Ermənistanın hakimiyyət tərəfindən bağladılmış "Üçüncü Qüvvə Plyus” qəzeti digər saytlarda maraqlı ittihamla çıxış edib.
Vaqram Aqacanyan adlı müəllifin yazısında bildirildiyinə görə, Azərbaycanın erməni işğalındakı Kəlbəcər və Laçın rayonlarındakı mədənlərdən əldə edilən on tonlarla (!) qızıl müəmmalı şəkildə "yoxa çıxır”. Bu kontekstdə diqqəti aprel müharibəsinə yönəldən müəllif yazır ki, ərazısındən ağlagəlməz ölçüdə qiymətli metal çıxarılan "respublika”nın ordusunun bəzi üzvləri həmin günlərdə silah çatışmazlığı üzündən Azərbaycan Ordusunun qarşısında hətta kürək (lopatka) ilə "silahlanmalı” olub. Halbuki, onun yazdığına görə, elə dördgünlük müharibənin ilk günündən qondarma "respblikanın” "baş naziri” Araik Arutyun tərəfindən ordu üçün ianə yığılması məqsədilə operativ qərargah yaradılıb və bank hesabları açılıb. Bu qərargahın "həddindən artıq operativ” – elə aprelin 2-də yaradılmasını şübhəli hesab edən müəllif yazır ki, bu ya müharibənin başlayacağı barədə əvvəlcədən "respublika rəhbərliyində” məlumatın olmasının göstəricisidir, ya da ordunun pis vəziyyətdə olmasının yuxarı dairələrə də bəlli olduğunun sübutudur. Onun fikrincə, hər iki halda da ortaya suallar çıxır: atəşkəsdən ötən 22 illik müddət ərzində istər Ermənistan vətəndaşları, istərsə də diaspor təşkilatları vəsait yatırdığı halda ordusunu formalaşdıra bilməyən qondarma "respublika” 4 gündə hansı "nailiyyətlərə” ümid edirdi? Üstəlik müəllif bununla dünyadakı varlı ermənilərin etibarını itirdikləri üçün bundan sonra onların qondarma "respublika”ya yardımlarını davam etdirməyəcəyinə əmindir.
Yazıda rusiyalı araşdırmaçı Aleksandr Baliyevin Qarabağın qızıl mədənlərindən çıxarılan xam qızıl barədə statistikasından da iqtibas gətirilir. Baliyev yazır:”Dağlıq Qarabağda 30-dan artıq erməni kompaniyası qızıl və digər resurslar çıxarmaqla məşğuldur. Təkcə Ermənistanın FDM kompaniyası burada fəaliyyətə başladığı 2001-ci ildən bu günə kimi 16 tondan artıq qızıl istehsal edib, yalnız 2008-ci ildə isə 4 ton qiymətli metal çıxarıb”. Dağlıq Qarabağ ərazisində ümumilikdə 155 faydalı qazıntı yatağının olması barədə rusiyalı araşdırmaçının fikirlərinə diqqət çəkən müəllif ölkəsinin rəhbərliyinə bu sərvətlərin hara daşındığı və kimlərə ötürüldüyü barədə sual ünvanlamaqla yanaşı, Rusiyada hansısa yüksək vəzifəliərin iş kabinetini 3-4 kiloqramlıq "Kəlbəcər qızılının bəzədiyini” də xüsusilə vurğulayır.
Bütün bunlar isə Ermənistanda yeni bir qalmaqalın baş vermək üzrə olduğundan xəbər verir. Nəzərə alınsa ki, bu ölkədə həyat səviyyəsi hər keçən gün enişə doğru gedir, bu güzərana bu günə kimi səbəb göstərilən ordu quruculuğu isə elə aprel müharibəsinin ilk günündən "ianə qərargahı”nın yaradılması ilə özünü ifşa edib, o halda haqlı sualların miqyasının artaraq ölkədə böyük narazılıqlara yol açacağı günün uzaqda olmadığını deyə bilərik. Çünki sadə xalq artıq fərqindədir ki, hakimiyyət i təkcə işğal altında saxladığı Azərbaycan torpaqlarının sərvətlərini çapıb-talamır, eyni zamanda öz millətinin son qəpiyini də ordu quruculuğu adı altında ianə şəklində toplayaraq xaricə ötürməklə özünün gələcəyini qurur, onları isə mücərrəd bir gələcəyə məhkum edir.
Beləliklə, Ermənistan özünün işğalçı mahiyyətinin "qızıl dövrünə” qədəm qoyur. Amma təbii ki, bu qızıl "o qızıl”dan olmayacaq...
Samirə SƏFƏROVA
