15-də Atatürk Hava Limanına zirehli texnika zirehli texnika gətirildi. Eyni zamanda internetdə Ankara küçələrində tankların görüntüsü yayıldı. 24:25-də TRT-nin yayımı dayandırıldı. 4 dəqiqə sonra aeroport qapadıldı və gələn təyyarələr geri dönməli oldu. Türkiyə Baş Qərargahı ölkədə dövlət çevrilişi olduğu barədə açıqlama yaydı.
24:50-də üsyançı hərbçilər Baş Qərargah rəisi Hulusi Akarı girov götürdü. 01:20-də bütün Türkiyə ərazisində komendant saatı elan olundu. Hərbçilər İstanbulda aeroport və digər strateji obyektlər üzərində nəzarəti ələ keçirdilər. Efiri qəfil dayandırılan dövlət televiziyasında hərbçilərin devrilən hökuməti ittiham edən müraciəti oxunur. Bundan 10 dəqiqə sonra prezident Ərdoğanın telefonla xalqa müraciəti yayımlanır. Ardınca isə dərhal əhali küçələrə axışaraq zirehli texnikaya müqavimət göstərməyə başlayır...
Saat 01:58-də Ankarada efiri də silkələyən güclü partlayış səsi eşidildi. Fox TV-nin binanın damından yayımladığı reportajda tankların Parlament binasini mühasirəyə aldığı xəbər verilir. Çox keçmədən ikinci partlayış eşidildi. Ardınca İstanbul Hava limanında atışma getdiyi xəbəri gəlir. Bu arada Ədliyyə Nazirliyi baş verənlərin arxasında ABŞ-ın Pensilvaniya ştatında yaşayan dini lider Fətullah Gülənin durduğu barədə bəyanat yayır. Saat 03:00 radələrində Ankara səmasında hərbi helikopterə yerdən dalbadal atəş açılır. Canlı efir küçədə tankın minik avtomobilini necə sürüyərək yolun kənarına tulladığını yayımlayır. Dinc sakinlərin xəsarət alması xəbərləri gəlir. 20 dəqiqə sonra çevriliş liderlərindən bir neçəsinin tutulduğu xəbəri yayılır. İstanbul valisi çevrilişin fiaskosu barədə bəyanat verir. 03:45-də Parlament binasına bomba atılır və helikopterdən düzənli atəş açılır. Millət vəkilləri binanın alt qatındakı sığınacağa endirilir. Ankarada partlayış və atışma səsləri ara vermir. 04:30-da Ərdoğanın təyyarəsi Atatürk Hava Limanına enir. Həmin anlarda hava limanında və Taksim meydanında eyni anda partlayışlar baş verir. Üsyançılar "Hürriyet” redaksiyasını və CNN Turk telekanalını ələ keçirir. "Biz efiri tərk etməyə məcbur olduq, çünki bizi silahla hədələyirdilər. O səbəbdən efirə yalnız mikrofonla çıxa bilirdik. Çox qəribə hadisələr baş verirdi. Onlar hərbi helikopterdə gəldilər. Başçıları mayor idi. Binanın içində güllə səsləri eşidilirdi. Onlar qapını sındıraraq içəri daxil oldular. Bir polis yaralansa da, şükür qurbansız ötüşdük. Polis müqavimət göstərsə də, hərbçilər çox olduğundan onlarla bacara bilmədi. Görünürdü ki, studiyanı nəzarətə götürmək göstərişi alıblar” – deyə CNN Türk-ün baş redaktoru Alparslan Akkuş efirin bərpasının ardından bildirir.
Daha sonra prezident Ərdoğan Atatürk aeroportundan xalqa müraciət edir. Səhər saat 5 radələrində prokurorluğun açıqlamasında 42 nəfərin həlak olması barədə xəbər verilir. Bir neçə dəqiqə sonra bu rəqəm 60-a qalxır. 130 nəfərin həbsi barədə xəbər verilir...
Hazırda Türkiyədə həyatın qismən normal axara düşdüyü xəbər verilir. Lakin o da bildirilir ki, prezident Ərdoğan sakinlərə müraciət edərək, küçələrdən yığışmamağa, sona qədər hakimiyyətin yanında olmağa çağırıb.
Gecənin çəkilmiş görüntülərini sizlərə təqdim edirik:
