Bastiliya qalasının alınması günü Fransada terror aktının törədilməsi hakimiyyətin zəifliyinin göstəricisidir. Hamıya məlumdur ki, Fransua Olland çox zəif prezidentdir. Bu zəiflik özünü Nikola Sarkozinin vaxtında da büruzə verirdi. Amma nə Jak Şirak, nə də Fransua Mitteranın vaxtında belə hallar yox idi. Düzdür, o vaxt ortalıqla belə terror təşkilatları da yox idi. Amma bununla belə, hakimiyyətin zəifliyi terrorçuların əl-ayaq açmasına şərait yaradıb. Digər səbəb isə xüsusi xidmət orqanlarının öz işini düzgün qura bilməməsidir. Mənim fikrimcə, Nitsada törədilən terror aktı ilk növbədə Fransa xüsusi xidmət orqanlarının buraxdığı səhvlərin nəticəsidir.
Bunu Milli.Az-a açıqlamasında sabiq xüsusi xidmət orqanı əməkdaşı, təhlükəsizlik və regional geosiyasət məsələləri üzrə ekspert Arzu Nağıyev iyulun 14-də gecə Fransanın Nitsa şəhərində çoxsaylı insan ölümü və xəsarətləri ilə nəticələnən terror aktı ilə bağlı məsələləri şərh edərkən deyib.
Ekspert farnsız xüsusi xidmət orqanlarının işinin bərbad olmasını belə əsaslandırıb: "Nitsada terror aktını törədən şəxsin vaxtilə Tunisdən gəlmiş Fransa vətəndaşı olduğu deyilir. Adətən xüsusi xidmət orqanlarının işində əsas istiqamət ya hansısa xətt, ya da ərazi üzrə olur. Əgər xüsusi xidmət orqanları bu xəttə lazımi adamları deyil, özünün 7-ci nəsildən olan aristokratlarını götürürsə, deməli, müvafiq əməliyyat şəraitinə nəzarət edə bilmir. Əgər həqiqətən də xüsusi xidmət orqanları arasında Tunis icmasından və digər icmalardan olan vətəndaşlar və ya xüsusi məlumat verənlər olsaydı, yəqin ki, belə bir hadisə baş verməzdi. Bundan başqa, artıq terrorizmin forma və metodları dəyişir. Terror təkcə partlayışlarla deyil, digər üsullarla, yollarla da həyata keçirilir. Yəni iş yalnız təkcə partlayıcı qurğular axtarmaqla bitmir".
A.Nağıyevin qənaətincə, hadisənin "İŞİD" (terror təşkilatı) tərəfindən törədilməsi fikri də kifayət qədər şübhəlidir: ""İŞİD" indi sanki bir nağıl qəhrəmanına çevrilib. Kim terror aktı törədirsə, bunu "İŞİD"in boynuna yıxmaqla özünü təmizə çıxarmağa çalışır. Heç bir dövlət xüsusi xidmət orqanı da özlərinin zəif bəndi olduğunu boynuna almaq istəmir. Halbuki bu yaxınlarda Fransa parlamentində xüsusi xidmət orqanlarının işinin zəifləyi barədə bir neçə dəfə bəyanatlar səslənib.
Terror təşkilatlarının hər birinin məqsədi yenə də mövcud hakimiyyətin zəifliyini göstərmək, özləri haqqında geniş məlumat verərək gündəmdə qalmaq və bu istiqamətdə müxtəlif işlər görməkdir. Ola bilər ki, bu aktı "İŞİD" öz üzərinə götürsün və "biz də varıq" desin. Amma dəst-xətt onlarınkına oxşamır. Çünki "İŞİD"in özü də artıq parçalanıb. Ondan başqa da terror təşkilatları, qruplar var ki, üzdə olmaq üçün və ya maliyyə dəstəyi almaq üçün "İŞİD"ə biət ediblər. Ona görə də bunun yalnız "İŞİD"in əl işi olduğunu hələ sübuta yetirmək lazımdır".
Qeyd edək ki, ötən gecə Fransanın Nitsa şəhərində terror aktı törədilib. Son məlumatlara görə, terror aktı nəticəsində 84 nəfər ölüb, 120 nəfərə yaxın xəsarət alıb. Məlumata əsasən, terrorçular yük avtomobili ilə Bastiliya qalasının alınması bayramı münasibəti ilə atəşfəşanlığı seyr etməyə toplaşmış insanların üzərinə sürərək onları əzib. Sonda atışma nəticəsində sürücü polis tərəfindən güllələnərək zərərsizləşdirilib. Terror aktına görə məsuliyyəti "İŞİD" terror təşkilatı öz üzərinə götürüb. Yük maşınını idarə edən şəxsin isə 31 yaşlı Tunis əsilli Nitsa şəhər sakini olduğu deyilir.
Milli.Az
