"Ermənistan ATƏT PA-da səsvermə hüququndan məhrum edilə bilər”. Belə bir məqalə ilə ermənilərin lragir.am saytı çıxış edib. Məqalədə bildirilir ki, ATƏT PA-nın Tiflisdə keçirilən son toplantısının yekun bəyannaməsini Rusiya və Ermənistan imzalamayıb.
Aydınlıq üçün bildirək ki, yekun bəyannamə Qarabağ münaqişəsinin dinc yolla həlli, gərginliyin azaldılması və təmas xəttinə izləmə mexanizmlərinin yerləşdirilməsini nəzərdə tutur. Bu tələblərin əslində erməni tərəfinin istəklərilə üst-üstə düşdüyü deyilən məqalədə erməni nümayəndə heyətinin başçısı Artaşes Geqamyanın Rusiyanın yanında duraraq sənədi imzalamaması qınanır. Onların fikrincə, Rusiyanın bu məsələdə tutduğu mövqe "sülhməramlılar qarşılığında işğal altındakı ərazilər” istiqamətindədir və erməni tərəfi buna razılıq verməməlidir. Sözügedən sənədin imzalanması zamanı erməni tərəfinin Rusiyanın yanında durması isə bir məşhur Azərbaycan filmində "Qəqəni” adlandırılan personajın məsələnin mahiyyətinə varmadan "Mən Qəzənfər dayının fikrinə şərikəm” deməsi kimi maraqlı bir səhnənin ortaya çıxmasına səbəb olub.
Əslində erməni tərəfinin Rusiyanın vassalı olması yeni xəbər deyil, lakin bu ölkədə artıq bu həqiqətin açıq etiraf olunması yeni xəbər sayıla bilər. O üzdən də tezliklə Ermənistanda impiçment ittihamları baş qaldırarsa təəccüblənmək gərək deyil. Çünki elə sözügedən məqalədə də etiraf olunduğu kimi, son zamanlar az qala bütün beynəlxalq təşkilatlarda erməni nümayəndə heyətinin öz ölkəsinin deyil, Rusiyanın maraqlarından çıxış etməsi ardıcıl narazılıqlara yol açılır. Hətta məqalədə deyilir ki, Rusiya Ermənistan hökumətinin razılığı ilə de-fakto Ermənistanın suverenliyini ləğv edib, de-yure isə onu yalnız səs çoxluğu almaq məqsədilə saxlayır.
Beləliklə, məqalədə də deyildiyi kimi, Ermənistanda anti-Rusiya ovqatı yüksəlməkdədir və son zamanlar əsasən Qarabağ mövzusunda keçirilən beynəlxalq tədbirlərdə alınan qərarların erməninin deyil, həqiqətin yanında olması isə bu ovqatı getdikcə daha çox körükləyir. Maraqlıdır, bu vaxta qədər qarşısında "quyruq buladığı” Rusiyaya bundan sonra "buynuz göstərmək” yolunu seçən Ermənistan indi kimin forpostu (oxu kölgəsi) olmağı hədəfləyir?
Samirə
