Aprelin 7-də Danimarkada yaşayan azərbaycanlılar son günlər Ermənistan ordusu tərəfindən atəşkəsin pozulması və cəbhədə törətdikləri hərbi təxribatlara etiraz etmək məqsədi ilə Ermənistanın Danimarkadakı səfirliyi qarşısında aksiya keçirib.
Bu barədə Trend-ə Diasporla İş üzrə Dövlət Komitəsindən məlumat verilib.
Bildirilir ki, Danimarkada fəaliyyət göstərən Azərbaycan diaspor təşkilatı "Vətən" Cəmiyyətinin təşkilatçılığı ilə baş tutan etiraz aksiyasında türk və türkmən diaspor təşkilatlarının nümayəndələri də iştirak edib.
Mitinq Azərbaycan Dövlət himninin səslənməsi ilə başlayıb. Daha sonra çıxış edənlər aprelin 1-dən 2-ə keçən gecədən başlayaraq Azərbaycanla Ermənistan qoşunlarının təmas xəttində Ermənistan Silahlı Qüvvələri tərəfindən atəşkəs rejiminin pozulmasını, dinc Azərbaycan əhalisinin atəşə tutulmasını qəti şəkildə pisləyib.
Çıxışçılar həmçinin, Ermənistan dövlətini BMT Təhlükəsizlik Şurasının 4 müvafiq qətnaməsini yerinə yetirməyə, Azərbaycan torpaqlarını qeyd-şərtsiz tərk etməyə çağırıb.
Mitinqin sonunda Ermənistan səfirliyi əməkdaşlarına mitinqin bəyannaməsi təqdim edilsə də, səfirlik əməkdaşları bəyannaməni qəbul etməkdən imtina ediblər. Səfirliyin qarşısındakı poçt qutusu bağlı olduğundan aksiya iştirakçıları bəyannaməni poçt vasitəsi ilə göndəriblər.
Amerika Azərbaycanlıları Şəbəkəsi Ağ Ev qarşısında…
Vaşinqtonda yaşayan azərbaycanlılar da son günlər cəbhə xəttində baş verən hadisələrlə bağlı Ermənistan dövlətinə etiraz olaraq Ağ Ev qarşısında aksiya keçirib. Mitinqdə Azərbaycan diaspor nümayəndələri ilə yanaşı, türk diasporunun da üzvləri iştirak edib.
Aksiya iştirakçıları əllərində Azərbaycan və ABŞ bayraqları tutmaqla yanaşı, "Qarabağ bizimdir, bizim olacaq", "Ya Qarabağ, ya ölüm", "Erməni, Azərbaycan torpaqlarını tərk et", " Ermənistan etnik təmizləmədə günahkardır" kimi şüarlar səsləndiriblər.
Çıxış edən aksiya iştirakçıları Ermənistan Silahlı Qüvvələrinin Azərbaycanla təmas xəttində törətdiyi hərbi təxribatları qınayıb, Ermənistan tərəfindən atəşə məruz qalan dinc sakinlərin tələfatı və əmlaklarına dəyən ziyanla müşayiət olunan hadisələrdən narahatlıq ifadə ediblər.
Aksiyada iştirak edən Amerika Azərbaycanlıları Şəbəkəsinin rəhbəri Adil Bağırov çıxışında bildirib ki, bu gün Azərbaycan diasporu erməni lobbisindən daha fəaldır və müxtəlif ölkələrdə yaşamasından asılı olmayaraq hər zaman birlik nümayiş etdirir.
Çıxışçılar Ermənistan dövlətindən təcavüzkarlıq siyasətindən əl çəkməyi, Azərbaycandan işğal etdikləri torpaqları geri qaytarmağı tələb ediblər.
Həmçinin, Ermənistanın BMT-nin müvafiq qətnamələrini yerinə yetirməsi üçün dünya ictimaiyyətini işğalçı dövlətə təzyiq göstərməyə çağrıblar.
Budapeşt
Son günlər Ermənistan-Azərbaycan qoşunlarının təmas xəttində yaşanan gərginlik Macarıstanda yaşayan Azərbaycan disporunun da diqqət mərkəzindədir. Vətənə, ordumuza və döyüşlərdə qəhrəmanlığı ilə fərqlənən əsgərlərimizə dəstək olmaq məqsədilə Macarıstanda yaşayan diasporamızın təmsilçiləri və burada təhsil alan tələbələrimiz paytaxt Budapeşt şəhərinin mərkəzində yerləşən Qəhrəmanlar meydanında dəstək aksiyası keçiriblər.
Azərbaycanın Macarıstandakı səfirliyindən verilən məlumata görə, tədbirdə həmçinin yerli ictimaiyyətin, "Yobbik - Daha yaxşı Macarıstan uğrunda hərəkat" partiyasının təmsilçiləri, türk diasponunun nümayəndələri, "Macar-Turan" cəmiyyətinin üzvləri və KİV nümayəndələri iştirak ediblər.
Aksiya zamanı, Ermənistanın Azərbaycana qarşı yürütdüyü və iyirmi ildən çox davam edən təcavüzkar siyasətin ağır nəticələri barədə macar ictimaiyyətinin nümayəndələrinə və jurnalistlərə məlumat verilmişdir.
Azərbaycan Silahlı Qüvvələrinin ölkəmizin beynəlxalq səviyyədə tanınmış sərhədləri daxilində mülki əhalinin təhlükəsizliyinin təmin edilməsi, Ermənistanın təxribatlarının və təcavüzkar fəaliyyətinin qarşısının alınması məqsədilə lazımi addımlar atdığı, Azərbaycan torpaqlarının hərbi işğalının münaqişənin həllinə xidmət etmədiyi və münaqişənin heç zaman Ermənistanın arzu etdiyi siyasi nəticələrlə yekunlaşmayacağı diqqətə çatdırılıb.
Daha sonra tədbir iştrakçıları "Qarabağ bizimdir, bizim də olacaq", "Vətən torpağı bölünməzdir", "Şəhidlər ölməz, Vətən bölünməz", "Biz hər zaman səninləyik Azərbaycan", "İşğal olunmuş torpaqlarımız azad olunsun" kimi şüarlar səsləndiriblər.
Kiyev...
Ukraynada fəaliyyət göstərən Azərbaycan gənclər təşkilatlarının fəal üzvlərinin təşəbbüsü ilə Ermənistanın Ukraynadakı səfirliyi qarşısında da etiraz aksiyası təşkil olunub.
Aksiyanın məqsədi son günlər Azərbaycan və Ermənistan qoşunlarının təmas xəttində Ermənistan Silahlı Qüvvələri tərəfindən törədilən hərbi təxribatlara etiraz etmək olub.
Aksiya iştirakçıları "Qarabağ Azərbaycanındır" , "Qarabağ bizimdir" "Ermənilər, Qarabağdan rədd olun!" kimi şüarlar səsləndiriblər. Həmçinin əllərində 3 dildə (Azərbaycan, Ukrayna və ingilis) "Erməni aqressiyasına son!", "Mən Qarabağa - evimə qayıtmaq istəyirəm!" plakatları tutublar.
Mitinqdə çıxış edən gənclər Ali Baş Komandan İlham Əliyevə və Azərbaycan Silahlı Qüvvələrinin əsgər və zabitlərinə dəstəklərini ifadə ediblər. Onlar 1-5 aprel tarixində Ermənistan Silahlı Qüvvələri tərəfindən atəşkəs rejiminin pozulmasını və dinc əhalinin öldürülməsini qətiyyətlə pisləyib, Ermənistan dövlətindən Azərbaycan torpaqlarını qeyd-şərtsiz tərk etməyi tələb ediblər.
Nümayişçilər Ermənistan səfirliyi binasının giriş qapısının qarşısında üzərində "Artıq işğal olunmuş torpaqlardan qaçmağın vaxtıdır" sözləri yazılmış çantalar qoyublar.
Avstraliyanın paytaxtı Kanberra...
Avstraliyanın paytaxtı Kanberra şəhərində bu ölkədə fəaliyyət göstərən Azərbaycan və Türkiyə diasporlarının iştirakı ilə qoşunların təmas xəttində Ermənistanın son günlərdə intensivləşən təxribatçı hərəkətlərinə etiraz olaraq aksiya keçirilib.
Azərbaycan və Türkiyə bayraqlarının qaldırıldığı tədbir Avstraliyadakı erməni təşkilatlarının Azərbaycanın Kanberradakı səfirliyi önündə Azərbaycan əleyhinə keçirdiyi aksiya ilə paralel olaraq keçirilib.
Tədbirdə Azərbaycanın ərazi bütövlüyünün bərpasına və Ermənistan-Azərbaycan, Dağlıq Qarabağ münaqişəsinin nizamlanması istiqamətində aparılan danışıqlar prosesində tutduğu ədalətli mövqeyə dəstək ifadə etmək məqsədilə təşkil olunub.
Aksiyada "Qarabağ Azərbaycan ərazisidir", "İşğalçı Ermənistan, Azərbaycan torpaqlarından rədd ol!", "İşğala son!", "Azərbaycan torpaqlarını öz xoşunla tərk et", "Əsgərlərimizləyik" kimi şuarlar səslənib.
Qeyd edək ki, aksiya Azərbaycan-Avstraliya-Türk Dostluq Cəmiyyəti və azərbaycanlıların Avstraliyada fəaliyyət göstərən digər təşkilatları tərəfindən birgə təşkil edib.
