Bu il martın 14-də gecə saatlarında "Təzadlar” qəzetinin baş redaktoru Asif Mərzilinin yaşadığı mənzili yandırmağa cəhd edənlər ötən gecə eyni saatda onun şəxsi avtomobilinə benzin tökərək yandırıblar...
Ölkə KİV-i martın 14-də gecə saat 02:50-də "Təzadlar” qəzetinin baş redaktoru Asif Mərzilinin yaşadığı mənzilə bir qrup şəxs tərəfindən basqın edilməsi və mənzilə benzin tökülərək od vurulması barədə məlumat vermişdi. Həmin vaxt təsadüfən bu yanğını görən qonşunun FHN-nin 101 xidmətinə zəng vurması, ardınca isə Asif Mərzilinin ailəsini yuxudan oyatması nəticəsində mənzilin yanaraq kül olmasının qarşısı alınmışdı.
Lakin sən demə, daha dəhşətli hadisə qabaqda imiş. Belə ki, ötən gecə (09.07.2016) saat 03:00-da eyni əməl təkrarlanaraq, bu dəfə baş redaktorun yaşadığı mənzilin qarşısında saxladığı şəxsi avtomobilinə od vurulub. Hadisə şahidi bildirib ki, yanğının digər avtomobillərə keçməsinin və partlayışla nəticələnməsinin qarşısı FHN-nin 2 yanğınsöndürən maşını və heyəti sayəsində alınıb.
"Təzadlar” hadisə barədə məlumat aldıqdan sonra jurnalistin özü ilə əlaqə saxlayıb. Asif Mərzili qəzetə faktı təsdiqləyib:
-Bəli, məlumat doğrudur. Gecə saat 03:16 radələrində həyətdən maşının siqnalizasiya səsini eşitdim və dərhal pəncərədən həyətə baxdım. Gördüm ki, maşın alovlanır. Dərhal vedrələrlə su daşıyıb söndürməyə çalışdıq. Lakin bu mümkün olmadı, avtomobilin benzin bakının partlama təhlükəsi olduğundan FHN-nin 101, ardınca da DİN-nin 102 xidmətinə zəng vurduq. 5-6 dəqiqə keçmiş 2 yanğınsöndürən və çoxsaylı polis əməkdaşları gəldilər. Yanğın, çətinliklə də olsa, söndürüldü, avtomobil tamamilə sıradan çıxarılıb. Xətai RPİ-nin müstəntiqləri ilkin ifadə aldılar, ekspertlər lazımi işlər gördülər... Təəssüf ki, bu cinayət hadisəsi eyni dəst-xətlə təkrarlanıb. Törədilmə vaxtı da eynidir, benzindən istifadə də... İstintaq gedir, başqa nə deyə bilərəm? Bu sui-qəsddir və əslində, hüquq mühafizə orqanlarına meydan oxumaqdır. Çünki martın 14-də baş vermiş cinayət hadisəsinin sifarişçisi qanun qarşısında oturdulsaydı, yəqin ki, həmin sifarişçi bu əməli təkrarlamazdı...
-Bəs martın 14-də mənzilinizin yandıırılması ilə bağlı olan cinayət işi nə yerdədir?
-Mətbuatdan da xəbər verildiyi kimi, həmin cinayət işi hazırda Bakı şəhər Baş Polis İdarəsi İstintaq İdarəsində istintaq olunur və o vaxt hadisənin ağırlıq dərəcəsi nəzərə alınaraq istintaq işi Xətai rayon Polis İdarəsindən alınaraq Bakı şəhər Baş Polis İdarəsinin İstintaq İdarəsinə verilib… Artıq xüsusilə mühüm işlər müstəntiqi Nizami Əbilovun dəvəti ilə iki dəfə ifadə vermişəm. Sonrakı dövrdə isə əlavə maddi sübutları və istintaq üçün zəruri olan məlumatları müstəntiqə çatdırmışam. Artıq müvafiq əməliyyat-istintaq hərəkətləri aparılıb, bəzi istiqamətlərdə davam etdirilir. Ən vacibi, hadisəni törədənlərin və bu qəsdi sifarişçisinin kimliyi barədə müəyyən məlumatlar əldə edilib və s. Sadəcə, istintaq sirri olduğundan təfsilatı ilə danışa bilmərəm… Onu da əlavə edim ki, bu cinayət işinin istintaqının gedişində cənab daxili işlər naziri Ramil Usubovun xüsusi nəzarətini hiss edirəm… Sizlər də başda olmaqla, həmkarlarıma təşəkkür edirəm ki, əvvəldən informasiya dəstəyini əsirgəməyiblər… Mətbuat Şurasının sədri, millət vəkili Əflatun Amaşov neçə dəfə istintaqın gedişi ilə maraqlanıb, Mətbuat Şurasının lazımi kömək və dəstək verməsini təklif edib… Hətta mənzil qərargahı Avropada yerləşən Beynəlxalq jurnalist təşkilatlarından məlum cinayət hadisəsi baş verən gün mənə zənglər edilib və baş verən cinayət hadisəsinin istintaqının gedişi barədə suallar veriblər, nə kimi köməyə və dəstəyə ehtiyac olduğunu təklif ediblər... Bildirmişəm ki, hələki istintaqın gedişindən narazılığım yoxdur, əksinə, hesab edirəm ki, Azərbaycanın hüquq mühafizə orqanları bütövlükdə jurnalistin peşə fəaliyyətinə, söz azadlığına qarşı yönəlmiş bu qəsdin sifarişçisinin tezliklə üzə çıxarılıb ifşa edilməsində maraqlıdır, inanıram ki, bu, tezliklə belə də olacaq… Lakin görünür bu cinayətin sifarişçisi nəyəsə arxayın olduğundan və əvvəlki cinayətin üstünün açılması yubandığından, arzusunu sona kimi yerinə yetirməkdə israrlı oldu. Düşünürəm ki, bu cinayət işində maraqlı olan sifarişçi artıq mənə-jurnalistə deyil, Azərbaycanın istintaq orqanlarına və bu istintaqa nəzarət edənlərə meydan oxuyur. Meydanda isə söz azadlığına, jurnalistə qarşı sui-qəsd, qisasçılıq var...
