Prezident İlham Əliyev Naxçıvan Muxtar Respublikasınln 100 illiyinin qeyd edilməsi barədə sərəncam imzalayıb. Sərəncamın diqqətçəkən özəlliyi orada Naxçıvan Ali məclisinin adının ümumiyyətlə çəkilməməsidir. Belə ki , sərəncamda 100 illik tədbirlərin qrafikinin hazırlanması üçün məsul subyektlər olaraq Azərbaycan XİN, Azərbaycan Elm və təhsil nazirliyi, Azərbaycan Diaspor komitəsi və Azərbaycan MEA müəyyən edilib. Naxçıvanda tədbirlərin təşkilatçılığına məsul olaraq Prezidentin Naxçıvan üzrə səlahiyyətli nümayəndəsi və Naxçıvan Nazirlər kabineti müəyyən olunub. Göründüyü kimi, Ali Məclisin adı heç bir yerdə çəkilmir və bu təsadüf deyil.
Məsələ burasındadır ki, bu gün Muxtar Respublikanın dövlət hakimiyyət orqanları sistemində reytinqi ən zədəli struktur olaraq Ali məclis, yəni müxtariyyatın patlamenti tanınır. Son bir ildə İcra və məhkəmə hakimiyyəti sistemi əsasən dəyişdirilsə də, əksinə, Ali məclis əsasən köhnə görkəmində qalmış və yeniləşməyə böyük ehtiyac duyan orqandır. Ancaq iş burasındadır ki, Ali Məclis seçkili orqan olduğu üçün onu seçkisiz yeniləşdirmək mümkün deyil. Müəyyən kosmetik kadr dəyişmələri isə heç bir köklü yeniliyə gətirib çıxarmır. Təsadüfi deyik ki, Ali Məclis sədrinin müavini dəyişdiyi halda , sədr postu hələ boş saxlanılır. Halbuki son 13 ayda 2 dəfə Ali Məclisin sessiyası çağırılıb. Sədr postunun hələ də boş saxlanması Ali Məclisin Naxçıvanda heç bir ictimai etimada söykənmədiyinin ifadəsi kimi qəbul olunmalıdır. Başqa sözlə desək, Ali Məclisin hazırkı deputat korpusunda onun imicini bərpa etmək gücündə olan bir şəxsin yoxluğu açıq görünür. Eyni zamanda, Naxçıvanda 1995- 2022- ci illər arasında 27 il yerli camaatın narazılığını doğurmuş idarəçiliyin "dəyirmanı rolunda" məhz bu qurum çıxış edib .Başqa sözlə desək, naxçıvanlıların etimadını kütləvi şəkildə sarsıtmış idarıçiliyin əsas məsuluyyəti keçmiş sədrin üzərində olsa da, sıravi deputatlar ziyankar sükutlarına görə, Ali Məclisin aparatı isə cinayətkar icraçılığına görə müəyyən məsuliyyət daşıyır.
Beləliklə, Muxtar respublikanın 27 illik problemlərinin əsas yaradıcısı və məsulu olan qurumu şərəfli tarix olan 100 illik yubiley təntınələrinə qoşmaq həqiqətən doğru olmazdı və Prezident fərmanının bu məzmunda tərtibatı hazırkı şəraitdə məhz ən doğru yanaşmadır. Naxçıvanda korrupsiyaya və sui-istifadəyə görə həbslər və vəzifədən qovulmalar olduğu halda, Ali Məclisin keçmiş sədrinin hər göstərişini müti poza ilə icra edən Məclisin aparatı hələ də yerindədir. Ən azı bu adamların özündə keçmişə görə azacıq məsuliyyət hissi, vicdan olmalı idi və "gedən rəhbərin yanında mən də günahlara imza atmışam" deyərək istefa verməli, ya da könüllü getməli idilər. Vasif Talıbovun arxasınca camaatın danışdıqlarının az bir hissəsinin bunlara aid olduğunu doğurdanmı başa düşmürlər, ya özlərini o yerə qoymurlar?...
Göründüyü kimi, Naxçıvanın şərəfli tarixində fakt kimi yazılan 100 illik təntənələrin hazırlanmasına və icrasına məsul dövlət qurumlarının sırasında Naxçıvan Ali Məclisinin adının çəkilməməsi ciddi əsaslara söykənir və Prezidentin Muxtar Respublikada ictimai rəyə hörmətlə yanaşdığının bariz ifadəsidir.
Təsəvvür edin ki, Muxatariyyatın şərəfli 100 illik tədbirlərinin təşkilində və icrasında Ali Məclisin adı "heç bir dəftərdə" olmayan qurum kimi görünməz olacaq. Ali Məclisin öz günahıdır, keçmişdə rəhbərliyin subyektiv idarəçiliyinə necə prinsipsiz tərəfdaşlıq etmişdisə, bu gün də həmin prinsipsizliklə hadisələrə passiv kənar müşahidəçi mövqeyindədir. Bu qurumun müxtariyyatda hörməti qalsaydı , ən azı yerli mükafatlandırmaların müəyyən edilməsi və təltifi ilə bağlı adını sərəncama salardılar.....
Deyilə bilər ki , hakimiyyət bölgü prinsipi oldiğuna görə Ali Məclisin adının Prezident sərəncamına salınması düz olmazdı.Lakin ən azı tövsiyyə səviyyəsində xatlrlatma etmək olardı ki, bunun da edilməməsi yuxarıda göstərdiyimiz ciddi əsaslarla bağlıdır....
Tahir Tağıyev
