Türkiyədə fəaliyyət göstərən Azərbaycan əsilli iş adamı Rza Zərrab ABŞ-da həbs edilib. Iş adamı İran sanksiyalarını pozmaqla ABŞ-ı aldatmaq, bank saxtakarlığı və çirkli pul yumaq ittihamı ilə Federal Tədqiqatlar Bürosu (FBİ) tərəfindən Mayamidə şənbə günü saxlanıb.
Baki-xeber.com xəbər verir ki, Zərrab və iki İran vətəndaşı - Kamelia Cəmşidi və Hüseyn Nəcəfzadə İran hökumətinin xeyrinə saxtakarlıq edərək yüz milyonlarla dollarlıq bank əməliyyatı aparmaqda da günahlandırılır.
Zərrab bazar ertəsi Mayamidə məhkəmə qarşısına çıxarılıb, barəsində həbs qətimkan tədbiri seçilib. Nyu York prokuroru Preet Bharara, milli təhlükəsizlik məsələlərindən məsul ədliyyə nazirinin müavini Con Carlin və FBI direktor müavini Dieqo Rodriquez sözügedən şəxslər barədə ağır ittihamlar irəli sürüblər.
Hakim Riçard Bermanın baxdığı iddiada, prokuror hər üç şübhəliyə ABŞ-ı aldatmaqdan 5 il, ABŞ-ın İran sanksiyalarını pozmaqdan 20 il, bank saxtakarlığından 30 il və çirkli pul yumaqdan 20 il olmaqla cəmi 75 il həbs cəzası istəyib.
Qeyd edək ki, Zarrab Floridanın Mayami şəhərində martın 19-da saxlanıb və bazar ertəsi Mayamidə federal məhkəmənin qarşısına çıxarılıb. Prokuror Bharara Zərrabın törətdiyi iddia edilən cinayətlərin sıralandığı 21 səhifəlik ittihamnamənin açıqlanmasının ardından bildirib ki, sözügedən şübhəlilər illərlə İran və iranlı şirkətlərə qarşı sanksiyaları pozublar və çirkli pul yumaqda iştirak ediblər.
FBI direktor müavini Rodriquez isə bildirib ki, 2010-cu ildən 2015-ci ilə qədər təxminən beş il boyunca şübhəlilər iranlı təşkilatların adına maliyyə əməliyyatları apararaq, İrana qarşı ABŞ və beynəlxalq iqtisadi sanksiyaları pozublar.
İttihamnamədə Zərrab və digər şübhəlilərin adlarına bank əməliyyatları apardıqları bildirilən İran təşkilatlarının adları da yer alıb: ABŞ-ın qara siyahısında olan Bank Mellat, İran İran İslam İnqilabı Keşikçiləri Korpusu ilə əlaqəli İran Milli Neft Şirkəti (NIOC), Naftiran Intertrade Company Ltd. (NICO), Naftiran Intertrade Company Sarl ( "NICO Sarl") və Hong Kong Intertrade Company (HKICO) və İran inşaat və enerji şirkəti MAPNA Group.
