İyulun 15-də Gəncədə "Yerli icra hakimiyyəti orqanları ilə kütləvi informasiya vasitələri arasında əməkdaşlığın genişləndirilməsi" mövzusunda regional konfrans keçirilib. Konfrans iştirakçıları əvvəlcə ümummilli lider Heydər Əliyevin abidəsini ziyarət edib, önünə gül-çiçək dəstələri düzüblər.
Heydər Əliyev Mərkəzində keçirilən konfransı Gəncə Şəhər İcra Hakimiyyətinin başçısı Elmar Vəliyev açaraq tədbirin 22 iyul - Milli Mətbuat Günü ərəfəsində keçirildiyini söyləyib. O, əsası ulu öndər Heydər Əliyev tərəfindən qoyulan sosial-iqtisadi siyasətin bu gün Prezident İlham Əliyev tərəfindən uğurla davam etdirildiyini qeyd edib. Natiq deyib ki, ölkədə yürüdülən məqsədyönlü daxili və xarici siyasət nəticəsində Azərbaycan Respublikası sürətlə inkişaf edir və beynəlxalq aləmdə özünə layiqli yer tutub. E.Vəliyev ümummilli lider Heydər Əliyevin hakimiyyətinin ilk illərindən başlayaraq ölkədə kütləvi informasiya vasitələrinin inkişafı, söz, mətbuat azadlığının təmin edilməsi, qanunvericilik bazasının formalaşdırılması istiqamətində gördüyü mühüm işlərdən, aparılan islahatlardan danışıb, bu siyasətin Prezident İlham Əliyev tərəfindən davam etdirildiyini vurğulayıb. İcra Hakimiyyətinin başçısı Azərbaycanın bütün sahələrdə əldə etdiyi uğurların, ölkəmizlə bağlı həqiqətlərin dünya ictimaiyyətinə çatdırılmasında kütləvi informasiya vasitələrinin böyük rolu olduğunu qeyd edib.
Prezident İlham Əliyevin mətbuat işçilərinə göstərdiyi hərtərəfli diqqət və qayğıdan Gəncədə fəaliyyət göstərən media nümayəndələri də faydalanır. Son vaxtlar tikilib istifadəyə verilən müasir mətbuat evi də şəhərdə kütləvi informasiya vasitələri nümayəndələrinə göstərilən diqqətin nəticəsidir. Hazırda Gəncə şəhərində rus dilində "Novosti Qyandja", "Gəncənin səsi" qəzetləri işıq üzü görür, Azərbaycan həqiqətlərini dünyaya çatdıran, paytaxtda nəşr olunan qəzetlərin, eləcə də televiziya və radio kanallarının, beynəlxalq agentliklərin müxbir məntəqələri, təmsilçiləri fəaliyyət göstərir. Çıxışının sonunda E.Vəliyev hər kəs üçün sevindirici bir xəbəri konfrans iştirakçılarının diqqətinə çatdıraraq bildirib ki, UNESCO-nun qərarına əsasən, Gəncə 2018-ci ildə "Dünyanın Kitab Paytaxtı" elan edilib.
Konfransda çıxış edən Azərbaycan Respublikası Prezidenti Administrasiyasının İctimai-siyasi məsələlər şöbəsinin müdir müavini Vüqar Əliyev aktual mövzuya həsr edilmiş belə bir tədbirin qədimliyini qoruyub saxlamaqla inkişaf edən Gəncə şəhərində keçirilməsinin önəmini qeyd edib. Konfransda müzakirə olunan mövzu Azərbaycan cəmiyyəti üçün böyük əhəmiyyət kəsb edir. Çünki dövlət siyasətini həyata keçirən yerli icra hakimiyyəti orqanları ilə ictimai rəyin formalaşdırılmasını təmin edən media ilə əməkdaşlıq məsələləri müzakirə olunacaq. V.Əliyev dövlətin, xüsusilə Prezident İlham Əliyevin medianın inkişafına, jurnalistlərə diqqət və qayğısından söhbət açaraq deyib ki, hər il Azərbaycanda milli mətbuatın ildönümü ərəfəsində ölkədə azad mətbuatın inkişafında göstərdikləri xidmətlərə görə çoxlu sayda jurnalist, media nümayəndəsi dövlət tərəfindən müxtəlif fəxri adlara layiq görülür, onların sosial rifahı və mənzil şəraitinin yaxşılaşdırılması istiqamətində mühüm işlər görülür. Şöbə müdirinin müavini bildirib ki, Azərbaycanda azad medianın təşəkkül tapması və bunun üçün müvafiq qanunvericiliyin yaradılması, həmçinin, bir sıra təşkilati işlərin həyata keçirilməsi ulu öndər Heydər Əliyevin fəaliyyətinin əsas istiqamətlərindən biri olub. Azərbaycan mətbuatının keçdiyi zəngin inkişaf yoluna nəzər salan V.Əliyev qeyd edib ki, ölkədə demokratik cəmiyyətin formalaşdırılmasında görülən işlərin mühüm istiqamətlərindən biri də söz və mətbuat, ifadə azadlığı, müstəqil media, həmçinin, jurnalistlər üçün sərbəst fəaliyyət sferasının formalaşdırılması təşkil edir. Məhz 1993-2003-cü illərdə ölkədə müstəqil mətbuatın mövcud olması üçün ümummilli lider Heydər Əliyev tərəfindən bir sıra mühüm addımlar atılıb, senzura ləğv edilib, liberal qanunvericilik formalaşıb. 1995-ci ildə Azərbaycan Respublikasının Konstitusiyasında söz və mətbuat azadlığının təsbit edilməsi, 1998-ci ildə mətbuat üzərindən senzuranın ləğv olunması, 1999-cu ildə dünyada ən liberal hesab oluna biləcək kütləvi informasiya vasitələri haqqında qanunun qəbul olunması, 2000-ci ildə media üzərindən dövlət nəzarətinin götürülməsi, Mətbuat və İnformasiya Nazirliyinin ləğv olunması Azərbaycan mətbuat tarixinə ən parlaq səhifələr kimi daxil olub. Bu gün ulu öndər Heydər Əliyevin siyasətini uğurla davam etdirən Prezident İlham Əliyev medianın inkişafına böyük diqqət və qayğı göstərir. Hazırda Azərbaycanda müstəqil, plüralist, lakin dövrün yenilikləri ilə səsləşən, ölkənin milli maraqlarına xidmət edən medianın inkişafına şərait yaradılır.
Sonda V.Əliyev bildirib ki, qlobal informasiya məkanında Azərbaycanın ümumi maraqlarına xidmət göstərən milli informasiya məkanının yaradılması və yad təsirlərdən qorunması istər dövlətin, istərsə də peşəkar media nümayəndələrinin üzərinə böyük məsuliyyət qoyur.
Konfransda çıxış edən Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru V.Səfərli bildirib ki, KİVDF bilavasitə yerli icra hakimiyyəti orqanları ilə KİV arasında əlaqələrin genişləndirilməsi istiqamətində bir çox işlər görür. KİVDF tərəfindən 2015-ci ildə paytaxt və bölgələrdə 11 tədbir keçirilib. Bununla bərabər müxtəlif nazirliklər və yerli icra hakimiyyətləri ilə birgə müsabiqələr elan edilib. Növbəti müsabiqə isə Gəncə Şəhər İcra hakimiyyəti ilə KİVDF arasında əməkdaşlıq nəticəsində mümkün olub. Sonra V.Səfərli "Gəncə şəhərinin sosial-iqtisadi inkişafı: real vəziyyət və perspektivlər" mövzusunda elan olunan müsabiqənin nəticələri haqqında məlumat verib. Qeyd edib ki, 44 jurnalist 30 kütləvi informasiya vasitəsində müsabiqə üçün məqalələr təqdim edib. Təqdim olunan yazılarda son illərdə Gəncə şəhərində həyata keçirilən nəhəng quruculuq, abadlıq işləri, həmçinin, gələcək perspektivlər əks olunub. Müsabiqənin şərtlərinə görə, 6 əsas, 10 həvəsləndirici mükafat nəzərdə tutulsa da, təqdim olunan yazılar ekspertlər tərəfindən qiymətləndirildikdən sonra məqalələrin əhatəliliyi nəzərə alınaraq həvəsləndirici mükafat alanların sayı daha 6 nəfər artırılıb. Sonra V.Səfərli media və icra hakimiyyəti orqanları arasında əməkdaşlığın inkişafında fəal roluna görə Gəncə Şəhər İcra Hakimiyyətinin başçısı E.Vəliyevə KİVDF-nin diplomunu təqdim edib.
Mətbuat Şurasının sədri, Milli Məclisin deputatı Əflatun Amaşov çıxışında Azərbaycan mətbuatının keçdiyi inkişaf yolundan danışıb. O deyib ki, hər bir xalqın inkişafında mətbuatın mühüm rolu var. Azərbaycan xalqının inkişafında da "Əkinçi" qəzeti mühüm rol oynayıb. Bir neçə gündən sonra ölkəmizdə bu qəzetin yarandığı gün - Milli Mətbuat Günü qeyd ediləcək.
Mətbuat Şurasının sədri Gəncədə son illərdə dinamik inkişafın mətbuatda geniş əks olunduğunu diqqətə çatdırıb. Bununla yanaşı, Ə.Amaşov cəmiyyətin həyatında medianın oynadığı rol barədə də iştirakçıları məlumatlandırıb. Çıxışlardan sonra mövzu ətrafında müzakirələr aparılıb. Daha sonra "Gəncə şəhərinin sosial-iqtisadi inkişafı: real vəziyyət və perspektivlər" mövzusunda müsabiqənin qaliblərinə mükafatlar təqdim edilib.
Movqe.az
