Rusiya Dağlıq Qarabağ münaqişəsinin nizamlanmasında maraqlıdır. Trend-in məlumatına görə, bunu Azərbaycan Prezidenti İlham Əliyev Bakıda Rusiyanın xarici işlər naziri Sergey Lavrovu qəbul edərkən deyib.
Dövlət başçısı il ərzində keçirilmiş görüşləri xatırladıb və qeyd edib ki, bu, iki ölkə arasında əlaqələrin necə inkişaf etdiyini göstərir.
Azərbaycan Prezidenti Rusiyanın Prezidenti Vladimir Putin və xarici işlər naziri Sergey Lavrovun Dağlıq Qarabağ münaqişəsinin nizamlanması üzrə səylərinə dəyər verdiyini və buna görə təşəkkür etdiyini bildirib.
İlham Əliyev danışıqlar prosesinin fəallaşdığını vurğulayıb: "Bu danışıqlar ən dinamik danışıqlardır”.
Azərbaycan Prezidenti, həmçinin ümid etdiyini bildirib ki, Dağlıq Qarabağ üzrə danışıqlarda müsbət dinamika davam edəcək.
Dövlət başçısı qeyd edib ki, Rusiya Dağlıq Qarabağ münaqişəsinin nizamlanmasında maraqlıdır.
İki ölkənin müxtəlif sahələrdə qarşılıqlı əlaqələrinə toxunan Prezident İlham Əliyev deyib ki, əsas vəzifə bu münasibətlərin möhkəmləndirilməsindən ibarətdir.
Azərbaycan Prezidenti Rusiya ilə münasibətləri dostluq və tərəfdaşlıq münasibətləri adlandırıb.
"Moskva Dağlıq Qarabağ münaqişəsinin tənzimlənməsi üzrə gələcək addımları daha dəqiq müəyyənləşdirməyə ümid edir”. Bunu isə Rusiyanın xarici işlər naziri Sergey Lavrov deyib.
Onun sözlərinə görə, münaqişənin nizamlanması prosesi davam edir və Rusiya Prezidenti danışıqlar prosesindən məmnundur.
S.Lavrov qeyd edib ki, məhz Rusiya Prezidentinin tapşırığı ilə İrəvana səfər edib və hazırda Bakıdadır: "Ümid edirik ki, bugünkü görüş Dağlıq Qarabağ münaqişəsinin nizamlanması üzrə gələcək addımları daha dəqiq müəyyənləşdirməyə imkan verəcək”.
O əlavə edib ki, Rusiya və Azərbaycan arasında münasibətlərdə ikitərəfli gündəlik çox sıxdır.
Nazir, həmçinin hökumətlərarası komissiyanın iclası və sentyabrda Bakıda keçiriləcək humanitar forum daxil olmaqla, qarşıdakı tədbirləri vurğulayıb: "Biz bütün istiqamətlərdə əməkdaşlığın inkişafında maraqlıyıq”.
Astanada keçiriləcək Xəzəryanı ölkələrin Xarici İşlər Nazirləri Şurasına toxunan nazir deyib ki, tərəflər səyləri davam etdirəcək və nəticə əldə etməyə çalışacaqlar.
