Prezidentlərin hər görüşü sonrası olduğu kimi, Peterburq görüşünün ardından da Ermənistan mətbuatında qərəzli mövqelər ara vermir. Bu gün isə belə bir fikirlə Ermənistan parlamentinin vitse-spikeri Eduard Şarmazanov özünün yerli sayta açıqlamasında çıxış edib.
Erməni vitse-spiker deyib ki, Minsk Qrupu təklif olunan vasitəçi mexanizmlərin tətbiqinə etiraz edən Azərbaycan Prezidentinin bu davranışına reaksiya verməlidir. Onun sözlərinə görə, guya İlham Əliyev deyib ki, insidentlərin araşdırılması mexanizminin nədən ibarət olduğu bilinmədiyinə görə onun tətbiqinə qarşı çıxır. Əgər bu mexanizmlər konfliktin dondurulmasına xidmət edəcəksə, əlbəttə ki, Azərbaycan buna getməyəcək. Üstəlik, təmas xəttində də sakitlikdir.
Şarmazanovun sözlərinə şərh verməzdən öncə Prezident ilham Əliyevin bu günlərdə etdiyi çıxışdan həmin hissəni diqqətinizə catdıraq: "İnsidentlərin araşdırılması mexanizminin tətbiqinə indiki mərhələdə ehtiyac yoxdur. Çünki, birincisi, bu mexanizmlər yoxdur. Bizə heç kim konkret demir ki, bu, nədən ibarət olacaqdır. Belə olan halda, bu məsələyə bu gün baxmaq düzgün olmazdı. İkincisi, bunun mənası nədən ibarətdir. Əgər bunun mənası ondan ibarətdir ki, münaqişə dondurulsun və təmas xəttində hansısa əlavə tədbirlər görülsün, əlbəttə, Azərbaycan buna getməyəcək. Bu o vaxt ola bilər ki, danışıqlar prosesində müsbət dinamika davam etdirilsin, biz konkret nəticələri görək, bilək ki, nə vaxt bizim torpaqlarımız işğaldan azad olunacaq, onda əlbəttə, müxtəlif mexanizmlər işlənə və o vaxt bu məsələyə baxıla bilər". Göründüyü kimi, Azərbaycan Prezidenti çox əsaslandırılmış və aydın şəkildə bildirir ki, deyilən mexanizm indiki halda konfliktin dondurulmasına xidmət edəcəksə, Azərbaycana gərək deyil, çünki biz danışıqlardan müsbət dinamika gözləyirik. Əgər bu dinamika yoxdursa, o mexanizmlərə də ehtiyac yoxdur. Üstəlik nəzərə alınmalıdır ki, Prezidentin də qeyd etdiyi kimi, Azərbaycan bu barədə üzərinə hər hansı öhdəlik götürməyib və heç bir sənəd də imzalamayıb. Bu halda erməni vitse-prezidentin Minsk Qrupunu "tədbir görməyə” çağırması məntiqdən uzaq hərəkət olmaqla, cığal uşağın doğru olmadığını bildiyi halda hikkə yeritməsinə bənzəyir.
İkinci bir məsələ isə Şarmazanovun, danışıqlarda iştirak etmədiyi halda, özünü "yuyulmamış çömçə kimi” ortaya atmasıdır. Halbuki, bu barədə danışmaq üçün onun, ən azı, danışıqların detalları ilə tanış olması gərəkir. Maraqlıdır, danışıqların birbaşa iştirakçısı Sarkisyan susduğu halda ətrafı niyə əl-ayağa düşüb? Yoxsa Sarkisyan Azərbaycan Prezidentinin tövsiyəsinə əməl edərək "Helsinki Yekun Aktı”nı oxumaqla məşğuldu?
Samirə
